കണ്ണൂർ: ( www.truevisionnews.com ) എ.ഡി.എം. കെ.നവീൻ ബാബുവിന്റെ മരണവുമായി ബന്ധപ്പെട്ട് കളക്ടർക്കെതിരേ എ.ഐ.വൈ.എഫിന്റെ പേരിൽ പോസ്റ്റർ.
എ.ഡി.എമ്മിന്റെ ആത്മഹത്യ; കളക്ടറെ പ്രതിചേർക്കുക, കളക്ടറെ പുറത്താക്കുക തുടങ്ങിയ ആവശ്യങ്ങളുന്നയിച്ചാണ് റവന്യൂ വകുപ്പ് കൈകാര്യം ചെയ്യുന്ന സി.പി.ഐ.യുടെ യുവജനവിഭാഗമായ എ.ഐ.വൈ.എഫിന്റെ പേരിൽ സിവിൽസ്റ്റേഷൻ പരിസരത്തുൾപ്പെടെ പോസ്റ്റർ പ്രത്യക്ഷപ്പെട്ടത്.
മന്ത്രി കെ.രാജൻ ഉൾപ്പെടെയുള്ള സി.പി.ഐ. നേതാക്കൾ തുടക്കംമുതൽ കളക്ടർ അരുൺ കെ.വിജയനെ തള്ളുന്ന നിലപാടാണ് സ്വീകരിച്ചത്.
യാത്രയയപ്പിനുശേഷം നവീൻ ബാബു തന്നെ വന്നുകണ്ടുവെന്നും തനിക്ക് തെറ്റുപറ്റിയെന്ന് പറഞ്ഞുവെന്നുമുള്ള കളക്ടറുടെ മൊഴി പുറത്തുവന്നതോടെ പ്രതിഷേധം കടുത്തു.
കളക്ടറെ മാറ്റിനിർത്തി അന്വേഷണം ആവശ്യപ്പെട്ട് പ്രതിപക്ഷം സമരം ശക്തമാക്കുമ്പോഴാണ് ഇതേ ആവശ്യമുന്നയിച്ച്‌ ഭരണകക്ഷി യുവജനസംഘടനയുടെ പോസ്റ്റർ പ്രത്യക്ഷപ്പെട്ടത്.
#ADM #Kannur #Death #KNaveenBabu #AIYF #against #Collector #Poster
