ബാലുശേരി: ( www.truevisionnews.com ) കാർ സ്കൂട്ടറിലിടിച്ച് പരിക്കേറ്റ് ചികിത്സയിലായിരുന്ന സിപിഐ എം കന്നൂര് ലോക്കല്‍ കമ്മിറ്റി സെക്രട്ടറിയും ദേശാഭിമാനി ഏജൻ്റുമായിരുന്ന ഉള്ള്യേരി ആനവാതില്‍ ഇല്ലത്ത് മീത്തല്‍ ദാമോദരന്‍( 63) മരിച്ചു. ഞായർ രാവിലെ 6.30 ഓടെ പത്രവിതരണത്തിനിടെ സ്കൂട്ടറിൽ കാറിടിച്ചാണ്അപകടം.
അപകടത്തില്‍ ഗുരുതരമായി പരുക്കേറ്റിരുന്ന ദാമോദരൻ കോഴിക്കോട് സ്വകാര്യ ആശുപത്രിയില്‍ ചികില്‍സയിലായിരുന്നു. കാര്‍ താമരശേരി ഭാഗത്തേക്ക് പോകുകയായിരുന്നു. ഇടിയുടെ ആഘാതത്തില്‍ സ്‌ക്കൂട്ടര്‍ പൂര്‍ണമായും തകര്‍ന്നിരുന്നു. ഇടിച്ച ശേഷം സ്‌ക്കൂട്ടറിനെ 15 മീറ്ററോളം റോഡിലൂടെ നിരക്കി, അടുത്തുള്ള വൈദ്യുതിക്കാലില്‍ ചെന്നിടിച്ച ശേഷമാണ് കാര്‍ നിന്നത്. തിങ്കളാഴ്ച രാവിലെയാണ് മരിച്ചത്.
1986 ൽ സിപിഐ എം അംഗമായി.ഉള്ള്യേരി പഞ്ചായത്ത് വികസനകാര്യ സ്ഥിരംസമിതി ചെയർമാൻ, ( 2005-10) ബാലുശ്ശേരി ബ്ലോക്ക് പഞ്ചായത്ത് അംഗം(2010-15) എന്നീ നിലകളില്‍ പ്രവര്‍ത്തിച്ചിട്ടുണ്ട്. കര്‍ഷകത്തൊഴിലാളി യൂണിയന്‍ മുന്‍ ഏരിയാ ജോയിന്റ് സെക്രട്ടറിയായിരുന്നു.
ഭാര്യ: പുഷ്പാവതി( ഉള്ള്യേരിപഞ്ചായത്ത് സാക്ഷരതാ പ്രേരക്). മക്കള്‍: ദിപിന്‍, (ഇന്ത്യന്‍ ആര്‍മി), ദീപ്തി. മരുമക്കള്‍ പ്രിന്‍സ് (കൂമുള്ളി) അശ്വതി (ഒള്ളൂര്‍).പിതാവ് : കൃഷ്ണന്‍നായര്‍. മാതാവ് ; ലക്ഷ്മി. സഹോദരങ്ങള്‍: സൗമിനി നാറാത്ത് വെസ്റ്റ് , രാധ കക്കഞ്ചേരി, ഇ.എം പ്രഭാകരന്‍ (സി.പി.എം കന്നൂര് ലോക്കല്‍ കമ്മിറ്റി അംഗം). പോസ്റ്റ് മോര്‍ട്ടത്തിനുശേഷം മൃതദേഹം കന്നൂര് ഗവ. യു പി സ്‌കൂള്‍ പരിസരത്ത് പൊതുദര്‍ശനത്തിന് വെക്കുന്നതാണ്.
CPI(M) Kannoor Local Committee Secretary EM Damodaran passes away
