പത്തനംതിട്ട: (truevisionnews.com) ശബരിമലയിൽ തീർത്ഥാടകരുടെ എണ്ണത്തിൽ കുറവ്. മണ്ഡല ഉത്സവകാലത്തെ ഏറ്റവും കുറവ് തിരക്കാണ് ഇന്നുള്ളത്. എഴുപതിനായിരം പേർ വെർച്ചൽ ക്യൂ വഴി ബുക്ക് ചെയ്തെങ്കിലും ഇന്നലെ രാത്രി 12 മുതൽ ഇന്ന് ഉച്ചക്ക് 12 മണി വരെ ശബരിമലയിലേക്ക് എത്തിയത് 40,000 പേർ മാത്രമാണ്.
9 വരികളിലുള്ള വലിയ നടപ്പന്തലിൽ ക്യൂ ഉള്ളത് ഒരു വരിയിൽ മാത്രമാണ്. സന്നിധാനത്തും പമ്പയിലും പെയ്യുന്ന ചാറ്റൽ മഴ തീർഥാടക പ്രവാഹം കുറയാൻ കാരണമെന്നാണ് കരുതുന്നത്. സന്നിധാനത്തും പമ്പയിലും ചെറിയ ചാറ്റൽ മഴ പെയ്യുന്നുണ്ട്.
എരുമേലിയിൽ നിന്നുള്ള പാതയിലും ചെറിയ തോതിൽ മഴ പെയ്യുന്നു. കാലാവസ്ഥ അനുകൂലമല്ലാത്തതിനാലായിരിക്കാം തീർഥാടകരുടെ എണ്ണത്തിൽ കുറവുണ്ടായതെന്നാണ് വിലയിരുത്തൽ. മണ്ഡലപൂജ അടുക്കുന്നതോടുകൂടി തിരക്ക് വർദ്ധിക്കാൻ സാധ്യതയുണ്ടെന്നാണ് ദേവസ്വം ബോർഡിന്റെ നിഗമനം.
ശബരിമലയിലെ തീർത്ഥാടകരുടെ എണ്ണത്തിലും വരുമാനത്തിലും വലിയ ഇടിവ് സംഭവിച്ചതായി ദിവസം ബോർഡ് കഴിഞ്ഞ ദിവസം അറിയിച്ചിരുന്നു. 28 ദിവസത്തെ കണക്ക് പരിശോധിക്കുമ്പോൾ ഈ വർഷം ഒന്നര ലക്ഷം തീർത്ഥാടകർ കുറവാണ്.
ഈ വർഷം ആകെ വരുമാനം 134.44 കോടിയാണെങ്കിൽ 2022 ൽ ഇത് 154.77 കോടിയായിരുന്നു. അരവണ വരുമാനത്തിലും കുറവുണ്ട്. ഈ വർഷം അരവണയിലൂടെ ലഭിച്ചത് 61.91 കോടിയാണെങ്കിൽ 2022 ൽ ഇത് 73.75 കോടിയാണ്.
11 കോടിയുടെ കുറവാണുള്ളത്. അപ്പം വിൽപനയിലൂടെ 8.99 കോടിയാണ് 28 ദിവസത്തിൽ ലഭിച്ചതെങ്കിൽ 2022ൽ ഇത് 9.43കോടി രൂപയായിരുന്നു. 44 ലക്ഷത്തിന്റെ കുറവാണുള്ളത്. ഈ വർഷത്തെ കാണിക്ക വരുമാനം 41.8 കോടി രൂപയാണെങ്കിൽ 2022ൽ കാണിക്ക വരുമാനം 46.45 കോടി രൂപയാണ്. 4.65 കോടി രൂപയുടെ കുറവുണ്ടായി.
#Decline #number #pilgrims #Sabarimala #huge #drop #revenue
