( www.truevisionnews.com ) ഉറക്കവും ശാരീരികാരോഗ്യവും തമ്മിൽ അഭേദ്യമായ ബന്ധമാണുള്ളത്. ഉറക്കക്കുറവ് ഹൈപ്പർടെൻഷൻ, ഹൃദ്രോഗം, സ്ട്രോക്ക്, ഡിമെൻഷ്യ തുടങ്ങിയ പലവിധത്തിലുള്ള രോഗങ്ങൾക്കും കാരണമാകാറുണ്ട്.
ശാരീരികാരോഗ്യത്തിന് മാത്രമല്ല മാനസികാരോഗ്യത്തിനും ഉറക്കം പ്രധാനമാണ്. നന്നായി ഉറങ്ങുന്നവരുടെ മാനസികാരോഗ്യവും നന്നായിരിക്കും. ദിവസവും രാത്രി ഒരുമണിക്കുശേഷം ഉറങ്ങുന്നവരാണെങ്കിൽ മാനസികാരോഗ്യം തകരാറിലാകുമെന്നാണ് പുതിയൊരു പഠനം പറയുന്നത്.
ലണ്ടനിലെ ഇംപീരിയൽ കോളേജിലെ ഗവേഷകരാണ് ഇതുസംബന്ധിച്ച പഠനം നടത്തിയിരിക്കുന്നത്. ഉറക്കം എന്നത് മസ്തിഷ്കത്തിന്റെ പ്രവർത്തനത്തിന് അനിവാര്യമായ ഒന്നാണെന്നും അതുവഴി മാനസികാരോഗ്യം മെച്ചപ്പെടുമെന്നും പഠനത്തിൽ പറയുന്നുണ്ട്.
ദിവസവും ഒരുമണിക്ക് മുമ്പും അതിനുശേഷവും ഉറങ്ങുന്നവരുടെ മാനസികാരോഗ്യവിവരങ്ങൾ ശേഖരിച്ചാണ് പഠനം നടത്തിയത്. നേരത്തേ ഉറങ്ങിയവരുടെ മാനസികാരോഗ്യം തൃപ്തികരമായിരുന്നുവെന്നും ഒരുമണിക്കുശേഷം ഉറങ്ങിയവരിൽ നാഡീസംബന്ധമായ തകരാറുകൾ, വിഷാദം, ഉത്കണ്ഠ തുടങ്ങിയ പ്രശ്നങ്ങൾ കൂടുതലാണെന്നും കണ്ടെത്തി.
യു.കെ. ബയോബാങ്കിൽ നിന്നുള്ള 73,888 പേരുടെ ആരോഗ്യവിവരങ്ങൾ ശേഖരിച്ചാണ് പഠനം നടത്തിയത്. എത്രത്തോളം വൈകി ഉറങ്ങുന്നോ അത്രത്തോളം ഉറക്കക്കുറവ് ഗുരുതരമാവുകയും മാനസികാരോഗ്യം മോശമാവുകയും ചെയ്യുമെന്നാണ് പഠനത്തിൽ കണ്ടെത്തിയത്.
നേരത്തേ എഴുന്നേൽക്കേണ്ടി വരുന്നവർ കൂടിയാണെങ്കിൽ വൈകി ഉറങ്ങുന്നത് അവരുടെ ഉത്പാദനശേഷിയേയും ബാധിക്കും. മാത്രമല്ല ഉറക്കത്തിന് സഹായിക്കുന്ന മെലാടോണിൻ എന്ന ഹോർ‍മോണിന്റെ ഉത്പാദനം തടസ്സപ്പെടുകയും ചെയ്യും. സുഖകരമായ ഉറക്കം ഓർമശക്തിയെ മെച്ചപ്പെടുത്തുന്നതിനൊപ്പം പ്രതിരോധശേഷി വർധിപ്പിക്കുകയും ചെയ്യും.
ഉറക്കം കുറയുന്നത് സ്ട്രെസ്സ് ഹോർമോണുകളുടെ ഉത്പാദനം കൂട്ടുകയും ഇതും മാനസികനില തകരാറിലാക്കുകയും ചെയ്യുമെന്നും ഗവേഷകർ പറയുന്നു. ഉത്കണ്ഠ, പാനിക് അറ്റാക്കുകൾ തുടങ്ങിയവയ്ക്കും ഇത് കാരണമാകാം.
#going #bed #past #midnight #could #affect #your #mental #health
