എരമംഗലം (മലപ്പുറം):(truevisionnews.com) 'കടന്നുവരൂ.. കടന്നുവരൂ.. ആദായ ഓട്ടം.. ലോക്കൽ വെറും 30 രൂപ, അയ്യോട്ടിച്ചിറ 50 രൂപ, പരിചയക്കാർക്ക് 40 രൂപ, ചങ്ങായിമാർക്ക് വെറും 30 രൂപയ്ക്ക് ഓടിക്കൊടുക്കുന്നതാണ്..
ഒരുദിവസം രണ്ടുലോക്കൽ വിളിച്ചാൽ ഒരു ലോക്കൽ ഫ്രീ...' കേൾക്കുമ്പോൾ ഏതെങ്കിലും തെരുവുക്കച്ചവടക്കാരുടെ അനൗൺസ്‌മെന്റാണെന്ന് തോന്നിയെങ്കിൽ തെറ്റി.
ജീവിതത്തിന്റെ രണ്ടറ്റം കൂട്ടിമുട്ടിക്കാനുള്ള ഒരു ഓട്ടോ ഡ്രൈവറുടെ പെടാപ്പാടാണിത്. ഓട്ടോഡ്രൈവറായ വെളിയങ്കോട് സ്വദേശി ഏറമ്പത്തേൽ ഷാഫിയുടെ അനൗൺസ്മെന്റ് ഇപ്പോൾ വൈറലാണ്.
വെളിയങ്കോട് അങ്ങാടിയിലെ ഓട്ടോ സ്റ്റാൻഡിലൂടെ യാത്രചെയ്‌ത ഏതൊരാളും ഇങ്ങയൊരു അനൗൺസ്മെന്റ് കേൾക്കാതെപോകില്ല. റോഡുകളെല്ലാം കുഴികൾ നിറഞ്ഞു തകർന്നതും ഓട്ടം കുറഞ്ഞതുമാണ് യാത്രക്കാരെ ആകർഷിക്കുന്നതിനായി ഷാഫിയെ സ്വന്തം അനൗൺസ്‌മെന്റുമായി റോഡിലേക്കിറങ്ങാൻ പ്രേരിപ്പിച്ചത്.
ഓട്ടോയിൽ ചെറിയൊരു സ്‌പീക്കർ സ്ഥാപിച്ച് മൊബൈലിൽ റെക്കോർഡ് ചെയ്‌ത തന്റെ അനൗൺസ്മെന്റ് വെളിയങ്കോട് അങ്ങാടിയിലെ ഓട്ടോ സ്റ്റാൻഡിൽ എത്തിയാൽ പ്ളേ ചെയ്യുന്നതാണ് പതിവ്.
യാത്രക്കാരെ ആകർഷിക്കുന്നതിനായുള്ള ഷാഫിയുടെ അനൗൺസ്‌മെന്റിൽ കൗതുകം തോന്നിയ സുഹൃത്ത് തന്നെയാണ് വീഡിയോയെടുത്ത് സാമൂഹികമാധ്യമത്തിൽ പങ്കുവെച്ചത്.
ഓട്ടം കുറഞ്ഞപ്പോഴുണ്ടായ കഷ്ടപ്പാടുകൊണ്ട് മാത്രമാണ് ഇങ്ങനെയൊരു അനൗൺസ്മെന്റ് മനസ്സിൽവന്നതെന്നും ഷാഫി പറഞ്ഞു.
#viral #autodriver #malappuram
