(truevisionnews.com) 2024ൽ ഭൂമി സൂര്യനോട് ഏറ്റവും അടുത്തെത്തുന്ന ദിവസമാണ് ജനുവരി മൂന്ന്. പെരിഹീലിയൻ ദിനം എന്നാണ് ഇത് അറിയപ്പെടുന്നത്. ഇന്ന് ഭൂമിയും സൂര്യനും തമ്മിലുള്ള അകലം 147 മില്യൺ കിലോമീറ്റർ ആണ്.
പെരിഹീലിയൻ സമയത്ത് സൂര്യപ്രകാശത്തിന് ഏകദേശം 7 ശതമാനം കൂടുതൽ തീവ്രതയുണ്ടെന്ന് ബെർക്ക്‌ലിയിലെ കാലിഫോർണിയ സർവകലാശാലയിലെ ഗവേഷകർ പറഞ്ഞു. ഇന്ന് രാവിലെ 6.08നാണ് ഭൂമി സൂര്യനോട് ഏറ്റവും അടുത്തെത്തിയത്. ഗ്രീക്കിൽ നിന്നാണ് പെരിഹീലിയൻ എന്ന വാക്കുണ്ടായത്.
പെരി എന്നാൽ അരികെ എന്നും ഹീലിയോസ് എന്നാൽ സൂര്യൻ എന്നുമാണ് അർത്ഥം. അതേസമയം ഭൂമി സൂര്യനിൽ നിന്ന് ഏറ്റവും അകലെ നിൽക്കുന്ന അവസ്ഥയ്ക്ക് അഫീലിയൻ എന്നാണ് പറയുക. പെരിഹീലിയനും അഫീലിയനും സംഭവിക്കാൻ കാരണം സൂര്യന് ചുറ്റുമുള്ള ഭൂമിയുടെ ഭ്രമണപഥം ദീർഘവൃത്താകൃതിയിലാണ് എന്നതാണ്.
കെപ്ലറുടെ ഗ്രഹ ചലന നിയമങ്ങൾ ഈ പ്രതിഭാസത്തെ വിശദീകരിക്കുന്നു. പെരിഹീലിയൻ എല്ലാ വർഷവും ഒരേ ദിവസമല്ല സംഭവിക്കുന്നത്.
രണ്ട് വർഷങ്ങളിലെ പെരിഹീലിയന്‌ ദിനം തമ്മിൽ ഒന്നോ രണ്ടോ ദിവസത്തെ വ്യത്യാസം ഉണ്ടാവാറുണ്ട്. അഫീലിയൻ പൊതുവെ ജൂലൈ ആദ്യ വാരമാണ് സംഭവിക്കാറുള്ളത്. ഭൂമിയുടെ സന്തുലിതാവസ്ഥ നിലനിർത്തുന്ന സങ്കീർണമായ പ്രകൃതിദത്ത സംവിധാനങ്ങളുടെ ഭാഗമാണ് പെരിഹീലിയനും അഫീലിയനും.
#perihelion #day #Earth #closest #Sun #today
