പാമ്പാടി: (truevisionnews.com) ഇവന്റ് മാനേജ്മെന്റിന് സെലിബ്രിറ്റികളെ പരിചയപ്പെടുത്താമെന്ന വ്യാജേന യുവാവിൽനിന്ന് പണം തട്ടിയയാളെ അറസ്റ്റ് ചെയ്തു.
തൃശൂർ പഴയന്നൂർ സ്വദേശി എം. ഹക്കീമാണ് (46) പിടിയിലായത്. കോത്തല സ്വദേശിയായ യുവാവിനാണ് പല തവണയായി 64,000 രൂപ നഷ്ടമായത്.
വാട്സ്ആപ് കാൾ മുഖേനയാണ് ബന്ധപ്പെട്ടത്. സെലിബ്രിറ്റികളെ പരിചയപ്പെടുത്തി നൽകണമെങ്കിൽ പണം വേണമെന്നു പറഞ്ഞാണ് 2023 ജൂൺ മുതൽ പലതവണകളായി യുവാവിൽനിന്ന് ഇയാൾ 64,000 രൂപ വാങ്ങിയത്.
പണം നഷ്ടപ്പെട്ടതിനെത്തുടർന്ന് യുവാവ് പൊലീസിൽ പരാതി നൽകി. പാമ്പാടി പൊലീസ് കേസെടുത്ത് ജില്ല പൊലീസ് മേധാവി കെ. കാർത്തിക്കിന്റെ നേതൃത്വത്തിൽ പ്രത്യേക അന്വേഷണസംഘം രൂപവത്കരിച്ച് നടത്തിയ പരിശോധനയിൽ, ഹക്കീം തട്ടിപ്പിനായി ആരംഭിച്ച അക്കൗണ്ടിലേക്ക് പണം എത്തിയതായി കണ്ടെത്തി.
കോയമ്പത്തൂരിൽനിന്നാണ് പിടികൂടിയത്. ആഡംബര കാറിൽ സഞ്ചരിച്ചുവന്നിരുന്ന ഇയാളെ അതിസാഹസികമായാണ് പിടികൂടിയത്.
11 മൊബൈൽ ഫോൺ, 20 സിംകാർഡ്, 20ൽപരം എ.ടി.എം കാർഡ്, വിവിധ ബാങ്കുകളുടെ പാസ്ബുക്കുകൾ, 115 ഗ്രാം സ്വർണാഭരണം, വിവിധ പേരുകളുള്ള സീലുകൾ, വാഹനങ്ങളുടെ ആർ.സി ബുക്കുകൾ എന്നിവ കണ്ടെടുത്തു. ഇയാളുടെ ആഡംബര കാറിൽ തന്നെയായിരുന്നു താമസിച്ചുവന്നിരുന്നത്. കോടതി ഇയാളെ റിമാൻഡ് ചെയ്തു.
#Extorting #money #claiming #introduce #celebrities #One #person #arrested