മൂന്നാർ: (truevisionnews.com) തേയിലത്തോട്ടങ്ങൾക്ക് നടുവിലൂടെയുള്ള അതിമനോഹരമായ റോഡ് അതിനോട് ചേർന്നുള്ള ലയങ്ങൾ സാധാരണക്കാരായ ആളുകളും.പോകാം മൂന്നാറിലെ 'അവസാന ഗ്രാമത്തിലേക്ക്.
അടുത്തിടെയാണ് യെല്ലപ്പെട്ടി എന്ന മനോഹര പ്രദേശം സമൂഹമാധ്യമങ്ങളിൽ വൈറലായത്.
.gif)
മൂന്നാറുവരെ നീണ്ടുകിടക്കുന്ന തേയിലത്തോട്ടങ്ങളുടെ നടുവിലാണ് യെല്ലപ്പെട്ടിയെന്ന കൊച്ചുഗ്രാമം സ്ഥിതി ചെയ്യുന്നത്.
'അവസാന ഗ്രാമം' എന്നാണ് തമിഴിൽ യെല്ലപ്പെട്ടി എന്ന വാക്കിനർഥം.
തേയിലത്തോട്ടങ്ങളും മനോഹരമായ കുന്നിൻചെരുവുകളും അതിനൊപ്പം തണുത്ത കാറ്റും മനോഹര ദൃശ്യങ്ങളുമുള്ള യെല്ലപ്പെട്ടി ഏതൊരു സഞ്ചാരിയുടെയും മനസ്സ് നിറയ്ക്കും.
വൈകുന്നേരം മലനിരകളിൽ വെയിലേറ്റ് ഇരുന്നാൽ മനോഹരമായ സൂര്യാസ്‌തമയം കാണാം.
തേയിലത്തോട്ടങ്ങളുടെ പച്ചപ്പ് നിറഞ്ഞ മലനിരകൾക്ക് ഇടയിലൂടെ സൂര്യൻ മറയുന്ന കാഴ്ച എന്നെന്നും മനസ്സിൽ നിൽക്കും.
വട്ടവടയിലേക്കും മൂന്നാറിലേക്കുമുള്ള പുലർകാല യാത്രയിൽ യെല്ലപ്പെട്ടിയിൽ കുറച്ച് സമയം ചെലവഴിക്കാനായാൽ മഞ്ഞണിഞ്ഞ മലനിരകൾക്ക് ഇടയിലൂടെയുള്ള സൂര്യോദയം കാണാനാകും. ചുറ്റും സൂര്യന്റെ വെള്ളിവെളിച്ചം വീഴുന്നത് തൊട്ടടുത്ത് നിന്ന് കണ്ടറിയാം.
വട്ടവട എന്ന കാർഷിക ഗ്രാമം സഞ്ചാരികളുടെ പറുദീസ ആയിമാറിയെങ്കിലും യെല്ലപ്പെട്ടിയിൽ ആരുടെയും ശ്രദ്ധ പതിഞ്ഞിരുന്നില്ല എന്നതാണ് വാസ്തവം.
വട്ടവട - മൂന്നാർ പാതയിലെ യാത്രക്കാരാണ് ഒടുവിൽ സ്വർഗം പോലെയുള്ള യെല്ലപ്പെട്ടി കണ്ടെത്തിയതും ഇവിടുത്തെ സൗന്ദര്യം വിളിച്ചുപറഞ്ഞതും.
തമിഴ്‌നാടിനും കേരളത്തിനും ഇടയിലായി സ്ഥിതി ചെയ്യുന്ന ഗ്രാമമായതിനാൽ തന്നെ തമിഴ് ഭാഷ സംസാരിക്കുന്നവരാണ് ഇവിടെ കൂടുതൽ.
യെല്ലപ്പെട്ടിയുടെ സൗന്ദര്യം ആസ്വദിച്ച് ഒരു ചായ ചൂടിക്കുന്നത് തന്നെ വല്ലാത്തൊരു അനുഭൂതിയാണ്.
യെല്ലപ്പെട്ടിയുടെ സൗന്ദര്യം നാടറിഞ്ഞതോടെ ഇന്ന് ദിവസവും നൂറുകണക്കിനാളുകളാണ് തമിഴ് പശ്ചാത്തലമുള്ള ഈ ഗ്രാമത്തിലേക്ക് എത്തുന്നത്.
മൂന്നാറിൽ നിന്ന് ഏകദേശം 26 കിലോമീറ്റർ അകലെ മൂന്നാർ - വട്ടവട റോഡിൽ കുണ്ടളയ്ക്കും ടോപ്പ് സ്റ്റേഷനും ഇടയിലാണ് യെല്ലപ്പെട്ടി കുന്നുകൾ സ്ഥിതി ചെയ്യുന്നത്. കാറിലോ ബസിലോ യെല്ലപ്പെട്ടിയിൽ എത്തിച്ചേരാം. മൂന്നാറിൽ നിന്ന് വളരെ വേഗത്തിൽ ഇവിടെ എത്തിച്ചേരാം.
#lastvillage #amidst #tea #plantations #Yellapetti #tourists #paradise
