ന്യൂഡല്ഹി: (truevisionnews.com) ഡല്ഹി മദ്യനയക്കേസില് എന്ഫോഴ്സ്മെന്റ് ഡയറക്ടറേറ്ററിന്റെ (ഇ.ഡി.) കസ്റ്റഡിയില് തുടരുന്ന അരവിന്ദ് കെജ്രിവാളിനെ മുഖ്യമന്ത്രി സ്ഥാനത്തുനിന്ന് നീക്കം ചെയ്യണമെന്നാവശ്യപ്പെട്ട് ഡല്ഹി ഹൈക്കോടതിയില് ഹര്ജി.
ഹിന്ദു സേനയാണ് വെള്ളിയാഴ്ച ഹര്ജി സമര്പിച്ചത്. കെജ്രിവാളിനെ മുഖ്യമന്ത്രി സ്ഥാനത്തുനിന്ന് നീക്കാന് ലെഫ്റ്റനന്റ് ഗവര്ണര്ക്ക് നിര്ദേശം നല്കണമെന്നും ഡല്ഹിയുടെ ഭരണം ലെഫ്റ്റനന്റ് ഗവര്ണര്ക്ക് കൈമാറി കേന്ദ്രഭരണം നടപ്പാക്കണമെന്നും ഹിന്ദു സേന അധ്യക്ഷന് വിഷ്ണു ഗുപ്ത ഹര്ജിയില് ആവശ്യപ്പെട്ടു.
കെജ്രിവാളിന്റെ അറസ്റ്റിന് തൊട്ടുപിന്നാലെ സമര്പിക്കപ്പെട്ട സമാനമായ ഹര്ജി വ്യാഴാഴ്ച ഹൈക്കോടതി തള്ളിയിരുന്നു.
കെജ്രിവാളിനെ മുഖ്യമന്ത്രി സ്ഥാനത്തുനിന്ന് നീക്കുന്ന നടപടി ജുഡീഷ്യറിയുടെ ഇടപെടലിന് ഉപരിയാണെന്നും നിയമത്തിന്റെ അടിസ്ഥാനത്തില് സര്ക്കാരിന്റെ മറ്റ് വിഭാഗങ്ങള് (എക്സിക്യൂട്ടീവ്, ലെജിസ്ലേച്ചര്) വിഷയം പരിശോധിക്കണമെന്നും ജസ്റ്റിസ് മന്മീത് പി.എസ്. അറോറ അഭിപ്രായപ്പെട്ടതായി വാര്ത്താഏജന്സിയായ പി.ടി.ഐ. റിപ്പോര്ട്ട് ചെയ്തു.
അറസ്റ്റിലാകുന്നപക്ഷം മുഖ്യമന്ത്രിയ്ക്ക് ജുഡീഷ്യല് കസ്റ്റഡിയിലോ പൊലീസ് കസ്റ്റഡിയിലോ ഇരുന്നുകൊണ്ട് മുഖ്യമന്ത്രിയുടെ ചുമതലകള് നിര്വഹിക്കാമോ എന്ന കാര്യത്തില് ഭരണഘടനയില് വ്യക്തതയില്ലെന്നാണ് ഹിന്ദു സേനയുടെ പൊതുതാത്പര്യഹര്ജിയിലെ വാദം.
കെജ്രിവാള് ഭരണഘടനാപരമായ വിശ്വാസ്യത ലംഘിച്ചതായും അക്കാരണത്താല്ത്തന്നെ അന്വേഷണഏജന്സി കസ്റ്റഡിയിലെടുക്കുന്നതിനുമുമ്പ് തന്നെ കെജ്രിവാള് മുഖ്യമന്ത്രിസ്ഥാനത്തുനിന്ന് രാജിവെക്കണമായിരുന്നുവെന്നും ഹര്ജിയില് പറയുന്നു.
കെജ് രിവാള് മുഖ്യമന്ത്രിയായി തുടരാനും പോലീസ് കസ്റ്റഡിയിലോ ജുഡീഷ്യല് കസ്റ്റഡിയിലോ ഭരണനിര്വഹണം നടത്താനും തീരുമാനിച്ചിരിക്കുകയാണെന്നും കെജ്രിവാളിന്റെ അറസ്റ്റിനുപിന്നില് ഭരണഘടനാപരമായ വിശ്വാസ്യതയുടെ ലംഘനമാണെന്നുള്ള കാര്യം വ്യക്തമായതിനാല് കെജ്രിവാളിനെ മുഖ്യമന്ത്രിസ്ഥാനത്തുനിന്ന് നീക്കാന് ഗവര്ണര് ബാധ്യസ്ഥനാണെന്നും ഹര്ജിയില് പറഞ്ഞിരിക്കുന്നു.
#Kejriwal #removed #from #post #ChiefMinister'; #Hindusena #approached #HighCourt