കോഴിക്കോട്: (truevisionnews.com) സ്കൂൾ തുറക്കാൻ ഇനി മൂന്ന് ദിവസം മാത്രമേ ബാക്കിയുള്ളൂ . സ്കൂൾ തുറക്കുമ്പോൾ പുതിയ ബാഗും കുടയും ബോക്സുമെല്ലാം വേണമെന്ന് വാശിപിടിക്കാറുണ്ടോ കുട്ടികളായ നിങ്ങൾ. ഇത്തവണ പഴയ ബാഗും പഠനോപകരണങ്ങളും തന്നെ ഉപയോഗിച്ചാലോ, അതിന് അംഗീകാരം കിട്ടിയാലോ. അതിനുള്ള അവസരം നൽകുകയാണ് ശുചിത്വമിഷനും വിദ്യാഭ്യാസവകുപ്പും. പുനരുപയോഗിക്കുന്നവരാണ് യഥാർഥ ഹീറോ എന്നരീതിയിൽ ‘റീയൂസ് ഹീറോസ് റിയൽ ഹീറോസ്’ കാംപെയ്‌ൻ തുടങ്ങുകയാണിവർ.
പഴയ കുട, ചെരുപ്പ്, വാട്ടർബോട്ടിൽ, ചോറ്റുപാത്രം, ബാഗ് തുടങ്ങിയവയിലേതെങ്കിലും ഒന്നുമായി പുതിയ അധ്യയനവർഷം വിദ്യാലയങ്ങളിലെത്തുന്നവർക്ക് എ പ്ലസ് സാക്ഷ്യപത്രവും അല്ലാത്തവർക്ക് ബി പോസിറ്റീവ് സാക്ഷ്യപത്രവും നൽകും. ഇതിന് പ്രോത്സാഹനം നൽകുന്ന ക്ലാസ് അധ്യാപകർക്കും വിദ്യാലയങ്ങൾക്കും പ്രോത്സാഹന സാക്ഷ്യപത്രവുമുണ്ടാകും.
.gif)
പുതിയ കുപ്പായമോ കുടയോ ഒന്നുമില്ലാത്തത് നാണക്കേടല്ലെന്നും പുനരുപയോഗിക്കുന്നത് അഭിമാനമാണെന്നും കുഞ്ഞുമനസ്സുകളെ പഠിപ്പിക്കുകയാണ് ജില്ലാ ശുചിത്വമിഷൻ കോഡിനേറ്റർ ഇ.ടി. രാകേഷിന്റെ നേതൃത്വത്തിൽ നടപ്പാക്കുന്ന പദ്ധതിയിലൂടെ. വിദ്യാഭ്യാസവകുപ്പ് പ്രഖ്യാപിച്ച രണ്ടാഴ്ചത്തെ വിദ്യാർഥി സൗഹൃദ ബോധവത്കരണ കാംപെയ്‌ന്റെ ഭാഗമായാണ് റീയൂസ് ഹീറോസ് നടപ്പാക്കുന്നത്.
എങ്ങനെ കിട്ടും എ പ്ലസ്
ശുചിത്വമിഷന്റെ ലിങ്കിൽ (https://suchitwamissionkozhikode.in/) പുനരുപയോഗിച്ചതിന്റെ ഫോട്ടോകൾ സഹിതം അപേക്ഷിക്കണം. ഒന്നുമുതൽ 10 വരെയുള്ള എല്ലാ കുട്ടികൾക്കും ഇതിന്റെ ഭാഗമാകാം. വിദ്യാർഥികൾക്കും അധ്യാപകർക്കും രക്ഷിതാക്കൾക്കുമെല്ലാം അപേക്ഷിക്കാം. ജൂൺ രണ്ടുമുതൽ അഞ്ചുവരെയാണ് പദ്ധതി. മികച്ച ചിത്രങ്ങളും വീഡിയോകളും തയ്യാറാക്കി അയക്കുന്ന 10 വീതം വിദ്യാർഥികൾക്കും സ്കൂളുകൾക്കും പ്രത്യേക പ്രോത്സാഹന സമ്മാനങ്ങളുമുണ്ടാകും.
പരിസ്ഥിതിയെ കാക്കാം
'ഉപയോഗം കുറയ്ക്കുക, പുനരുപയോഗിക്കുക, പുനഃചംക്രമണം നടത്തുക... എന്നിങ്ങനെയാവണം ലക്ഷ്യം. പരിസ്ഥിതിസംരക്ഷണമാണ് സാധ്യമാകുന്നത്. പിന്നെയൊന്നുണ്ട്, മഴകനക്കുമ്പോൾ എല്ലാവരും അവധിചോദിക്കില്ലേ. കൂടുതൽ എ പ്ലസ് കിട്ടിയാൽ അവധിയുടെകാര്യത്തിലും ഇത്തിരി ലിബറലാകും.'- സ്നേഹിൽകുമാർ സിങ്, കോഴിക്കോട് കളക്ടർ
Reuse Heroes Real Heroes’ Campaign Cleanliness Mission and Education Department
