തിരുവനന്തപുരം: ( www.truevisionnews.com )കഴിഞ്ഞ ചൊവ്വാഴ്ച നടന്ന നിയമസഭാ മാര്‍ച്ചിനിടെ അറസ്റ്റിലായ പ്രതിപക്ഷ യുവജന സംഘടന നേതാക്കള്‍ ജയിലില്‍ നിന്നിറങ്ങി.
കോടതി ജാമ്യം അനുവദിച്ചതിന് പിന്നാലെയാണ് യൂത്ത് കോണ്‍ഗ്രസ് സംസ്ഥാന പ്രസിഡന്റ് രാഹുല്‍ മാങ്കൂട്ടത്തില്‍, യൂത്ത് ലീഗ് സംസ്ഥാന പ്രസിഡന്റ് പി കെ ഫിറോസ് എന്നിവരടക്കം 37 പേര്‍ പുറത്തിറങ്ങിയത്.
ഷാഫി പറമ്പില്‍ എംപി ഇവരെ ജയിലിന് പുറത്ത് സ്വീകരിച്ചു. ആര്‍എസ്പി നേതാവ് ഷിബു ബേബി ജോണും ജയില്‍ കവാടത്തില്‍ സ്വീകരിക്കാനെത്തി. പ്രവര്‍ത്തകരുമായി ഒരുമിച്ച് ചിലവഴിക്കാന്‍ സമയം തന്നതിന് പിണറായി വിജയന് നന്ദിയെന്ന് രാഹുല്‍ മാങ്കൂട്ടത്തില്‍ പ്രതികരിച്ചു.
പ്രതിപക്ഷ യുവജന സംഘടനയിലെ പ്രധാനപ്പെട്ട നേതാക്കളെല്ലാം ജയിലിലായി. പ്രതിപക്ഷ യുവജന സംഘടനയിലെ നേതാക്കള്‍ക്ക് തിരുവനന്തപുരത്ത് പ്രവേശനം നല്‍കരുത് എന്നായിരുന്നു സര്‍ക്കാരിന്റെ വാദം.
ഏതൊരുവിധത്തിലും അക്രമം നടത്താത്ത സമരത്തിന് നേരെ സര്‍ക്കാര്‍ അസഹിഷ്ണുത പ്രകടിപ്പിക്കുന്നു. അതിശക്തമായ സമരങ്ങളുമായി ഇനിയും മുന്നോട്ടുവരുമെന്നും രാഹുല്‍ മാങ്കൂട്ടത്തില്‍ കൂട്ടിച്ചേര്‍ത്തു.
പ്രതിപക്ഷ സമരങ്ങളെ അടിച്ചമര്‍ത്താന്‍ പിണറായി വിജയന് പൊലീസിനെ ഉപയോഗിക്കുന്നുവെന്ന് പി കെ ഫിറോസും വിമര്‍ശിച്ചു. സമരങ്ങളെ അടിച്ചമര്‍ത്തിയാലും പിന്നോട്ട് പോകുന്ന പ്രശ്‌നമില്ല. പിണറായി വിജയനെ അധികാര കസേരയില്‍ നിന്ന് പുറത്താക്കുന്നത് വരെ സമരവുമായി മുന്നോട്ടു പോകും.
കള്ളക്കേസ് ചുമത്തി സമരങ്ങളെ അടിച്ചമര്‍ത്തി പ്രശ്‌നങ്ങളെ വഴിതിരിച്ചുവിടുകയാണ്. വരും ദിവസങ്ങളിലും സമരം ശക്തമാക്കി യുഡിഎഫ് മുന്നോട്ടുപോകുമെന്നും പി കെ ഫിറോസ് വ്യക്തമാക്കി. കഴിഞ്ഞ ചൊവ്വാഴ്ചയാണ് പ്രവര്‍ത്തകരെ അറസ്റ്റ് ചെയ്തത്.
ഉപാധികളോടെ തിരുവനന്തപുരം സിജെഎം കോടതിയാണ് ഇന്ന് ജാമ്യം അനുവദിച്ചത്. 50,000 രൂപയുടെ പൊതുമുതല്‍ നശിപ്പിച്ചുവെന്നാണ് ഇവര്‍ക്കെതിരായ പൊലിസ് റിപ്പോര്‍ട്ട്.
പ്രതികള്‍ ഈ പണം കെട്ടിവയ്ക്കണമെന്ന് കോടതി ആവശ്യപ്പെട്ടു. എല്ലാ തിങ്കളാഴ്ചയും അന്വേഷണ ഉദ്യോഗസ്ഥന് മുന്നില്‍ നേരിട്ട് ഹാജരാകണമെന്നും പാസ്‌പോര്‍ട്ട് ഉള്ളവര്‍ മൂന്നു ദിവസത്തിനുള്ളില്‍ കോടതിയില്‍ പാസ്‌പോര്‍ട്ട് ഹാജരാക്കണമെന്നും നിർദേശമുണ്ട്.
#Reception #Rahulmamkootathil #and #PKFeroze #Shafi #reached #prison #gate
.jpeg)
