മേപ്പാടി: ( www.truevisionnews.com ) നാളുകൾക്കുശേഷം സ്കൂൾമുറ്റത്തെത്തിയപ്പോഴും അവർ നിറഞ്ഞൊന്നു ചിരിച്ചില്ല, ഓടിയെത്തി ചേർന്നുനിന്നില്ല. എല്ലാം ഒരു മന്ദഹാസത്തിലൊതുക്കി. ചിലർ ഒന്നും പറയാതെ തമ്മിൽ കൈകൊടുത്ത് നടന്നുനീങ്ങി.
നിശ്ശബ്ദതമാത്രം നിറഞ്ഞുനിന്നു. ഹിന, ശരൺ, മുഹമ്മദ് നൈഷാൻ... മൂകതയെ മുറിച്ച് മൂന്നു പേരുകൾമാത്രം അവിടെ ഉയർന്നു. പ്രിയപ്പെട്ട സഹപാഠികളുടെ ഓർമ്മയിൽ അവർക്ക് പ്രാർഥനയോടെയും കണ്ണീരോടെയും അന്ത്യാഞ്ജലിയർപ്പിച്ച് മേപ്പാടി ഗവ. ഹയർസെക്കൻഡറി സ്കൂൾ അറിവിന്റെ ലോകത്തേക്ക് തിരികെനടന്നു.
മുണ്ടക്കൈ ഉരുൾപൊട്ടലിനെത്തുടർന്ന് ദുരിതാശ്വാസക്യാമ്പായി പ്രവർത്തിച്ച മേപ്പാടി ജി.എച്ച്.എസ്.എസ്. 28 ദിവസത്തിനുശേഷം തുറന്നപ്പോൾ കാഴ്ചകളൊക്കെയും കണ്ണീരണിഞ്ഞു.
ശരണും നൈഷാനും ഹിനയും ഒപ്പമില്ലെന്ന് ഓർക്കാൻപോലും അവർക്കാവുന്നുണ്ടായിരുന്നില്ല. ഉരുൾപൊട്ടലിൽ വിടപറഞ്ഞവർക്ക് സ്കൂൾമുറ്റത്തുവെച്ചുതന്നെ അധ്യാപകരും കുട്ടികളും പി.ടി.എ. അംഗങ്ങളും ചേർന്ന് ആദരാഞ്ജലിയർപ്പിച്ചു. വിടപറഞ്ഞവരുടെ പേരുപറഞ്ഞപ്പോൾ സഹപാഠികളുടെ മുഖംവാടി. കണ്ണടച്ച് കൈകൂപ്പിനിന്ന് പ്രാർഥിച്ചു.
ശരണിനൊപ്പം ഒരു ബെഞ്ചിലിരുന്ന് പഠിച്ചിരുന്ന റിസ്വാന് അധികനേരമൊന്നും പിടിച്ചുനിൽക്കാനായില്ല. കൂടുതൽ കേൾക്കാനും നിന്നില്ല. അസംബ്ലിയിൽനിന്ന് തിരികെപ്പോന്നു.
സ്റ്റാഫ് റൂമിലെ ബെഞ്ചിൽ തളർന്നിരുന്നു. രാധ ടീച്ചർ അവനെ ചേർത്തുനിർത്തി ആശ്വസിപ്പിച്ചു. സങ്കടംകൊണ്ട്‌ ഒന്നും പറയാനാവാതെ അവൻ വിങ്ങിപ്പൊട്ടി. അതുവരെയുണ്ടായിരുന്ന വെയിൽ മാഞ്ഞ്, നൊമ്പരമെന്നോണം മഴപെയ്തുതുടങ്ങി.
ചൂരൽമലയിലെ അലനും ആദിലും ജിസാനും അലൻ സുനിലുമെല്ലാം ഒരുമിച്ചാണ് സ്കൂളിലെത്തിയത്. “ശരണും നൈഷാനും ഞങ്ങളോടൊപ്പം ഒന്നാംക്ലാസ് മുതലുള്ളതാ. ഞങ്ങളെന്നും ഒരുമിച്ചാണ്.” -അലന് കൂടുതലൊന്നും പറയാൻ സാധിച്ചില്ല.
ദുരന്തമുഖത്തുനിന്ന് രക്ഷപ്പെട്ടെത്തിയതിനാൽ അവർക്കൊന്നും യൂണിഫോം ഉണ്ടായിരുന്നില്ല. ചൂരൽമലയിൽ ഒരുമിച്ചുകഴിഞ്ഞവർ ഇപ്പോൾ പലഭാഗങ്ങളിലുമായി.
“നല്ല സ്നേഹമുള്ള കുട്ടികളായിരുന്നു. ഞങ്ങൾ പഠിപ്പിച്ച കുട്ടികളല്ലേ. ആ മുഖങ്ങൾ മനസ്സിൽനിന്ന് മായില്ലൊരിക്കലും.” -അധ്യാപകർ പറഞ്ഞു. “ദുരിതബാധിതരുടെ കഷ്ടപ്പാടുകളിൽ നമ്മൾ കൂടെനിൽക്കണം. അവർക്ക് തുണയാവണം.” -അനുശോചനയോഗത്തിൽ പ്രിൻസിപ്പൽ ജെസി പെരേര പറഞ്ഞു.
തുടർ‍ന്ന് സംസാരിച്ച പി.ടി.എ. പ്രസിഡന്റ് പി.ടി. മൻസൂർ, എസ്.എം.സി. ചെയർമാൻ ഷംസുദ്ദീൻ അരപ്പറ്റ, പ്രധാനാധ്യാപകൻ പോൾ, എൻ.എസ്.എസ്. കോഡിനേറ്റർ വി.വി. സുരേന്ദ്രൻ തുടങ്ങിയവരും അതിജീവനത്തെക്കുറിച്ച് വിശദീകരിച്ചു.
ക്ലാസ്‌മുറികളിലും മൂകതയായിരുന്നു. പ്ലസ്‍വൺ കംപ്യൂട്ടർ കൊമേഴ്സ് വിദ്യാർഥിയായിരുന്നു ശരൺ. മുഹമ്മദ് നൈഷാൻ കൊമേഴ്സ് വിദ്യാർഥിയും ഹിന പ്ലസ്ടു കംപ്യൂട്ടർ കൊമേഴ്സ് വിദ്യാർഥിയുമായിരുന്നു.
#meppadi #school #reopened #after #wayanad #disaster
