തിരുവനന്തപുരം: ഓൺലൈനിലൂടെ ഓഹരി ഇടപാട് നടത്താമെന്നു വിശ്വസിപ്പിച്ച് വനിതാ ഡോക്ടറിൽനിന്നു വൻ തുക തട്ടി ഓൺലൈൻ തട്ടിപ്പ് സംഘം.
ഒരു മാസംകൊണ്ട് 87 ലക്ഷം രൂപയാണ് തട്ടിയെടുത്തത്. വിദേശത്ത് ഏറെനാൾ ജോലിചെയ്തശേഷം അടുത്തിടെ നാട്ടിലെത്തിയ ഉള്ളൂർ സ്വദേശിനിയായ വനിതാ ഡോക്ടറാണ് തട്ടിപ്പിന് ഇരയായത്.
ഡോക്ടറുടെ പരാതിയിൽ സൈബർ പോലീസ് കേസെടുത്ത് അന്വേഷണം തുടങ്ങി.
ഒരുമാസത്തിനിടെ അഞ്ചുതവണയായാണ് തട്ടിപ്പ് നടത്തിയത്. ഒാരോതവണ പണം വാങ്ങുമ്പോഴും പുതിയ അക്കൗണ്ട് നമ്പരുകൾ അയച്ചു. ഡോക്ടറുമായി വാട്‌സാപ്പ് സന്ദേശങ്ങളിലൂടെ മാത്രമായിരുന്നു സംഘം ബന്ധപ്പെട്ടിരുന്നത്.
പതിവായി ഓൺലൈൻ ട്രേഡിങ്‌ നടത്തുന്ന ഡോക്ടർക്ക് ഒരുമാസം മുൻപ് വാട്‌സാപ്പിൽ ഓൺലൈനിൽ ഓഹരി ഇടപാടിലൂടെ വൻ തുക ലാഭം നേടാമെന്നു കാണിച്ചുകൊണ്ടുള്ള സന്ദേശം എത്തുകയായിരുന്നു.
ഇതിനായി ‘സെറോദ’ എന്ന മൊബൈൽ ആപ്ലിക്കേഷൻ ഡൗൺലോഡ് ചെയ്യാൻ ആവശ്യപ്പെട്ടു. ആപ്പ് ഇൻസ്റ്റാൾ ചെയ്‌ത ശേഷം തട്ടിപ്പുകാർ ആവശ്യപ്പെട്ടതനുസരിച്ച് സെപ്റ്റംബർ 25, 26 തീയതികളിലായി 4.50 ലക്ഷം രൂപ നൽകി.
പിന്നാലെ ഡോക്ടറുടെ അക്കൗണ്ടിൽ ഒരു ലക്ഷം രൂപ ലാഭവിഹിതമായി നൽകി വിശ്വാസം ഉറപ്പിച്ചു. ഇതോടെ സംഘത്തെ വിശ്വസിച്ച് ഡോക്ടർ പലതവണകളായി 87 ലക്ഷം രൂപ നൽകി.
കഴിഞ്ഞമാസം 29-നും ഈമാസം ഒന്നിനുമായി ഒൻപത് ലക്ഷവും എട്ടിന് 10 ലക്ഷം, 17, 18, 19 തീയതികളിൽ 63.73 ലക്ഷം എന്നിങ്ങനെയുമാണ് ഡോക്ടർ തട്ടിപ്പുസംഘത്തിനു നൽകിയത്.
ഇതനുസരിച്ച് വ്യാജ ആപ്പിന്റെ വാലറ്റിൽ ലാഭവിഹിതം കാണിക്കുകയും ചെയ്തു. എന്നാൽ, പണം പിൻവലിക്കാൻ ശ്രമിച്ചപ്പോൾ സാധിച്ചില്ല.
ഇക്കാര്യം പറഞ്ഞ് സന്ദേശമയച്ചപ്പോൾ ഇൻഷുറൻസ് ഇനത്തിലും മറ്റുമായി പണം അടച്ചാലേ തുക പിൻവലിക്കാൻ കഴിയുകയുള്ളൂ എന്നായിരുന്നു മറുപടി.
ലാഭവിഹിതത്തിൽനിന്ന്‌ ഈടാക്കാൻ പറഞ്ഞെങ്കിലും നടന്നില്ല. തുടർന്നാണ് കബളിപ്പിക്കപ്പെട്ടതായി മനസ്സിലായത്. പിന്നാലെ സൈബർ പോലീസിൽ പരാതി നൽകുകയായിരുന്നു.
#Offering #huge #sums #money #through #online #stock #trading #Fraud #87 #lakhs #female #doctor
