( www.truevisionnews.com ) ബഹളമുണ്ടാക്കി പ്രകോപിപ്പിച്ച വിനോദസഞ്ചാരികളെ പുലി ആക്രമിച്ചു. മധ്യപ്രദേശിലെ ഷാഹ്‌ദോല്‍ ഫോറസ്റ്റ് ഡിവിഷനില്‍ ഞായറാഴ്ചയായിരുന്നു സംഭവം.
നദിയുടെ സമീപം കാഴ്ച കാണാനെത്തിയ മൂന്നംഗസംഘം കുറ്റിക്കാടുകള്‍ക്കിടയില്‍ പതുങ്ങിയിരിക്കുകയായിരുന്ന പുലിയെ ബഹളമുണ്ടാക്കി പ്രകോപിപ്പിക്കുകയായിരുന്നു. ഇതിനുപിന്നാലെയാണ് പുലി ആക്രമിച്ചത്. പരിക്കേറ്റ മൂന്നുപേരെയും പിന്നീട് ആശുപത്രിയില്‍ പ്രവേശിപ്പിച്ചു.
സംഭവത്തിന്റെ വീഡിയോദൃശ്യങ്ങള്‍ ഇതിനോടകം സാമൂഹികമാധ്യങ്ങളില്‍ വൈറലായിട്ടുണ്ട്. വിനോദയാത്രസംഘത്തിലെ ഒരാള്‍ തന്നെയാണ് ഈ വീഡിയോ പകര്‍ത്തിയത്.
കുറ്റിക്കാട്ടില്‍ പതുങ്ങിയിരിക്കുകയായിരുന്ന പുലിയെ കണ്ടതോടെ ആജാ ആജാ(വാ വാ) എന്ന് പറഞ്ഞ് ഇവര്‍ ബഹളംവെയ്ക്കുകയും വീഡിയോ പകര്‍ത്തുകയുമായിരുന്നു.
എന്നാല്‍ നിമിഷങ്ങള്‍ക്കുള്ളില്‍ തമാശ അവസാനിച്ചു. അതുവരെ പതുങ്ങിയിരുന്ന പുലി വിനോദസഞ്ചാരികള്‍ക്ക് നേരേ പാഞ്ഞടുത്തു. ഇതോടെ ഇവര്‍ ഓടിരക്ഷപ്പെടാന്‍ ശ്രമിച്ചെങ്കിലും ഒരാളെ പുലി കടിക്കുകയും വലിച്ചിഴക്കുകയുമായിരുന്നു. തൊട്ടുപിന്നാലെ പുലി കാട്ടിലേക്ക് ഓടിമറയുകയുംചെയ്തു.
ഒരു എ.എസ്.ഐ. ഉള്‍പ്പെടെയുള്ളവരാണ് വിനോദയാത്രസംഘത്തിലുണ്ടായിരുന്നതെന്നാണ് റിപ്പോര്‍ട്ട്. ഇതിലുണ്ടായിരുന്ന ഒരു യുവതിയെയാണ് പുലി കടിക്കുകയും വലിച്ചിഴക്കുകയുംചെയ്തത്. പരിക്കേറ്റ മൂവരും നിലവില്‍ ചികിത്സയിലാണെന്നാണ് റിപ്പോര്‍ട്ട്.
#madhyapradesh #shahdol #leopard #attack
