കൊച്ചി: (www.truevisionnews.com) ..‘എനിക്കുള്ള 25,000 എപ്പോൾ കിട്ടും’ എന്ന തലക്കെട്ടോടുകൂടി പോസ്റ്റ് ചെയ്ത വീഡിയോയ്ക്കുള്ള പാരിതോഷികം ഒടുവിൽ എം.ബി. നസീമിന്‍റെ അക്കൗണ്ടിലേക്ക് എത്തി. 25,000 അല്ലെങ്കിലും സംഖ്യയിലെ പൂജ്യം ഒന്ന് കുറഞ്ഞ് 2,500 രൂപയാണ് നസീമിന് ലഭിച്ചത്. ഗായകൻ എംജി. ശ്രീകുമാറിന്റെ വീട്ടിൽനിന്ന് മാലിന്യം വലിച്ചെറിയുന്ന വീഡിയോദ്യശ്യം പകർത്തി പരാതി നൽകിയതിനുള്ള പാരിതോഷികമാണ് ലഭിച്ചത്.
മുളവുകാട് പഞ്ചായത്തിന്റെ എസ്ബിഐ അക്കൗണ്ടിൽനിന്നും വെള്ളിയാഴ്ചയാണ് നസീമിന് 2,500 രൂപ ലഭിച്ചത്. ഈടാക്കുന്ന പിഴത്തുകയുടെ 25 ശതമാനം അല്ലെങ്കിൽ പരമാവധി 2,500 രൂപയാണ് സംഭവം റിപ്പോർട്ട് ചെയ്യുന്നവർക്ക് ലഭിക്കുക.
ആറുമാസം മുൻപ് തിരുവനന്തപുരം സ്വദേശിയായ എൻ.പി. നസീം വേമ്പനാട്ടുകായലിലൂടെ ബോട്ടിൽ സഞ്ചരിക്കുമ്പോൾ പകർത്തിയ വീഡിയോയാണ് മാർച്ച് 27-ന് ഇൻസ്റ്റഗ്രാമിൽ പോസ്റ്റ് ചെയ്തത്. വീഡിയോയിൽ മന്ത്രി എം.ബി. രാജേഷിനെ ടാഗ് ചെയ്യുകയും ചെയ്തിരുന്നു. തുടർന്ന് മന്ത്രിയുടെ നിർദേശപ്രകാരം മുളവ്കാട് പഞ്ചായത്ത് അധിക്യതർ നടത്തിയ പരിശോധനയിലാണ് സംഭവം നടന്നതാണെന്ന് ബോധ്യപ്പെട്ടത്.
അന്നുതന്നെ വീട്ടുടമയായ എം.ജി. ശ്രീകുമാറിന് 25,000 രൂപ പിഴചുമത്തി നോട്ടീസ് നൽകിയതായി മന്ത്രി പോസ്റ്റിനുതാഴെ മറുപടിയിൽ അറിയിക്കുകയും ചെയ്തു. പൊതുസ്ഥലത്ത് മാലിന്യം വലിച്ചെറിയുന്നതുമായി ബന്ധപ്പെട്ട് പരാതികൾ അറിയിക്കുന്നതിനുള്ള വാട്‌സാപ്പ് നമ്പറിനെ പറ്റിയും പാരിതോഷികത്തെക്കുറിച്ചും ഒരു അഭിമുഖത്തിനിടെ മന്ത്രി എം.ബി. രാജേഷ് കഴിഞ്ഞ ആഴ്ച പറഞ്ഞിരുന്നു. അതോടെയാണ് വീഡിയോ സാമൂഹികമാധ്യമത്തിൽ പോസ്റ്റ് ചെയ്യാൻ കാരണമായതെന്നും നസീം പറഞ്ഞു.
#MGSreekumar #garbage #controversy #Reward #youth #recorded #video
