പോസ്റ്റ്പാര്‍ട്ടം ഡിപ്രഷൻ എന്ന് കേട്ടാല്‍ ഇന്ന് സ്ത്രീകള്‍ക്ക് മാത്രമല്ല, പുരുഷന്മാർക്കും ഇതെന്താണെന്ന് അറിയാം. പ്രത്യേകിച്ച് യുവതലമുറക്ക്. പണ്ടുകാലം മുതല്‍ സ്ത്രീകള്‍ അനുഭവിച്ചുവന്നിരുന്നൊരു പ്രശ്നം തന്നെ. എന്നാല്‍ മുമ്പൊന്നും ഇത് തീരെ ചര്‍ച്ചകളില്‍ വന്നിരുന്നില്ല.അപ്പോഴും ഇത് സ്ത്രീകള്‍ വ്യാപകമായി അനുഭവിച്ചുപോരുന്ന പ്രശ്നമാണ് ഇത് . പ്രസവത്തിന് ശേഷം സ്ത്രീകളിലുണ്ടാകുന്ന ഹോര്‍മോണ്‍ വ്യതിയാനങ്ങള്‍ മൂലം അവരെ ബാധിക്കുന്ന വിഷാദം (ഡിപ്രഷൻ) ആണ് പോസ്റ്റ്പാര്‍ട്ടം ഡിപ്രഷൻ.
പോസ്റ്റ്പാര്‍ട്ടം ഡിപ്രഷൻ ആരെയും പിടികൂടാം എന്നതാണ് സത്യം. വന്നുകഴിഞ്ഞാല്‍ അതിനെ തിരിച്ചറിയുക, ആത്മവിശ്വാസത്തോടെ പൊരുതുക, ഇതിന് പങ്കാളിയടക്കമുള്ള കൂടെയുള്ളവര്‍ പിന്തുണ നല്‍കുക, ആവശ്യമെങ്കില്‍ ഡോക്ടറെ കണ്ട് മരുന്ന് കഴിക്കുക എന്നീ കാര്യങ്ങളാണ് ചെയ്യാനുള്ളത്. ഏഴിലൊരു അമ്മയ്ക്ക് പോസ്റ്റ്പാര്‍ട്ടം ഡിപ്രഷനുണ്ട് എന്നാണ് റിപ്പോര്‍ട്ടുകള്‍ പറയുന്നത്. പോസ്റ്റ്പാര്‍ട്ടം ഡിപ്രഷനുള്ള സ്ത്രീകളെ ഇതിന്‍റെ പേരില്‍ ക്രൂശിക്കുകയും അരുത്.
അവരെ അതില്‍ നിന്ന് പതുക്കെ പിടിച്ചുയര്‍ത്തി എടുക്കാൻ ശ്രമിക്കുകയാണ് മറ്റുള്ളവര്‍ ചെയ്യേണ്ടത്. തുടര്‍ച്ചയായ സങ്കടം, അകാരണമായി കരച്ചില്‍ വന്നുകൊണ്ടേയിരിക്കല്‍, അസ്വസ്ഥത, ഉത്കണ്ഠ, കുറ്റബോധം, അപമാനബോധം, അതിയായ തളര്‍ച്ച, മടുപ്പ്, ഒന്നിലും താല്‍പര്യമില്ലായ്മ, നെഗറ്റീവ് ആയ ചിന്തകള്‍ എന്നിങ്ങനെയുള്ള പ്രശ്നങ്ങളാണ് പോസ്റ്റ്പാര്‍ട്ടം ഡിപ്രഷന്‍റെ ലക്ഷണങ്ങള്‍, അല്ലെങ്കില്‍ പ്രയാസങ്ങള്‍.
ഓരോ സ്ത്രീകളിലും പോസ്റ്റ്പാര്‍ട്ടം ഡിപ്രഷൻ പ്രശ്നങ്ങള്‍ വ്യത്യസ്തമായി കാണാം.ചിലര്‍ എപ്പോഴും കരച്ചിലായിരിക്കും, ചിലര്‍ ദുഖം താങ്ങാൻ ആകാതെ മൗനത്തിലായിപ്പോകാം- പ്രിയപ്പെട്ടവരോട് പോലുമുള്ള സംസാരം കുറയാം. ചിലര്‍ക്ക് ഉറക്കക്കുറവ് ആകാം പ്രശ്നം, അല്ലെങ്കില്‍ ഭക്ഷണം വേണ്ടായ്ക. കുഞ്ഞിനോട് ദേഷ്യം തോന്നുക, കുഞ്ഞിനെ നോക്കാതിരിക്കുക എല്ലാം പോസ്റ്റ്പാര്‍ട്ടം ഡിപ്രഷന്‍റെ വലിയൊരു ലക്ഷണമാണ്. ഇത് ഏറെ കരുതലോടെ വേണം കൈകാര്യം ചെയ്യാൻ.
#Postpartum #depression #Know #more #problem #women #experience
