പ്രകൃതി ദൃശ്യങ്ങളുടെ കലവറയായ പാലുകാച്ചി മലയിലേക്ക് വിനോദ സഞ്ചാരികളുടെ ഒഴുക്ക്. സമുദ്ര നിരപ്പില്‍നിന്ന് 1200 അടി ഉയരത്തില്‍ സ്ഥിതിചെയ്യുന്ന പ്രകൃതി ദൃശ്യങ്ങളുടെ കലവറയായ പാലുകാച്ചി മല കേന്ദ്രീകരിച്ച്‌ ഇക്കോ ടൂറിസം പദ്ധതി നടത്തിപ്പിന് ശേഷമാണ് നിരവധി സഞ്ചാരികളെത്തുന്നത്.
മേഖലയിലെത്തുന്ന സഞ്ചാരികള്‍ക്ക് ചീങ്കണ്ണിപ്പുഴയിലെ കോച്ചിക്കുളം, കരിയം കാപ്പിലെ ചീരംവേലിപ്പടി ജലാശയം, കുണ്ടേരിമുളംകാടുകള്‍, ശാന്തിഗിരിക്ക് സമീപം സൂയിസൈഡ് പോയന്‍റ് എന്നിങ്ങനെ നിരവധി വിസ്മയക്കാഴ്ച്ചകളുണ്ട്.
പ്രകൃതിരമണീയമായ കേളകം പഞ്ചായത്തില്‍ ഫാം ടൂറിസത്തിന് അനന്തസാധ്യതകളാണുള്ളതെന്ന് സാധ്യത പഠനം നടത്തിയ വിദഗ്ദ സംഘം മുമ്പ് കണ്ടെത്തിയിരുന്നു. മലകളും, പുഴകളും, വനങ്ങളും അതിര്‍ത്തി പങ്കിടുന്ന കേളകത്തെ കാര്‍ഷിക മേഖലയുടെ സാധ്യതകള്‍ കൂടി കൂട്ടിച്ചേര്‍ത്തതാണ് ഫാം ടൂറിസം .
കര്‍ഷകരുടെ വൈവിധ്യമാര്‍ന്ന കൃഷിയിടങ്ങള്‍, വളര്‍ത്തുമൃഗങ്ങള്‍, വളര്‍ത്തു പക്ഷികള്‍, വളര്‍ത്തു മത്സ്യങ്ങള്‍, ഫാംഹൗസ് ഉല്‍പന്നങ്ങള്‍, കൂടാതെ മലകള്‍, വ്യൂ പോയന്‍റ്, ട്രക്കിങ്, പുഴകള്‍, പുഴയോരം, സ്വിമ്മിങ്, ബോട്ടിങ്, വനമേഖല, യോഗ, കളരി, കൂടാതെ കല- സംസ്കാരിക പരിപാടികള്‍, ആദിവാസി കലാരൂപങ്ങള്‍ എന്നിവ കോര്‍ത്തിണക്കിയുള്ള പദ്ധതികള്‍ നടപ്പാക്കുകയാണ് കേളകം ടൂറിസം.
ഈ മേഖലകളിലേക്കാണ് ദൂരദിക്കുകളില്‍ നിന്നുപോലും സഞ്ചാരികള്‍ സംഘങ്ങളായി എത്തി പാലുകാച്ചിമലയുടെ ദൃശ്യചാരുത നുകര്‍ന്ന് മടങ്ങുന്നത്.
Inflow of Tourists to Palukachi Hill
.jpeg)
