തൃശ്ശൂർ:(www.truevisionnews.com) അധികാരം കുറയുകയും ജോലിസമ്മർദം കൂടുകയും ചെയ്തതോടെ എസ്.ഐ. തസ്തികയിൽനിന്ന്‌ പടിയിറങ്ങുന്നവരുടെ എണ്ണം കൂടി.
പി.എസ്.സി. വഴി കിട്ടുന്ന മറ്റെന്തു ജോലിക്കും പോകാമെന്ന തീരുമാനത്തിലാണ് പലരും.
പോലീസിലെത്തന്നെ താഴ്‌ന്ന തസ്തികകളിലേക്ക് മടങ്ങിപ്പോകുന്നവരുമുണ്ട്.
മറ്റു വകുപ്പുകളിലെ ക്ലാർക്ക് ഉൾപ്പെടെയുള്ളവയിലേക്കും ഇവർ പോകുന്നു.
പരിശീലനത്തിനിടെ എസ്.ഐ. തസ്തിക ഒഴിവാക്കി എക്സൈസ് ഇൻസ്പെക്ടറായി 20 പേരാണ് അടുത്തിടെ പോയത്
പരിശീലനം തുടങ്ങി ആറുമാസത്തിനുശേഷമായിരുന്നു കൊഴിഞ്ഞുപോക്ക്.
പോക്സോ കേസ് പോലുള്ളവയിൽ ഇൻസ്പെക്ടറാണ് അന്വേഷണോദ്യോഗസ്ഥനെങ്കിലും എസ്.ഐ.യെ അസിസ്റ്റന്റ് ഇൻവെസ്റ്റിഗേറ്റിങ് ഓഫീസറായി ചുമതലപ്പെടുത്തും.
ഇതോടെ പണി മുഴുവൻ എസ്.ഐ.യുടെ ചുമലിലാകും. രാഷ്ട്രീയമായും മറ്റുമുള്ള സമ്മർദങ്ങളുമുണ്ടാകും.
കൂടാതെ പെറ്റികേസിന്റെയും പട്രോളിങ്ങിന്റെയും പിറകെവരെ ഇവർക്ക് പോകേണ്ടിവരും.
ദിവസം 25 പെറ്റി കേസെങ്കിലും കുറഞ്ഞത് വേണം.
രാവിലെ എട്ടിനോ ഒൻപതിനോ തുടങ്ങുന്ന ജോലി രാത്രി ഒൻപതായാലും തീരാത്ത സ്ഥിതിയാണ്.
അതേസമയം സ്റ്റേഷന്റെ പൂർണചുമതല ഇല്ലാത്തതിനാൽ ജോലിയുടെ തിളക്കം കുറയുകയും ചെയ്തു.
പോലീസിലെ എസ്.ഐ. തസ്തികയ്ക്കു തുല്യമാണ് എക്സൈസ് ഇൻസ്പെക്ടറെന്നതിനാലാണ് ഇവിടേക്ക് നിരവധിപേരെത്തുന്നത്.
ശമ്പളത്തിൽ വലിയ വ്യത്യാസവുമില്ല. പുതിയ എക്സൈസ് ഇൻസ്പെക്ടർ പരിശീലനത്തിന് 50 പേരെയാണ് തിരഞ്ഞെടുത്തത്.
ഇതിലാണ് 20 എസ്.ഐ.മാർ ഉൾപ്പെട്ടിട്ടുള്ളത്. മുന്നൂറിലേറെ പേരുള്ള എസ്.ഐ. ബാച്ചിൽനിന്നാണ് ഇവർ പടിയിറങ്ങിയത്.
പഴയ എസ്.ഐ. തസ്തികപോലെ വിപുലമായ അധികാരങ്ങളുള്ളതാണ് എക്സൈസ് ഇൻസ്പെക്ടർ തസ്തിക.
റേഞ്ചിന്റെ ചുമതലയിലാണ് നിയമനം. നാല് പോലീസ് സ്റ്റേഷൻ പരിധി ചേർന്നതാണ് ഒരു റേഞ്ച്.
#kerala #police #workload #change #other #departments
