പനമരം (വയനാട്): (truevisionnews.com) കൃഷിയിടത്തില്‍ ഇറങ്ങിയ കാട്ടാനയെ തുരത്തുന്നതിനിടെ വീണ് പരിക്കേറ്റ് ചികിത്സയിലായിരുന്ന കര്‍ഷകന്‍ മരിച്ചു.
നടവയല്‍ ചീരവയല്‍ പുലയംപറമ്പില്‍ ബെന്നി (56) ആണ് മരിച്ചത്. കഴിഞ്ഞയാഴ്ച പുലര്‍ച്ചെ ചീരവയലിലെ വീടിന് സമീപത്തെ നെല്‍പാടത്ത് ഇറങ്ങിയ കാട്ടാനയെ തുരത്തുന്നതിനിടെയാണ് ബെന്നിക്ക് പരിക്കേറ്റത്.
കൃഷിയിടത്തില്‍നിന്നും തുരത്താന്‍ ശ്രമിക്കുന്നതിനിടെ കാട്ടാന ബെന്നിക്ക് നേരെ പാഞ്ഞടുക്കുകയായിരുന്നു. ബെന്നി ഓടി രക്ഷപ്പെടാന്‍ ശ്രമിച്ചെങ്കിലും കാട്ടുപന്നികള്‍ കൃഷിയിടത്തിലേക്ക് ഇറങ്ങാതിരിക്കാന്‍ ഒരുക്കിയ കമ്പിയില്‍ തട്ടി തെറിച്ചുവീണു.
അവിടെനിന്നും വീണ്ടും എഴുന്നേറ്റ് ഓടിയാണ് ബെന്നി കാട്ടാനയില്‍നിന്നും രക്ഷപ്പെട്ടത്. കമ്പി കൊണ്ട് ബെന്നിയുടെ കാലിന് സാരമായി മുറിവേറ്റിരുന്നു. ഇതിന്റെ ചികിത്സയുമായി ബന്ധപ്പെട്ട് കോഴിക്കോട്ടെ സ്വകാര്യ ആശുപത്രിയില്‍ കഴിയുകയായിരുന്നു.
വെള്ളിയാഴ്ച ഉച്ചയോടെയാണ് മരിച്ചത്. മുറിവില്‍ നിന്നുണ്ടായ അണുബാധയാണ് മരണകാരണം എന്നാണ് ആശുപത്രിയില്‍നിന്നും ലഭിക്കുന്ന വിവരം.
ഭാര്യ: മോളി (കാക്കവയല്‍ തൊട്ടിത്തറ കുടുംബാംഗമാണ്) മക്കള്‍: അമല, അനില. മരുമക്കള്‍: അജീഷ്, ജെയ്‌സണ്‍. പരേതരായ അലക്‌സിന്റെയും ഏലിയമ്മയുടെയും മകനാണ് ബെന്നി.
സഹോദരങ്ങള്‍: ബിനോയ്, ബിന്ദു. സംസ്‌കാരം ശനിയാഴ്ച രണ്ടിന് നടവയല്‍ ഹോളിക്രോസ് മേജര്‍ ആര്‍ക്കി എപ്പിസ്‌കോപ്പല്‍ ദേവാലയ സെമിത്തേരിയില്‍.
#Wayanad, #farmer #who #undergoing #treatment #died #injured #chasing #antelope
