---
title: "അന്ത്യനിദ്ര രണ്ട് മണ്ണിൽ; വിപഞ്ചികയുടെ മൃതദേഹം നാട്ടിലെത്തിക്കും, വൈഭവിയുടെ സംസ്കാരം ഷാർജയിൽ തന്നെ"
english_title: "The last rites will be performed in two places Vipanchika body will be brought home Vaibhavi funeral will be held in Sharjah"
publisher: "truevisionnews.com"
canonical_url: "https://truevisionnews.com/news/302947/the-last-rites-will-be-performed-in-two-places-vipanchika-body-will-be-brought-home-vaibhavi-funeral-will-be-held-in-sharjah"
published_at: "2025-07-16T21:25:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6877cbac80dcf_fhfgh.jpg"
keywords: []
---

# അന്ത്യനിദ്ര രണ്ട് മണ്ണിൽ; വിപഞ്ചികയുടെ മൃതദേഹം നാട്ടിലെത്തിക്കും, വൈഭവിയുടെ സംസ്കാരം ഷാർജയിൽ തന്നെ

> **Lead Summary:** **കൊല്ലം : ( **[www.truevisionnews.com]** )** ഷാർജ അൽ നഹ്​ദയിൽ ആത്​മഹത്യ ചെയ്ത കൊല്ലം കൊട്ടാരക്കര സ്വദേശി വിപഞ്ചികയുടെ മകൾ വൈഭവിയുടെ മൃതദേഹം ഷാർജയിൽ സംസ്കരിക്കും. ദുബൈ ഇന്ത്യൻ കോൺസുലേറ്റി​ന്‍റെ മധ്യസ്ഥതയിൽ ബുധനാഴ്ച ഭർത്താവ്​ നിതീഷും വിപഞ്ചികയുടെ കുടുംബവും തമ്മിൽ നടത്തിയ ചർച്ചക്കൊടുവിലാണ്​ തീരുമാനം.

## Article Content

**കൊല്ലം : ( **[www.truevisionnews.com]** )** ഷാർജ അൽ നഹ്​ദയിൽ ആത്​മഹത്യ ചെയ്ത കൊല്ലം കൊട്ടാരക്കര സ്വദേശി വിപഞ്ചികയുടെ മകൾ വൈഭവിയുടെ മൃതദേഹം ഷാർജയിൽ സംസ്കരിക്കും. ദുബൈ ഇന്ത്യൻ കോൺസുലേറ്റി​ന്‍റെ മധ്യസ്ഥതയിൽ ബുധനാഴ്ച ഭർത്താവ്​ നിതീഷും വിപഞ്ചികയുടെ കുടുംബവും തമ്മിൽ നടത്തിയ ചർച്ചക്കൊടുവിലാണ്​ തീരുമാനം.

വിപഞ്ചികയുടെ മൃതദേഹം നടപടിക്രമങ്ങൾക്ക്​ ശേഷം നാട്ടിലേക്ക്​ കൊണ്ടുപോകും. എന്നാൽ, മകളുടെ മൃതദേഹം കൊണ്ടുപോകാൻ സമ്മതിക്കില്ലെന്ന്​ നിതീഷ്​ നിലപാടെടുത്തതോടെയാണ്​ സംസ്കാരം ഷാർജയിൽ തന്നെ നടത്താൻ ധാരണയായതെന്നാണ്​ വിവരം.

കഴിഞ്ഞ ദിവസം ഷാർജ ഇൻഡസ്​ട്രിയൽ ഏരിയ ആറിൽ വൈഭവിയുടെ മൃതദേഹം സംസ്കരിക്കാനുള്ള ഒരുക്കങ്ങൾ നിതീഷും ബന്ധുക്കളും നടത്തിയിരുന്നെങ്കിലും വിപഞ്ചികയുടെ മാതാവ്​ ഷൈലജ ദുബൈ ഇന്ത്യൻ കോൺസുലേറ്റിനെ സമീപിക്കുകയായിരുന്നു. മകളുടെയും പേരക്കുട്ടിയുടെയും മൃതദേഹങ്ങൾ നാട്ടിൽ സംസ്കരിക്കാൻ അനുവദിക്കണമെന്നായിരുന്നു ഇവരുടെ ആവശ്യം.

തുടർന്ന്​ ഇരുവരെയും കോൺസുലേറ്റിലേക്ക്​ വിളിപ്പിച്ച്​ ചർച്ച നടത്തുകയും ഇതിന്‍റെ അടിസ്ഥാനത്തിൽ വൈഭവിയുടെ സംസ്കാരം താൽകാലികമായി മാറ്റിവെക്കാൻ തീരുമാനിക്കുകയായിരുന്നു. ബുധനാഴ്ച വീണ്ടും ഇരുകൂട്ടരേയും കോൺസുലേറ്റ്​ വിളിച്ചുവരുത്തി ചർച്ച നടത്തിയെങ്കിലും നിതീഷ്​ നിലപാടിൽ ഉറച്ചുനിൽക്കുകയായിരുന്നു. അതേസമയം, രണ്ട്​ പേരുടെയും മൃതദേഹങ്ങൾ എപ്പോൾ സംസ്കരിക്കുമെന്ന്​ വ്യക്​തതയില്ല.

ഈ മാസം എട്ടിനാണ്​ അൽ നഹ്​ദയിലെ ഫ്ലാറ്റിൽ വിപഞ്ചിക ആത്​മഹത്യ ചെയ്തത്​. മകളെ ശ്വാസം മുട്ടിച്ച്​ കൊലപ്പെടുത്തിയ ശേഷം തൂങ്ങിമരിക്കുകയായിരുന്നുവെന്നാണ്​ പൊലീസ്​ നിഗമനം. ഭർത്താവിൽ നിന്ന്​ അകന്നു കഴിഞ്ഞിരുന്ന വിപഞ്ചിക​ വിവാഹമോചന നോട്ടിസ്​ ലഭിച്ചതിനെ പിന്നാലെ​ ആത്​മഹത്യ ചെയ്തത്​. ഭർതൃപീഡനമാണ്​ മകളുടെ മരണത്തിന്​ കാരണമെന്ന്​ കാണിച്ച്​ വിപഞ്ചികയുടെ മാതാവ്​ കുടുംബവും നാട്ടിൽ പരാതി നൽകിയിട്ടുണ്ട്​.

### Related Links & Sources
- [Original Story Source](https://truevisionnews.com/news/302947/the-last-rites-will-be-performed-in-two-places-vipanchika-body-will-be-brought-home-vaibhavi-funeral-will-be-held-in-sharjah)