കരുനാഗപ്പള്ളി (കൊല്ലം): (truevisionnews.com) തിരുവനന്തപുരം മെഡിക്കൽ കോളേജിലെ സീനിയർ നഴ്സിങ് ഓഫീസറെ കരുനാഗപ്പള്ളിയിലെ സ്വകാര്യ ലോഡ്ജിൽ മരിച്ചനിലയിൽ കണ്ടെത്തി.
മലയിൻകീഴ് വിളവൂർക്കൽ കുണ്ടമൺഭാഗം ശങ്കരൻ നായർ റോഡ് സായിറാമിൽ ബിജുകുമാർ (51) ആണ് മരിച്ചത്. കഴിഞ്ഞദിവസം ഉച്ചയോടെയാണ് ബിജുകുമാർ ലോഡ്ജിൽ മുറിയെടുത്തത്.
ബുധനാഴ്ച ഉച്ചകഴിഞ്ഞും കാണാത്തതിനെ തുടർന്ന് ലോഡ്ജിലെ ജീവനക്കാർ അന്വേഷിച്ച് ചെന്നപ്പോഴാണ് മുറിയിൽ മരിച്ചുകിടക്കുന്നതായി കണ്ടത്. തിങ്കളാഴ്ചമുതൽ ബിജുകുമാറിനെ കാണാനില്ലായിരുന്നു.
ഇതുസംബന്ധിച്ച് ബന്ധുക്കൾ മലയിൻകീഴ് പോലീസിൽ പരാതിയും നൽകിയിരുന്നു. തിങ്കളാഴ്ച രാവിലെ വീട്ടിൽനിന്നു ജോലിക്ക് പോയെങ്കിലും ഡ്യൂട്ടിയിൽ പ്രവേശിച്ചിരുന്നില്ല.
വൈകീട്ട് വീട്ടുകാർ മൊബൈലിൽ ബന്ധപ്പെടാൻ ശ്രമിച്ചപ്പോഴാണ് ഫോൺ കൊണ്ടുപോയിട്ടില്ലെന്ന് അറിയുന്നത്. വീട്ടുകാർ നൽകിയ പരാതിയുടെ അടിസ്ഥാനത്തിൽ പോലീസ് അന്വേഷണം നടത്തിവരുന്നതിനിടെയാണ് ലോഡ്ജിൽ മരിച്ചനിലയിൽ കണ്ടെത്തുന്നത്.
സംഭവത്തെക്കുറിച്ച് കൂടുതൽ അന്വേഷിച്ചുവരികയാണെന്ന് കരുനാഗപ്പള്ളി പോലീസ് അറിയിച്ചു.
ഭാര്യ: ശാലിനി (ഹെഡ് നഴ്സ്, തിരുവനന്തപുരം മെഡിക്കൽ കോളേജ്). മക്കൾ: രാഹുൽ, വന്ദന. കരുനാഗപ്പള്ളി പോലീസെത്തി പ്രാഥമിക നടപടികൾ സ്വീകരിച്ചു.
#Dead #MedicalCollegeNursingOfficer #Lodge; #Allegation #pressure #left #organization #employees