സുൽത്താൻ ബത്തേരി: (truevisionnews.com) മതന്യൂനപക്ഷങ്ങൾക്ക് ഭയമില്ലാതെ രാജ്യത്ത് ജീവിക്കാൻ ഇൻഡ്യ മുന്നണി അധികാരത്തിൽ വരണമെന്ന് മുസ്ലിം ലീഗ് അഖിലേന്ത്യ ജനറൽ സെക്രട്ടറി പി.കെ കുഞ്ഞാലിക്കുട്ടി എം.എൽ.എ പറഞ്ഞു.
വയനാട് ലോക്സഭാ മണ്ഡലം യു.ഡി.എഫ് സ്ഥാനാർഥി രാഹുൽ ഗാന്ധിയുടെ തെരഞ്ഞെടുപ്പ് പ്രചാരണ പ്രവർത്തനങ്ങളുടെ ഭാഗമായി സുൽത്താൻ ബത്തേരിയിൽ സംഘടിപ്പിച്ച കുടുംബ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
രാജ്യത്തെ എല്ലാ ജനങ്ങളെയും തുല്യരായി കാണുന്ന ഭരണകൂടത്തിന് മാത്രമേ രാജ്യത്തെ പുരോഗതിയിലേക്ക് നയിക്കാൻ കഴിയുകയുള്ളൂ.
രാഹുൽ ഗാന്ധി വിഭാവനം ചെയ്യുന്ന സാഹോദര്യവും വികസന സങ്കൽപ്പങ്ങളും സമത്വവും ബഹുസ്വരതയും ഇന്ത്യയുടെ ഭാവിയെ കെട്ടിപ്പടുക്കുന്നതിന് വേണ്ടിയുള്ളതാണ്.
അതുകൊണ്ടാണ് മുസ്ലിംലീഗ് അടക്കമുള്ള മതേതര പാർട്ടികൾ രാഹുൽ ഗാന്ധിയെ പിന്തുണയ്ക്കുന്നതെന്നും അദ്ദേഹം പറഞ്ഞു. ടി. മുഹമ്മദ് അധ്യക്ഷനായി.
യൂത്ത് ലീഗ് സംസ്ഥാന പ്രസിഡൻ്റ് പാണക്കാട് സയ്യിദ് മുനവ്വറലി ശിഹാബ് തങ്ങൾ, ട്രഷറർ ഇസ്മായിൽ വയനാട്, യു.ഡി.എഫ് നിയോജക മണ്ഡലം തെരഞ്ഞെടുപ്പ് ജനറൽ കൺവീനർ ഡി.പി രാജശേഖരൻ സംസാരിച്ചു.
#India #Front #should #come #power #minorities #fear - #PK Kunhalikutty