അങ്കമാലി: (truevisionnews.com) അങ്കമാലി നഗരസഭാ കാര്യാലയത്തില് ബോംബ് വെച്ചിട്ടുണ്ടെന്നുള്ള ഫോണ് സന്ദേശം പരിഭ്രാന്തി പരത്തി. ചൊവ്വാഴ്ച രാവിലെ 11.45-ന് അങ്കമാലി പോലീസ് സ്റ്റേഷനിലേയ്ക്കാണ് നഗരസഭാ കാര്യാലയത്തില് ബോംബ് വെച്ചിട്ടുണ്ടെന്നുള്ള ഫോണ് സന്ദേശം എത്തിയത്.
അഞ്ച് നാടന് ബോംബുകള് നഗരസഭയില് വെച്ചിട്ടുണ്ടെന്നും അതിനോടുചേര്ന്ന് കത്തിച്ചുവെച്ചിട്ടുള്ള ചന്ദനത്തിരി കത്തിത്തീരും മുന്പ് ബോംബുകള് പൊട്ടുമെന്നുമായിരുന്നു ഭീഷണി.
സന്ദേശം ലഭിച്ചയുടന് പോലീസ് എത്തി നഗരസഭയിലുണ്ടായിരുന്നവരെയെല്ലാം ഒഴിപ്പിച്ചു. വിവരമറിയിച്ചതിനെ തുടര്ന്ന് ബോംബ് സ്ക്വാഡും ഡോഗ് സ്ക്വാഡും നഗരസഭയിലെത്തി പരിശോധന നടത്തി.
നാലുനില കെട്ടിടം മുഴുവന് അരിച്ചുപെറുക്കിയെങ്കിലും സംശയാസ്പദമായി ഒന്നും കണ്ടെത്താനായില്ല. ഒരുമണിക്കൂര് പരിശോധന നീണ്ടു. ഉച്ചയ്ക്കുശേഷം ഒന്നരയോടെ ജീവനക്കാരെയും വിവിധ ആവശ്യങ്ങള്ക്കായി എത്തിയവരെയും നഗരസഭയുടെ ഉള്ളില് കയറാന് അനുവദിച്ചു.
നഗരഭയില് തയ്യല് പരിശീലനത്തിനായി വനിതകള് എത്തിയിരുന്നു. ബോംബ് ഭീഷണി ഉണ്ടായതോടെ ഇവരുള്പ്പെടെ നഗരസഭയില് ഉണ്ടായിരുന്നവരെല്ലാം പരിഭ്രാന്തരായി. വിവരമറിഞ്ഞ് ആളുകളും നഗരസഭയിലേക്ക് ഓടിയെത്തി.
നഗരസഭയില് ഉണ്ടായിരുന്ന വാഹനങ്ങളും നഗരസഭാ പരിസരവുമെല്ലാം പരിശോധിച്ചശേഷമാണ് ബോംബില്ലെന്ന് ഉറപ്പുവരുത്തിയത്. ഇരിങ്ങാലക്കുട സ്വദേശി സോനു ജോണ്സണ് ആണ് ഫോണ് സന്ദേശം നല്കിയിരിക്കുന്നതെന്ന് പോലീസ് കണ്ടെത്തി.
ഇയാളുടെ പേരില് കേസെടുത്തിട്ടുണ്ടെന്ന് അങ്കമാലി സ്റ്റേഷന് ഓഫീസര് പി. ലാല്കുമാര് അറിയിച്ചു. സോനു ജോണ്സണ് ഒരുവര്ഷമായി കാനഡയിലാണുള്ളത്.
ഇയാള് കാനഡയില് നിന്നുമാണ് അങ്കമാലി സ്റ്റേഷനിലേക്ക് വിളിച്ചിരിക്കുന്നത്. ഇന്റര്നെറ്റ് മുഖേനയാണ് ഫോണ് സന്ദേശം നല്കിയിരിക്കുന്നത്.
ഇയാള് മുന്പ് ഇരിങ്ങാലക്കുട ഫയര് സ്റ്റേഷനിലേക്കും വ്യാജ ഫോണ് സന്ദേശം അയച്ചിട്ടുള്ളതായി പോലീസ് പറഞ്ഞു. ഇയാളുടെ ഫോണ്കോള് വിവരങ്ങള് പോലീസ് ശേഖരിക്കുന്നുണ്ട്.
#phone #message #bomb #placed #Angamali #Municipal #Corporation #office #created #panic.