കോഴിക്കോട്: (truevisionnews.com) കോളേജ് യൂണിയൻ തെരഞ്ഞെടുപ്പിൽ കോഴിക്കോട്ടെ വിവിധ കോളേജുകളിൽ സംഘർഷം.
പേരാമ്പ്ര, മൊകേരി, മുച്ച്കുന്ന് ഗവ. കോളേജുകളിൽ വിദ്യാർത്ഥി , യുവജന സംഘടനകൾ തമ്മിൽ സംഘർഷമുണ്ടായി. നിരവധി പേർക്ക് പരിക്കേറ്റു.
മുച്ച്കുന്ന് കോളേജിൽ വോട്ടെണ്ണൽ ആരംഭിച്ചതുമുതൽ വിദ്യാർത്ഥി- യുവജന സംഘടനകൾ തമ്മിൽ വാക്കേറ്റമുണ്ടാവുകയും വൈകീട്ടോടെ വലിയ സംഘർഷത്തിലേക്ക് എത്തുകയുമായിരുന്നു.
മൂന്ന് തവണയാണ് സംഘർഷമുണ്ടായത്. തുടർന്ന് കൊയിലാണ്ടി പൊലീസെത്തി രംഗം ശാന്തമാക്കി. തുടർന്ന് പ്രവർത്തകർ റോഡിൽ കുത്തിയിരുന്ന് പ്രതിഷേധിച്ചു.
യൂത്ത് കോൺഗ്രസ്, കെഎസ്‌യു, യൂത്ത് ലീഗ്- എസ്എഫ്ഐ, ഡിവൈഎഫ്ഐ പ്രവർത്തകർ തമ്മിലാണ് ഇവിടെ സംഘർഷം ഉണ്ടായത്. കോളജിൽ കെഎസ്‌യു ആണ് അധികാരത്തിലെത്തിയത്.
ഇതേ ചൊല്ലിയുള്ള തർക്കമാണ് സംഘർഷത്തിലേക്ക് നയിച്ചത്. സംഘർഷത്തിനു പിന്നാലെ മൊകേരി ഗവൺമെന്റ് കോളേജിൽ കെഎസ്‌യു- എംഎസ്എഫ് വനിതാ പ്രവർത്തകരടക്കമുള്ളവരെ പുറത്തിറങ്ങാൻ അനുവദിക്കുന്നില്ലെന്ന പരാതിയുമായി വിദ്യാർത്ഥികൾ രംഗത്തെത്തി.
ഇതു കൂടാതെ പേരാമ്പ്ര ഗവ. കോളജിലും കെഎസ്‌യു- എസ്എഫ്ഐ സംഘർഷമുണ്ടായി. ഇന്ന് കാലിക്കറ്റ് സർവകലാശാലയിലെ കോളജുകളിൽ യൂണിയൻ തെരഞ്ഞെടുപ്പായിരുന്നു. ഇതുമായി ബന്ധപ്പെട്ടാണ് സംഘർഷമുണ്ടായത്.
#Clashes #various #colleges #Kozhikode #during #college #union #elections.
