(truevisionnews.com) നായയെ ഓടിക്കുന്നതിനിടെ ഹോട്ടല്‍ കെട്ടിടത്തിന്റെ മൂന്നാംനിലയില്‍നിന്ന് വീണ് യുവാവിന് ദാരുണാന്ത്യം. ഹൈദരാബാദിലെ പോളിടെക്‌നിക് വിദ്യാര്‍ഥിയായ ഉദയ്കുമാര്‍(24) ആണ് മരിച്ചത്.
ഹൈദരാബാദ് ചന്ദനഗര്‍ വി.വി. പ്രൈഡ് ഹോട്ടലില്‍ ഞായറാഴ്ച രാത്രിയായിരുന്നു സംഭവം. അപകടത്തിന്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.
സുഹൃത്തിന്റെ ജന്മദിനാഘോഷത്തില്‍ പങ്കെടുക്കാനായാണ് ഉദയ്കുമാര്‍ ഹോട്ടലിലെത്തിയത്. മുറിക്ക് പുറത്തിറങ്ങിയ യുവാവ് ഇടനാഴിയില്‍ ഒരു നായയെ കണ്ടതോടെ ഇതിനെ ഓടിക്കാന്‍ ശ്രമിച്ചു.
നായയുടെ പിന്നാലെ ഓടിയ യുവാവ് നായ വലത്തോട്ട് തിരിഞ്ഞതോടെ അതേഭാഗത്തേക്ക് തിരിയാന്‍ ശ്രമിച്ചെങ്കിലും ഓടുന്നതിനിടെ കാല്‍തെന്നി തുറന്നുകിടന്ന ജനലിലൂടെ താഴേക്ക് വീഴുകയായിരുന്നു.
കെട്ടിടത്തിന്റെ മൂന്നാംനിലയില്‍നിന്ന് താഴേക്ക് വീണ യുവാവ് തല്‍ക്ഷണം മരിച്ചെന്നാണ് പോലീസ് അറിയിച്ചത്.
ഗാന്ധി ആശുപത്രിയില്‍ പോസ്റ്റ്‌മോര്‍ട്ടം നടത്തിയശേഷം മൃതദേഹം ബന്ധുക്കള്‍ക്ക് വിട്ടുകൊടുത്തു. സംഭവത്തില്‍ പോലീസ് കേസെടുത്തിട്ടുണ്ട്.
#young #man #met #tragic #end #falling #thirdfloor #hotelbuilding #walking #dog
