തിരുവനന്തപുരം: (truevisionnews.com) കിടപ്പുരോഗിയായ മകളെ കഴുത്തറത്ത് കൊല്ലാന്‍ ശ്രമിച്ചശേഷം അമ്മ ജീവനൊടുക്കിയ സംഭവത്തിന്റെ ഞെട്ടല്‍ മാറാതെ നാട്.
ശനിയാഴ്ച രാവിലെയാണ് നാടിനെ നടുക്കിയ സംഭവം പുറത്തറിയുന്നത്. നെയ്യാറ്റിന്‍കര റെയില്‍വേ പാലത്തിനു സമീപമുള്ള വീട്ടില്‍ താമസിക്കുന്ന ലീല (75) ആണ് മകള്‍ ബിന്ദുവിനെ കഴുത്തറത്ത് കൊലപ്പെടുത്താന്‍ ശ്രമിച്ചതിന് ശേഷം ആത്മഹത്യചെയ്തത്.
മുറിവേറ്റ് ഗുരുതരാവസ്ഥയിലായ ബിന്ദുവിനെ നെയ്യാറ്റിന്‍കരയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ലീലയുടെ മകള്‍ ബിന്ദു പ്രമേഹരോഗിയാണ്.
രോഗബാധിതയായ മകള്‍ അവശനിലയിലായതോടെ അമ്മ കടുത്ത വിഷമത്തിലായിരുന്നുവെന്നാണ് സമീപവാസികള്‍ പറയുന്നത്. ശനിയാഴ്ച രാവിലെ ഇവര്‍ക്കുള്ള ഭക്ഷണവുമായി ബന്ധു വീട്ടിലെത്തിയപ്പോഴാണ് ലീലയുടെ ശരീരം കത്തിക്കരിഞ്ഞനിലയിലും മകള്‍ ബിന്ദുവിനെ കഴുത്ത് മുറിഞ്ഞനിലയിലും കണ്ടെത്തിയത്.
ഉടനെ വാര്‍ഡ് മെമ്പറെ ബന്ധു വിവരമറിയിച്ചു. പോലീസ് സ്ഥലത്തെത്തി ഗുരുതരാവസ്ഥയിലായിരുന്ന മകളെ ഉടന്‍ ആശുപത്രിയിലെത്തിച്ചു. അമ്മയാണ് കഴുത്ത് മുറിച്ചതെന്ന് മകള്‍ മൊഴി നല്‍കിയിട്ടുണ്ട്.
പ്രായമാകുന്നതും താന്‍ മരിച്ചുപോയാല്‍ മകളെ നോക്കാന്‍ ആരുമില്ലെന്നതും ലീലയെ ആശങ്കപ്പെടുത്തിയിരുന്നു. മകള്‍ കൂടുതല്‍ അവശതയിലായതോടെയാണ് ഇവര്‍ മാനസികമായി തളര്‍ന്നത്.
നെയ്യാറ്റിന്‍കര പോലീസ് സ്ഥലത്തെത്തി ഇന്‍ക്വസ്റ്റ് നടപടികള്‍ ആരംഭിച്ചു. ഇന്‍ക്വസ്റ്റിന് ശേഷം മൃതദേഹം പോസ്റ്റുമോര്‍ട്ടത്തിനായി തിരുവനന്തപുരം മെഡിക്കല്‍ കോളജിലേക്ക് മാറ്റും.
(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക. അത്തരം ചിന്തകളുളളപ്പോള്‍ 'ദിശ' ഹെല്‍പ് ലൈനില്‍ വിളിക്കുക. Toll free helpline number: 1056, 0471-2552056)
#mother #commits #suicide #after #attacking #daughter #neyyatinkara
