കൊച്ചി: (truevisionnews.com) വളരുന്ന കേരളത്തിൻ്റെ മാറ്റങ്ങൾ അതിവേഗം ഉൾക്കൊള്ളുന്ന ഇടമാണ് മെട്രോ സിറ്റിയായ കൊച്ചി.
കേരളത്തിൻ്റെ വ്യവസായ തലസ്ഥാനമായ എറണാകുളം പൊതു തിരഞ്ഞെടുപ്പിനെ നേരിടാൻ ഒരുങ്ങിക്കഴിഞ്ഞു. കൊച്ചി നഗരത്തിനൊപ്പം തീരദേശ മേഖലയും ഉൾക്കൊള്ളുന്ന മണ്ഡലത്തെ കോൺഗ്രസിൻ്റ കുത്തകയെന്ന് വിശേഷിപ്പിക്കാം.
ജനസംഖ്യയുടെ മൂന്നിലൊന്നും വരുന്ന ക്രിസ്ത്യൻ ലാറ്റിൻ കത്തോലിക്കാ വിഭാഗമാണ് എറണാകുളം മണ്ഡലത്തിൻ്റെ വിധി നിർണ്ണയിക്കുന്നത്. യുവ എം പി ഹൈബി ഈഡൻ ആണ് നിലവിൽ മണ്ഡലത്തെ പ്രതിനിധീകരിക്കുന്നത്.
മണ്ഡല ചരിത്രം
ഉപതിരഞ്ഞെടുപ്പുകൾ ഉൾപ്പടെ ആകെ 18 ഇലക്ഷനുകളാണ് എറണാകുളം ലോക്സഭാ മണ്ഡലത്തിൽ നടന്നിട്ടുള്ളത്. ഇതിൽ 14 തവണയും കോൺഗ്രസ് സ്ഥാനാത്ഥികളെയാണ് ജനങ്ങൾ തിരഞ്ഞെടുത്തത്.
4 തവണ മാത്രമാണ് എൽഡിഎഫ് പ്രതിനിധികൾ മണ്ഡലത്തെ പ്രതിനിധീകരിച്ച് ലോക്സഭയിൽ എത്തിയത്. അതിൽ രണ്ടു തവണയും ഉപതിരഞ്ഞെടുപ്പുകളിലൂടെ ജയിച്ച ഇടത് സ്വതന്ത്രൻമാരാണ്.
പാർട്ടി ചിഹ്നം ഇല്ലാതെ ഇടത് സ്വതന്ത്രനായി മത്സരിച്ച സെബാസ്റ്റ്യൻ പോളാണ് എറണാകുളത്തെ രണ്ട് തവണ ലോക്സഭയിൽ പ്രതിനിധീകരിച്ചത്.
മുൻ കോൺഗ്രസ് നേതാവും ഇപ്പൊൾ എൽഡിഫിൻ്റെ ഭാഗവുമായ പ്രൊഫസർ കെവി തോമസ്, 5 തവണ കോൺഗ്രസിൻ്റെ ടിക്കറ്റിൽ എറണാകുളത്തെ പ്രതിനിധീകരിച്ച് ലോക്സഭയിലെത്തിയിട്ടുണ്ട്.
2019 ലെ തിരഞ്ഞെടുപ്പിൽ 169153 വോട്ടിൻ്റെ വൻഭൂരിപക്ഷത്തിൽ ആണ് ഹൈബി ഈഡൻ വിജയിച്ചത്.
നിയമസഭാ മണ്ഡലങ്ങൾ
കളമശ്ശേരി, പറവൂർ, വൈപ്പിൻ, കൊച്ചി, തൃപ്പൂണിത്തുറ, എറണാകുളം,തൃക്കാക്കര തുടങ്ങിയ 7 നിയമസഭാ മണ്ഡലങ്ങൾ ചേരുന്നതാണ് എറണാകുളം ലോക്സഭാ മണ്ഡലം. ഇതിൽ 3 സീറ്റുകളിൽ എൽഡിഎഫും 4 സീറ്റുകളിൽ യുഡിഎഫ് എംഎൽഎമാരുമാണ് ഉള്ളത്.
2024 എങ്ങനെ ചിന്തിക്കും?
കോൺഗ്രസിന് വേണ്ടി സിറ്റിംഗ് എംപിയായ ഹൈബി ഈഡൻ തന്നെയാണ് ഇത്തവണയും രംഗത്തിറങ്ങുന്നത്. സമുദായ സമവാക്യത്തിന് ഏറെ പ്രാധാന്യം കൽപ്പിക്കുന്ന മണ്ഡലത്തിൽ ലത്തീൻ സഭാംഗവും അധ്യാപക സംഘന നേതാവ് കൂടെയായ കെ ജെ ഷൈൻ ടീച്ചറെ രംഗത്തിറക്കിയാണ് സിപിഎം ഒരു അട്ടിമറിക്ക് ഒരുങ്ങുന്നത്.
മണ്ഡലത്തിലെ അടിസ്ഥാന സൗകര്യങ്ങളും വികസന പ്രവർത്തനങ്ങളും തിരഞ്ഞെടുപ്പിൽ ചർച്ചയാകും.
ഇന്ത്യയിലെ ആദ്യത്തെ വൈഫൈപാർക്ക് ആയ ക്യൂൻസ് വാൽക്ക് ഉൾപ്പെടെ മണ്ഡലത്തിൽ നടപ്പാക്കിയ വിവിധ പ്രവർത്തനങ്ങൾ, ഫോർട്ട് കൊച്ചി, മട്ടാഞ്ചേരി, കൊച്ചി സ്മാർട്ട് സിറ്റി മിഷൻ ലിമിറ്റഡിൻ്റെ 1000 കോടിയുടെ പ്രവർത്തനങ്ങൾ തുടങ്ങി വിവിധ പദ്ധതിൾക്ക് തുടക്കം കുറിക്കാനായ ആത്മവിശ്വാസത്തിലാണ് ഹൈബി ഈഡൻ.
മണ്ഡലത്തിലെ പ്രധാന ജനവിഭാഗമായ തീരദേശ മേഖലയിലും പരമ്പരാഗത വ്യവസായങ്ങളും മികച്ച റോഡുകളും മേൽപലങ്ങളും, ഐടി, മെട്രോ ഉൾപ്പെടെയുള്ള മേഖലകളിൽ സമഗ്ര വികസനം ഉറപ്പ് വരുത്തുമെന്ന് കെ.ജി ഷൈൻ പറയുന്നു.
സംസ്ഥാന സർക്കാർ ജില്ലയിൽ നടപ്പാക്കിയ വാട്ടർ മെട്രോ, ടൂറിസം, ഐടി മേഖലയിലെ വിവിധ പദ്ധതികൾ പ്രചാരണ രംഗത്ത് ചർച്ചയാക്കുകയാണ് ഇടത് ക്യാമ്പ്.
തൃപ്പൂണിത്തുറയിലും പറവൂരിലും കളമശേരിയിലും വ്യക്തമായ സ്വാധീനമുള്ള ബിജെപി ഇത്തവണ ആത്മവിശ്വാസത്തിലാണ്. കിഴക്കമ്പലം കേന്ദ്രമായി പ്രവര്‍ത്തിക്കുന്ന ട്വന്റി-20യും മത്സരരംഗത്തുണ്ട്.
ജൂഡ് ആന്റണിയാണ് സ്ഥാനാര്‍ഥി. സംസ്ഥാനത്തെ വികസന മാറ്റങ്ങള്‍ അതിവേഗം പ്രതിഫലിക്കുന്ന, മെട്രോ വേഗതയില്‍ കുതിക്കുന്ന, സ്മാര്‍ട് സിറ്റിയായ എറണാകുളത്ത് മോദിയുടെ വികസന പ്രവര്‍ത്തനങ്ങള്‍ തന്നെയാകും ചര്‍ച്ചയാകുക.
എംപിയുടെയും സംസ്ഥാന സര്‍ക്കാരിന്റെയും പ്രവര്‍ത്തനങ്ങള്‍ താരതമ്യം ചെയ്ത് ജനം വിധിയെഴുതുമ്പോള്‍ ജൂണ്‍ നാലിന് ആര് എറണാകുളം നീന്തിക്കയറുമെന്ന് കണ്ടറിയാം.
#Ernakulam, #Hibi #challenge #Shine? #BJP #discuss #Modi #development #work, #candidate
