(truevisionnews.com) ചില ഭക്ഷണങ്ങൾ അവ എത്രമാത്രം 'ഹെൽത്തി'യാണെന്ന് പറഞ്ഞാലും കഴിക്കുന്ന രീതിയിലല്ല കഴിക്കുന്നതെങ്കിൽ ആരോഗ്യത്തിന് ഗുണകരമാകുന്നതിന് പകരം ദോഷമായി വരാം.
ഇത്തരത്തിൽ നമ്മൾ ശ്രദ്ധിക്കേണ്ട ചില 'ഫുഡ് കോംബോ'കളുണ്ട്. അതായത് വിരുദ്ധാഹാരം. എന്നുവച്ചാൽ ഒരുമിച്ച് കഴിക്കുന്നത് നല്ലതല്ലാത്ത ആഹാരം. നേന്ത്രപ്പഴം ഒരുപാട് ആരോഗ്യഗുണങ്ങളുള്ളൊരു ഭക്ഷണസാധനമാണ്.
പച്ചയ്ക്കും പഴുത്തിട്ടുമെല്ലാം കഴിക്കാവുന്ന ഒന്ന്. ഏതവസ്ഥയിലാണെങ്കിലും ഗുണങ്ങൾ പലതുണ്ട്. ഫൈബർ, പ്രോട്ടീൻ, ആരോഗ്യകരമായ കൊഴുപ്പ് തുടങ്ങി പല പോഷകങ്ങളുടെയും കലവറയാണ് നേന്ത്രപ്പഴം.
എന്നാൽ ചില ആരോഗ്യപ്രശ്നങ്ങൾ കൂട്ടാനോ, സാധ്യതയുണ്ടാക്കാനോ കാരണമാകുമെന്നതിനാൽ നേന്ത്രപ്പഴത്തിനൊപ്പം കഴിക്കരുതാത്ത ഭക്ഷണങ്ങളുമുണ്ടെന്നാണ് ആയുർവേദ വിധി പറയുന്നത്. ഇത്തരത്തിൽ ഒഴിവാക്കാൻ നിർദേശിക്കുന്ന ഭക്ഷണസാധനങ്ങൾ ഏതെല്ലാമെന്ന് അറിയാം...
നേന്ത്രപ്പഴം പാലിൽ അടിച്ച് കുടിക്കുന്നവരെല്ലാം ഏറെയാണ്. നേന്ത്രപ്പഴം കഴിക്കുന്നതിനൊപ്പം പാൽ കഴിക്കുന്നവരുമുണ്ട്. എന്നാൽ ആയുർവേദ വിധിപ്രകാരം നേന്ത്രപ്പഴവും പാലും ഒരുമിച്ച് വേണ്ട എന്നാണ്. നേന്ത്രപ്പഴം അസിഡിക് ആണത്രേ, പാലാണെങ്കിൽ മധുരവും ഇത് രണ്ടും ഒരുമിച്ച് കഴിക്കുന്നത് ദഹനപ്രശ്നങ്ങളുണ്ടാക്കുമെന്നാണ് ആയുർവേദം പറയുന്നത്. അതുപോലെ മൂക്കടപ്പ്, കഫക്കെട്ട് പോലുള്ള പ്രശ്നങ്ങളുണ്ടാക്കുമെന്നും പറയപ്പെടുന്നു.
നേന്ത്രപ്പഴത്തിനൊപ്പം കഴിക്കരുതാത്ത മറ്റൊരു വിഭവമാണ് റെഡ് മീറ്റ്. നേന്ത്രപ്പഴത്തിലുള്ള 'പ്യൂരിൻ' ആണ് പഴം ദഹിപ്പിച്ചെടുക്കാൻ സഹായിക്കുന്നത്. എന്നാൽ പ്രോട്ടീൻ വളരെയധികം അടങ്ങിയ റെഡ് മീറ്റ് കഴിക്കുമ്പോൾ ദഹനം മന്ദഗതിയിലാകുന്നു. അതിനാൽ തന്നെ ഗ്യാസ് പോലുള്ള ദഹനപ്രശ്നങ്ങൾ ഇവയുണ്ടാക്കുമത്രേ.
നേന്ത്രപ്പഴം ശരിക്കും ദഹിക്കാൻ പ്രയാസമില്ലാത്ത ഭക്ഷണമാണെന്ന് പറഞ്ഞുവല്ലോ. എന്നാൽ ഇതിനൊപ്പം ബേക്ക് ചെയ്ത വിഭവങ്ങൾക്കൊപ്പം- ഉദാഹരണത്തിന് ബ്രഡ്- ബൺ എന്നിവയ്ക്കെല്ലാമൊപ്പം കഴിക്കുകയാണെങ്കിൽ ദഹനം പതിയെ ആകും. കാരണം ബേക്ക്ഡ് ആയ വിഭവങ്ങളിൽ പ്രോസസ്ഡ് കാർബ് കൂടുതലാണ് ഇത് ദഹനം വൈകിപ്പിക്കും.
സിട്രസ് ഫ്രൂട്ട്സ് എന്നറിയപ്പെടുന്ന പഴങ്ങളുണ്ട്. ഓറഞ്ച്, നാരങ്ങ, മാതളം, കിവി, സ്ട്രോബെറി എന്നിവയെല്ലാം സിട്രസ് ഫ്രൂട്ട്സ് ആണ്. ഇവയ്ക്കൊപ്പം നേന്ത്രപ്പഴം കഴിക്കുന്നതും നല്ലതല്ലെന്നാണ് ആയുർവേദം നിർദേശിക്കുന്നത്.
വാത-പിത്ത-കഫ പ്രശ്നങ്ങൾക്ക് ഇത് ഇടയാക്കുമെന്നാണ് ആയുർവേദം പറയുന്നത്. ഇവയുടെ 'ബാലൻസ്' തെറ്റുന്നതാണ് പ്രശ്നമാകുന്നതത്രേ.
#foods #eaten #bananas
