എരമംഗലം(മലപ്പുറം): (truevisionnews.com) അടുത്തിടെയായി മാറഞ്ചേരി, എരമംഗലം മേഖലയില്‍ മഴയുള്ള രാത്രികളെ മറയാക്കി മോഷണം നടത്തിയിരുന്ന തമിഴ്നാട് സ്വദേശി പോലീസ് പിടിയിലായി.
തമിഴ്നാട് പാപനാശം സ്വദേശി ബാലചന്ദ്രന്‍ (കണ്ണന്‍-48) ആണ് പെരുമ്പടപ്പ് പോലീസിന്റെ പിടിയിലായത്. എടപ്പാള്‍, പൊറൂക്കര, പെരുമ്പറമ്പ് എന്നിവിടങ്ങളില്‍ നേരത്തെ നടത്തിയ മോഷണവുമായി ബന്ധപ്പെട്ട് പൊന്നാനി പോലീസ് സ്റ്റേഷനിലെ എ.എസ്.ഐ. പ്രവീണ്‍കുമാറും സീനിയര്‍ സിവില്‍ പോലീസ് ഓഫീസര്‍ നാസറും സിവില്‍ പോലീസ് ഓഫീസര്‍ പ്രശാന്ത്കുമാറും നടത്തിയ അന്വേഷണത്തിലാണ് സൈക്കിളില്‍ ചുറ്റി ആളില്ലാവീടുകള്‍ കണ്ടെത്തി മോഷണം നടത്തുന്ന കള്ളനെ പിടികൂടാനായത്.
മാറഞ്ചേരി തട്ടകത്ത് ക്ഷേത്രത്തിലും മാറഞ്ചേരി പരിച്ചകം പൂച്ചത്തേല്‍ മേഖലയിലും എരമംഗലം പെരുമുടിശ്ശേരി മേഖലയിലും ഏഴോളം വീടുകളിലും വീട്ടമ്പലത്തിലും മോഷണം നടത്തിയിരുന്നു.
സൈക്കിളില്‍ ചുറ്റുന്ന മോഷ്ടാവിന്റെ ചിത്രവുമായി പെരുമ്പടപ്പ് പോലീസ് സ്റ്റേഷനിലെ സിവില്‍ പോലീസ് ഓഫീസര്‍ വിഷ്ണു നാരായണന്‍ നവമാധ്യമങ്ങളിലൂടെ നടത്തിയ ശ്രമങ്ങളും മോഷ്ടാവിനെ പിടികൂടുന്നതിന് സഹായകമായി.
നവമാധ്യമത്തില്‍ പ്രചരിക്കുന്ന ചിത്രത്തിലുള്ള ആളുമായി സാമ്യമുള്ള ഒരാള്‍ സൈക്കിളില്‍ എരമംഗലത്തൂടെ പോകുന്നതായി പോലീസിന് വിവരം ലഭിച്ചിരുന്നു. പിന്തുടര്‍ന്ന് സാഹസികമായാണ് പോലീസ് പ്രതിയെ പിടികൂടിയത്.
#manjeri #TamilNadu #native #who #involved #theft #arrested #police.
