ഗുരുവായൂർ: (truevisionnews.com) തേങ്ങ പെറുക്കാൻ തോട്ടിലിറങ്ങിയയാളെ കാണാതായി. ഇരിങ്ങപ്പുറം മാണിക്കത്ത് പറമ്പിൽ പീച്ചിലി കുഞ്ഞിക്കണ്ടാരുവിന്റെ മകൻ ബിജുവിനെയാണ് (46) കാണാതായത്.
വെള്ളിയാഴ്ച വൈകീട്ട് മൂന്നോടെയാണ് വീടിനടുത്തുള്ള ചെമ്മണൂർ തോട്ടിൽ ഒഴുകിവരുന്ന തേങ്ങകൾ പെറുക്കാനിറങ്ങിയത്. പത്തു വയസ്സുള്ള മകൻ തൃഷ്ണേന്ദിനോട് പറഞ്ഞാണ് തോട്ടിലേക്ക് പോയത്.
രാത്രിയായിട്ടും തിരിച്ചെത്താതിരുന്നതിനെ തുടർന്ന് ഭാര്യ ഗീതു വാർഡ് കൗൺസിലർ വൈഷ്ണവ് പി. പ്രദീപിനെ വിവരം അറിയിക്കുകയായിരുന്നു.
പൊലീസും അഗ്നിരക്ഷ സേനയും എത്തി തിരച്ചിൽ നടത്തിയെങ്കിലും കണ്ടെത്താനായില്ല. തോട്ടിൽ ശക്തമായ ഒഴുക്കും ഉണ്ടായിരുന്നു. തിരച്ചിൽ രാവിലെ പുനരാരംഭിച്ചിട്ടുണ്ട്.
ചാക്കിൽ നിറച്ചുവെച്ച തേങ്ങകൾ തിരച്ചിലിനിടെ കണ്ടെത്തി. കുന്നംകുളം നഗരസഭയിൽനിന്ന് തുടങ്ങി ഗുരുവായൂർ നഗരസഭ, കണ്ടാണശേരി, എളവള്ളി, മുല്ലശേരി പഞ്ചായത്തുകളിലൂടെ ഒഴുകി പരപ്പുഴയിൽ അവസാനിക്കുന്ന കൊച്ചിൻ ഫ്രോണ്ടിയർ തോടാണ് ചെമ്മണൂർ തോട്.
#man #who #went #creek #collect #coconuts #missing
