തിരുവനന്തപുരം: ( www.truevisionnews.com ) നിലമ്പൂര്‍ ഉപതെരഞ്ഞെടുപ്പില്‍ യുഡിഎഫ് സ്ഥാനാര്‍ത്ഥി ആര്യാടന്‍ ഷൗക്കത്ത് വിജയിച്ചതിനുപിന്നാലെ പ്രതികരണവുമായി പൊതുമരാമത്ത് വകുപ്പ് മന്ത്രി പിഎ മുഹമ്മദ് റിയാസ്. നിലമ്പൂരിലെ ജനവിധി മാനിക്കുന്നുവെന്നും തങ്ങള്‍ ഉയര്‍ത്തിയ ശരിയുടെ രാഷ്ട്രീയവും ജനക്ഷേമ പ്രവര്‍ത്തനവും വികസനവും വോട്ടര്‍മാരിലേക്ക് എത്തിക്കാന്‍ എത്രത്തോളം സാധിച്ചുവെന്നത് പരിശോധിക്കുമെന്നും തിരുത്തേണ്ടവ തിരുത്തുമെന്നും മുഹമ്മദ് റിയാസ് പറഞ്ഞു.
ജമാഅത്തെ ഇസ്‌ലാമി എന്ന അപ്പം യുഡിഎഫിന് ഇന്ന് മധുരിക്കും, പക്ഷെ നാളെ തീര്‍ച്ചയായും കയ്ക്കുമെന്നും അദ്ദേഹം പറഞ്ഞു. ഫേസ്ബുക്കിലൂടെയായിരുന്നു മന്ത്രിയുടെ പ്രതികരണം. എല്‍ഡിഎഫിന്റെ തുടര്‍ഭരണം സകല വലതുപക്ഷ ശക്തികളുടെയും ഉറക്കം കെടുത്തിയെന്നത് വസ്തുതയാണെന്നും ഇനി ഒരിക്കല്‍ക്കൂടി അധികാരത്തില്‍ വരാതിരിക്കുന്നത് സ്വപ്‌നത്തില്‍ പോലും ചിന്തിക്കാന്‍ ത്രാണിയില്ലാത്ത സ്ഥിതിയാണ് യുഡിഎഫിന്, അതുകൊണ്ട് എല്ലാ മതവര്‍ഗീയ ശക്തികളുമായും തുറന്ന കൂട്ടുകെട്ടിന് യുഡിഎഫ് മുന്‍കൈ എടുക്കുകയാണെന്നും മുഹമ്മദ് റിയാസ് ആരോപിച്ചു.
.gif)
'മതരാഷ്ട്ര വാദികളായ ജമാഅത്തെ ഇസ്‌ലാമിയെ രണ്ടു കൈയ്യും നീട്ടി യുഡിഎഫ് സ്വീകരിച്ചു. വോട്ടെണ്ണലിന്റെ തലേന്ന് ബിജെപി സ്ഥാനാര്‍ത്ഥി പറഞ്ഞത് ഇടതുപക്ഷം വിജയിക്കാതിരിക്കാന്‍ ബിജെപി വോട്ടുകള്‍ യുഡിഎഫിന് നല്‍കിയെന്നാണ്. 2016-ല്‍ ലഭിച്ചതിനേക്കാള്‍ നാലായിരത്തോളം വോട്ടുകള്‍ ബിജെപിക്ക് കുറവാണ് ലഭിച്ചത്.
ഒന്‍പത് മാസം മാത്രം കാലവധിയുളള ഒരു എംഎല്‍എയെ തെരഞ്ഞെടുക്കേണ്ട ഒരു മണ്ഡലത്തിലെ ഉപതെരഞ്ഞെടുപ്പ് ഫലം., സംസ്ഥാനത്ത് തുടര്‍ഭരണം നടത്തുന്ന സര്‍ക്കാരിനെതിരെയുളള വിധിയെഴുത്താണ് എന്ന് വരുത്തിത്തീര്‍ക്കാന്‍ ആരൊക്കെ ശ്രമിച്ചാലും അത് വസ്തുതയാവില്ല'- പിഎ മുഹമ്മദ് റിയാസ് ഫേസ്ബുക്കില്‍ കുറിച്ചു.
pa muhammed riyas speaks about after nilambur byelection results
