.jpg)
(truevisionnews.com) നിത്യജീവിതത്തിൽ പല ആരോഗ്യപ്രശ്നങ്ങളും നമ്മെ അലട്ടാം. എന്നാലിവയെല്ലാം നിസാരമായി കണക്കാക്കുന്നത് നല്ലതല്ല. കാരണം എന്തെങ്കിലും അസുഖങ്ങളുടെയോ ഗൗരവതരമായ ആരോഗ്യപ്രശ്നങ്ങളുടെയോ എല്ലാം ലക്ഷണമാകാം ഇങ്ങനെ പ്രകടമാകുന്ന പ്രയാസങ്ങൾ.
ഇത്തരത്തിൽ സ്ത്രീകളിൽ കാണുന്ന ചില ആരോഗ്യപ്രശ്നങ്ങളും അവയ്ക്ക് കാരണമായി വരുന്നൊരു ഘടകവുമാണ് വിശദമാക്കുന്നത്. സ്ത്രീകളിൽ കാണുന്ന മൂഡ് സ്വിംഗ്സ്, തളർച്ച, ശരീരം വല്ലാതെ ചൂടാകുന്ന അവസ്ഥ, രാത്രിയിൽ അമിതമായി വിയർക്കുക എന്നിങ്ങനെയുള്ള പ്രശ്നങ്ങൾക്ക് കാരണമാകുന്നത് മിക്ക കേസുകളിലും ഹോർമോൺ വ്യതിയാനം ആണ്.
ഇത് നിസാരമായി തോന്നാമെങ്കിലും നിത്യജീവിതത്തിൽ വളരെയധികം പ്രതിസന്ധികൾക്ക് കാരണമാകുന്നൊരു പ്രശ്നമാണിത്. പല ഘടകങ്ങളും ഹോർമോൺ വ്യതിയാനങ്ങളിലേക്ക് നയിക്കാം. ആർത്തവത്തോട് അനുബന്ധമായുണ്ടാകുന്ന ഹോർമോൺ വ്യതിയാനങ്ങൾ തന്നെ ചിലരിൽ സങ്കീർണമാകാം.
ഇത് പിഎംഎസ് (പ്രീമെൻസ്ട്രൽ സിൻഡ്രോം)ലേക്ക് നയിക്കാം. മാനസികപ്രയാസങ്ങൾ, ആർത്തവസംബന്ധമായ പ്രശ്നങ്ങൾ എന്നിവയാണിതിൻറെ പരിണിതഫലങ്ങൾ.
ഇതിന് പുറമെ ഗർഭാവസ്ഥയിലും പ്രസവാനന്തരവുമെല്ലാം സ്ത്രീകളിൽ ഹോർമോൺ വ്യതിയാനങ്ങൾ കാണാം. ഇതെല്ലാം സങ്കീർണമാകാനുള്ള സാധ്യതകളുണ്ട്. അതുപോലെ സെക്സ് ഹോർമോണുകളുടെ അസന്തുലിതാവസ്ഥ സൃഷ്ടിക്കുന്ന പിസിഒഎസ് (പോളിസിസ്റ്റിക് ഓവറി സിൻഡ്രോം)ഉം കാര്യമായ ശാരീരിക- മാനസികാരോഗ്യപ്രശ്നങ്ങളാണ് സ്ത്രീകളിൽ സൃഷ്ടിക്കാറ്.
ആർത്തവസംബന്ധമായ അസാധാരണത്വങ്ങളാണ് അധികവും ഹോർമോൺ വ്യതിയാനമുണ്ടാക്കുക. ഇതുതന്നെ സ്ത്രീകളിൽ നിത്യജീവിതത്തിൽ ഏറെ പ്രയാസങ്ങൾ സൃഷ്ടിക്കാം.
ഇതിന് പുറമെ നേരത്തെ സൂചിപ്പിച്ചത് പോലെ മൂഡ് ഡിസോർഡർ (മാനസികാവസ്ഥകൾ പെട്ടെന്ന് മാറിമറിയുന്ന അവസ്ഥ), ഉത്കണ്ഠ, വിഷാദം, എപ്പോഴും തളർച്ച, മുൻകോപം, വന്ധ്യത, ശരീരഭാരം അനിയന്ത്രിതമായി കൂടുക, മുടി കൊഴിച്ചിൽ എന്നിങ്ങനെ പല പ്രശ്നങ്ങൾക്കാണ് കാരണമാവുക. ഹോർമോൺ വ്യതിയാനങ്ങളെ നമുക്ക് പരിപൂര‍ണമായും പരിഹരിക്കുക സാധ്യമല്ല.
അതേസമയം ജീവിതരീതികൾ മെച്ചപ്പെടുത്തുന്നതിലൂടെ ഒരു പരിധി വരെ ഇതിനെ തടയിടാൻ നമുക്ക് കഴിയും. ദിവസവും വ്യായാമം ചെയ്യുക- അല്ലെങ്കിൽ കായികാധ്വാനത്തിലേർപ്പെടുക, ആരോഗ്യകരമായ ഭക്ഷണരീതി പിന്തുടരുക, സമയത്തിന് ഭക്ഷണം കഴിച്ച് ശീലിക്കുക, രാത്രിയിൽ 7-8 മണിക്കൂർ ഉറക്കം ഉറപ്പിക്കുക, സിന്തറ്റിക് ഹോർമോൺ ഉപയോഗം ഒഴിവാക്കുക, മദ്യ- പുകയില തുടങ്ങിയ ലഹരി ഉപയോഗം ഒഴിവാക്കുക, സ്ട്രെസ് മാനേജ് ചെയ്യുക, സന്തോഷമുണ്ടാക്കുന്ന കാര്യങ്ങളിലേർപ്പെടുക തുടങ്ങിയ കാര്യങ്ങളെല്ലാം ഹോർമോൺ വ്യതിയാനം മൂലമുണ്ടാക്കുന്ന പ്രശ്നങ്ങളെ നിയന്ത്രിക്കുന്നതിനും വരുതിയിലാക്കുന്നതിനും ഏറെ സഹായിക്കും.
#women #watch #moodswings #fatigue
