(truevisionnews.com) കേരളത്തിലെ ഉയരം കൂടിയ മലനിരകളിൽ ഒന്നാണ് അഗസ്ത്യാർകൂടം.
കോടമഞ്ഞിന്റെ അർധ സുതാര്യതയിൽ ഒരു ആകാശയാനത്തിൽ നിന്നെന്നപോലെ താഴെയുള്ള കാഴ്ചകളും അതിരുമലയിലെത്തുന്നതിന് ഏറെ ദൂരെനിന്നുതന്നെ സഹ്യാദ്രിയ്ക്കുമേൽ കുടം കമഴ്‌ത്തിയപോലെയുള്ള അഗസ്ത്യാർകൂടത്തിന്റെ കാഴ്ചയും ഏതൊരു സഞ്ചാരിയുടെയും മനസ്സ് കവരും.
നെയ്യാർ, പേപ്പാറ വന്യജീവി സങ്കേതങ്ങൾ, തമിഴ്നാട്ടിലെ കളക്കാട് - മുണ്ടൻതുറ കടുവാ സങ്കേതം എന്നിവയ്ക്ക് മധ്യത്തിൽ പശ്ചിമഘട്ടത്തിലെ മലനിരകളിൽ തെക്കേയറ്റത്തായിയാണ് അഗസ്ത്യാർകൂട വനപ്രദേശം സ്ഥിതി ചെയ്യുന്നത്.
വിവിധങ്ങളായ ഔഷധസസ്യങ്ങൾ, ആരോഗ്യപച്ച, ഡ്യുറി ഓർക്കിഡ്, ചെങ്കുറുഞ്ഞി, കൊണ്ടപ്പന തുടങ്ങിയ തദ്ദേശീയമായ സസ്യങ്ങളുടെയും കലവറയാണ് ഈ വനപ്രദേശം.
നിത്യഹരിതവനം, ഇലകൊഴിയും വനം, പുൽമേട് , ഈറ്റക്കാടുകൾ, ചോല വനം, ഗിരി വനം എന്നിങ്ങനെ വ്യത്യസ്തതകളുള്ള പ്രദേശവുമാണിവിടം.
കടുവ, പുലി, ആന, കാട്ടുപോത്ത്, കരടി, മാനുകൾ വിവിധതരം കുരങ്ങു വർഗങ്ങൾ, മലമുഴക്കി വേഴാമ്പൽ, മാക്കാച്ചിക്കാട എന്നിങ്ങനെയുള്ള അപൂർവയിനം പക്ഷികൾ തുടങ്ങി രാജവെമ്പാല, മലമ്പാമ്പ്, അണലി ഉൾപ്പെടെയുള്ള ഉരഗങ്ങൾ എന്നിങ്ങനെ ധാരാളം വന്യജീവികളുടെ ആവാസ കേന്ദ്രം കൂടിയാണിവിടം.
ഈ വർഷത്തെ അഗസ്ത്യാർകൂടം സീസൺ ട്രക്കിങ് ഇവിടെ പച്ചകത്തിയിരിക്കുകയാണ്.
ജനുവരി 20ന് ആരംഭിച്ച് ഫെബ്രുവരി 22 ന് അവസാനിക്കും.
വനം വകുപ്പിന്റെ www.forest.kerala.gov.in എന്ന വെബ്‌സൈറ്റിൽ serviceonline.gov.in/trekking എന്ന ലിങ്കിൽ ഓൺലൈനായി രജിസ്റ്റർ ചെയ്ത് ടിക്കറ്റ് ബുക്ക് ചെയ്യാം.
അക്ഷയകേന്ദ്രങ്ങൾ മുഖേനയും പൊതുജനങ്ങൾക്ക് ഓൺലൈൻ ടിക്കറ്റ് ബുക്ക് ചെയ്യാം. ട്രക്കിങ്ങിൽ പങ്കെടുക്കുന്ന ഓരോരുത്തരുടെയും തിരിച്ചറിയൽ കാർഡ് നമ്പർ ഓൺലൈൻ അപേക്ഷയിൽ ഉൾപ്പെടുത്തണം.
സന്ദർശകരുടെ സൗകര്യാർഥം ഈ വർഷത്തെ ബുക്കിങ് മൂന്ന് ഘട്ടങ്ങളായാണ് ക്രമീകരിച്ചിരിക്കുന്നത്.
വെബ്‌സൈറ്റിൽ ഉൾപ്പെടുത്തിയിട്ടുള്ള മാർഗനിർദേശങ്ങൾ സന്ദർശകർ കർശനമായും പാലിക്കണം.
20 മുതൽ 31 വരെയുള്ള ട്രക്കിങ്ങിന് എട്ടിനും ഫെബ്രുവരി ഒന്നു മുതൽ 10 വരെയുള്ള ട്രക്കിങ്ങിന് 21നും ഫെബ്രുവരി 11 മുതൽ 22 വരെയുള്ള ട്രക്കിങ്ങിന് ഫെബ്രുവരി മൂന്നിനുമാണ് ടിക്കറ്റ് ബുക്ക് ചെയ്യേണ്ടത്.
#treking #get #ready #Agasthyarkoodam
