(truevisionnews.com)ഓണത്തിനും മറ്റ് വിശേഷാവസരങ്ങൾക്കും നമ്മുടെയെല്ലാം വീടുകളിൽ ഉണ്ടാക്കാറുള്ള വിഭവങ്ങളിൽ ഒന്നാണ് ഇഞ്ചിക്കറി. വളരെ കുറഞ്ഞ ചേരുവകൾ ഉപയോഗപ്പെടുത്തി തയ്യാറാക്കാവുന്ന രുചികരമായ ഒരു വിഭവമാണ് ഇഞ്ചിക്കറി
ചേരുവകൾ
ഇഞ്ചി - 200 ഗ്രാം
ചെറിയ ഉള്ളി -10
പച്ചമുളക് - 3
കറിവേപ്പില - 2 തണ്ട്
വാളൻപുളി - ഒരു വലിയ ചെറുനാരങ്ങ വലുപ്പം(40 ഗ്രാം)
മുളക്പൊടി - 1½ ടേബിൾസ്പൂൺ
മല്ലിപൊടി - ½ ടേബിൾസ്പൂൺ
വറുത്ത് പൊടിച്ച ഉലുവപ്പൊടി - ¼ ടീസ്പൂൺ
കായപ്പൊടി - ¼ ടീസ്പൂൺ
മഞ്ഞൾപൊടി - 2 നുള്ള്
ശർക്കര - 3 ടേബിൾസ്പൂൺ
കടുക് - 1 ടീസ്പൂൺ
വെളിച്ചെണ്ണ - ആവശ്യത്തിന്
ചൂടുവെള്ളം - 1 കപ്പ്
ഉപ്പ് - പാകത്തിന്
തയാറാക്കുന്ന വിധം
ഇഞ്ചി തൊലി കളഞ്ഞു വൃത്തിയാക്കി വട്ടത്തിൽ കനം കുറച്ചരിയണം. ചെറിയ ഉള്ളിയും പച്ചമുളകും വട്ടത്തിൽ കനം കുറച്ചരിയണം. പുളി ½ കപ്പ് വെള്ളത്തിൽ കുതിർത്തുപിഴിഞ്ഞുവെക്കണം.
ആവശ്യത്തിനുള്ള വെളിച്ചെണ്ണ ചൂടാകുമ്പോൾ ഇതിലേക്ക് ഇഞ്ചി ഇട്ട് ഇളം ചുവപ്പുനിറമാകുന്നത് വരെ വറുത്തു കോരുക.
(കരുകരുപ്പാകുന്നത് വരെ ) ഇഞ്ചി വറുത്ത എണ്ണയിൽ ഉള്ളി ഇട്ട് കുറച്ചു നിറം മാറുമ്പോൾ പച്ചമുളകും കറിവേപ്പിലയും കൂടി ഇട്ട് വറുത്തു കോരുക (ഉള്ളി ഇളം ചുവപ്പു നിറമാകണം) വറുത്തെടുത്തതെല്ലാം ചൂട് ആറിക്കഴിയുമ്പോൾ ചെറിയ തരിയോടു കൂടി പൊടിച്ചെടുക്കുക.
ഇതേ വെളിച്ചെണ്ണയിൽ നിന്നും 2 ½ ടേബിൾസ്പൂൺ വെളിച്ചെണ്ണ എടുത്തിട്ട് ചൂടാകുമ്പോൾ കടുക് ഇട്ട് പൊട്ടിയാൽ കറിവേപ്പിലയും ഇടുക. ചെറിയ തീയിൽ ഇട്ടിട്ട് പൊടികൾ എല്ലാം ചേർത്തു കൊടുക്കുക. ചെറിയ തീയിൽത്തന്നെ പൊടിയുടെ പച്ച മണം മാറുന്നവരെ ഇളക്കുക. (1 മിനിറ്റ് )
ഇതിലേക്ക് പുളിവെള്ളവും ശർക്കരയും 1 കപ്പ് ചൂടുവെള്ളവും ഉപ്പും ചേർത്തിട്ട് തിളപ്പിക്കുക. വറുത്തു പൊടിച്ചതെല്ലാം ചേർക്കുക, മിതമായ ചൂടിൽ തിളപ്പിക്കുക.ഇഞ്ചിക്കറി കുറുകി കുറച്ച് എണ്ണ തെളിയുന്ന പാകമാകുമ്പോൾ സദ്യ സ്പെഷ്യൽ പുളി ഇഞ്ചി തയ്യാർ.
#preparing #delicious #ginger #curry #Onam #Sadya
.jpeg)
