ഹരിപ്പാട്: (truevisionnews.com) കോൺഗ്രസ് പ്രാദേശികനേതാവിനെ കുത്തിപ്പരിക്കേൽപ്പിച്ച കേസിൽ ഡി.വൈ.എഫ്.ഐ. മുൻനേതാവിന് അഞ്ചുവർഷം തടവും 25,000 രൂപ പിഴയും ശിക്ഷ.
കരുവാറ്റ തൈച്ചിറ വീട്ടിൽ കണ്ണനെ (പ്രിൻസ്‌ലാൽ-39) ആണ് ആലപ്പുഴ അഡീഷണൽ ജില്ലാ സെഷൻസ് കോടതി ജഡ്ജി എസ്. ഭാരതി ശിക്ഷിച്ചത്. കോൺഗ്രസ് നേതാവ് കരുവാറ്റ ചങ്ങലേത്ത് വീട്ടിൽ ജയദേവനാണ് കുത്തേറ്റത്.
2015-ൽ തദ്ദേശസ്ഥാപനങ്ങളിലേക്കു നടന്ന തിരഞ്ഞെടുപ്പുമായി ബന്ധപ്പെട്ട തർക്കമാണ് കത്തിക്കുത്തിൽ കലാശിച്ചത്.
കരുവാറ്റ കന്നുകാലിപ്പാലത്തിന് സമീപം 2015 നവംബർ 30-നായിരുന്നു സംഭവം. തലയിലും കൈക്കും കുത്തേറ്റ ജയദേവൻ ഏറെനാൾ ചികിത്സയിലായിരുന്നു.
കണ്ണൻ ഒട്ടേറെ കേസിൽ പ്രതിയാണെന്ന് പോലീസ് പറഞ്ഞു. പ്രോസിക്യൂഷനായി അഡീഷണൽ പബ്ലിക് പ്രോസിക്യൂട്ടർ എസ്.എ. ശ്രീമോൻ ഹാജരായി.
#DYFI #case #stabbing #Congress #leader #Former #leader #sentenced #five #years #prison
