മാനന്തവാടി: (truevisionnews.com) വയനാട് ലോക്സഭാ മണ്ഡലം യു.ഡി.എഫ് സ്ഥാനാർഥി രാഹുൽ ഗാന്ധിക്ക് വേണ്ടി വോട്ടഭ്യർഥിച്ച് പരിസ്ഥിതി പ്രവർത്തകൻ സി.ആർ നീലകണ്ഠൻ.
മാനന്തവാടി ടൗണിലെ നരിപ്പള്ളി കോളനിയിൽ നടന്ന യു.ഡി.എഫ് കുടുംബ സംഗമം അദ്ദേഹം ഉദ്ഘാടനം ചെയ്തു. വൈരുധ്യങ്ങളുടെയും ബഹുസ്വരതയുടെയും നാടായ ഇന്ത്യയെ ശിഥിലമാക്കുന്ന നിലപാടാണ് നരേന്ദ്രമോദി സർക്കാറും അതിനെ നിയന്ത്രിക്കുന്ന ആർ.എസ്.എസും സ്വീകരിക്കുന്നതെന്ന് അദ്ദേഹം പറഞ്ഞു.
അതിനിർണായകമായ തെരഞ്ഞെടുപ്പിലേക്കാണ് രാജ്യം പോകുന്നത്. വർഗീയ ഫാസിസ്റ്റ് നടപടികളിലൂടെ രാജ്യത്തെ ധ്രുവീകരണത്തിലേക്കും സ്വേച്ഛാധിപത്യത്തിലേക്കും തള്ളിവിട്ട നരേന്ദ്രമോദി സർക്കാറിനെ പുറന്തള്ളണം.
അതുവഴി ഇന്ത്യയുടെ ഭാവിയെ സുരക്ഷിതമാക്കുക എന്ന ലക്ഷ്യമാണ് ജനാധിപത്യ വിശ്വാസികൾ കൈക്കൊള്ളേണ്ടത്. ആദിവാസികൾക്കും ദളിതർക്കും വേണ്ടി പ്രവർത്തിച്ച ഫാദർ സ്റ്റാൻ സ്വാമി ജയിലിൽ കിടന്ന് ദാരുണമായാണ് മരണപ്പെട്ടത്.
എല്ലാ മനുഷ്യാവകാശങ്ങളും അദ്ദേഹത്തിന് ഭരണകൂടം നിഷേധിച്ചു. ജനാധിപത്യത്തിനും മതേതരത്വത്തിനും അവകാശങ്ങൾക്കും വേണ്ടി നിലകൊള്ളുന്നവരെ തുറുങ്കിലടയ്ക്കുകയാണ് നരേന്ദ്രമോദി സർക്കാർ ചെയ്യുന്നതെന്നും അദ്ദേഹം പറഞ്ഞു.
അഡ്വ. എൻ.കെ വർഗീസ്, പി.വി ജോർജ്, അഡ്വ. സിന്ധു സെബാസ്റ്റ്യൻ, രേഖ രാജീവൻ, ദീപ സംസാരിച്ചു.
#Environmental #activist #CRNeelakandan #solicits #votes #RahulGandhi