കോട്ടക്കല്‍: (truevisionnews.com) രാഹുല്‍ ഗാന്ധി എടപ്പാളിലെ പരിപാടിയില്‍ പങ്കെടുക്കാതെ ഒളിച്ചോടിയത് പച്ചക്കൊടി ഭയന്നാണെന്ന് പൊന്നാനി ലോക്സഭാ മണ്ഡലം എല്‍.ഡി.എഫ് സ്ഥാനാര്‍ത്ഥി കെ.എസ് ഹംസ.
കോട്ടക്കല്‍ നിയമസഭാ മണ്ഡലത്തിലെ കരേക്കാട് ആശാരി കുളമ്പില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം.
വയനാട്ടില്‍ ഉയര്‍ത്തിപ്പിടിക്കാന്‍ കഴിയാത്ത ലീഗിന്റെ കൊടി കെ.സി വേണുഗോപാല്‍ മത്സരിക്കുന്ന ആലപ്പുഴയിലും പാലക്കാട്ടും ഉയര്‍ത്താനാവാത്ത അവസ്ഥയാണ്.
വിവിധ ഘട്ടങ്ങളില്‍ സമുദായത്തെ പണയം വെച്ച ലീഗ് നേതൃത്വം അവസാനം സ്വന്തം കൊടിയും പണയപ്പെടുത്തിയതിലുള്ള പ്രതിഷേധമാണ് സാധാരണക്കാരായ യൂത്ത് ലീഗ് പ്രവര്‍ത്തകര്‍ പ്രകടിപ്പിക്കുന്നത്.
ആത്മാഭിമാനം സംരക്ഷിക്കാനുള്ള യൂത്ത് ലീഗുകാരുടെ പ്രതിഷേധങ്ങള്‍ക്ക് വേണ്ടിവന്നാല്‍ എല്‍.ഡി.എഫ് പരിരക്ഷ നല്‍കും.
മഹാനായ പാണക്കാട് ഹൈദരലി ശിഹാബ് തങ്ങളെ ഇ.ഡിക്കു മുന്നിലേക്ക് തള്ളിവിട്ടത് എം.എല്‍.എ സ്ഥാനം രാജിവെച്ച് എം.പി സ്ഥാനത്തേക്കും എം.പി സ്ഥാനം രാജിവെച്ച് എം.എല്‍.എ സ്ഥാനത്തേക്കും മത്സരിച്ച കുഞ്ഞാലിക്കുട്ടിയോടുള്ള അതൃപ്തി പ്രകടിപ്പിച്ചതിന്റെ പേരിലാണെന്നും കെ.എസ് ഹംസ പറഞ്ഞു.
#Rahul #ranaway #from #event #Edapal #fearing #greenflag - #KSHamsa
