ന്യൂഡല്‍ഹി : കഴിഞ്ഞ ഒന്നര വര്‍ഷമായി ഇന്ത്യന്‍ ടീമില്‍ കളിക്കാത്ത ധോണിയെ എന്തടിസ്ഥാനത്തിലാണ് ടീമിലെടുക്കുകയെന്ന് മുന്‍ ഇന്ത്യന്‍ താരവും എം.പിയുമായ ഗൗതം ഗംഭീര്‍. സ്റ്റാര്‍ സ്പോര്‍ട്സിെന്‍റ ക്രിക്കറ്റ് കണക്ടഡ് എന്ന ചാറ്റ്ഷോയില്‍ പങ്കെടുത്ത് സംസാരിക്കുകയായിരുന്നു ഗംഭീര്‍.
ഇത്തവണ ഐ.പി.എല്‍ നടന്നില്ലെങ്കില്‍ ധോണിയുടെ തിരിച്ചുവരവ് ബുദ്ധിമുട്ടാകും. ഒക്ടോബറില്‍ നടക്കാനിരിക്കുന്ന ടി20 ലോകകപ്പിലൂടെ തിരിച്ചെത്തണമെങ്കില്‍ ധോണിക്ക് ഐ.പി.എല്‍ അല്ലാതെ മറ്റൊരു വഴിയില്ലെന്നും അദ്ദേഹം അഭിപ്രായപ്പെട്ടു.
ടീമിലെടുക്കണമെങ്കില്‍ ധോണി ഫോം തെളിയിക്കേണ്ടതുണ്ട്. കഴിഞ്ഞ ഒന്നര വര്‍ഷത്തോളമായി ഇന്ത്യന്‍ ടീമില്‍ കളിച്ചിട്ടില്ലാത്ത ധോണിയെ എന്തടിസ്ഥാനത്തിലാണ് ടീമിലേക്ക് തിരികെ വിളിക്കുക ? ഇന്ത്യന്‍ ടീമിനെ പ്രതിനിധീകരിക്കാനാണെങ്കില്‍ ടീമിനായി വിജയം സമ്മാനിക്കാന്‍ കഴിയുന്നവരെയും മികച്ച പ്രകടനം പുറത്തെടുക്കുന്നവരെയുമാണ് പരിഗണിക്കേണ്ടത്. -ഗംഭീര്‍ പറഞ്ഞു.
ഇന്ത്യന്‍ ടീമിലേക്ക് ധോണിക്കൊരു പകരക്കാരനെയും ഗംഭീര്‍ കണ്ടെത്തിയിട്ടുണ്ട്. ധോണിയുടെ മടങ്ങിവരവ് നടന്നില്ലെങ്കില്‍ കെ.എല്‍. രാഹുല്‍ ആണ് യഥാര്‍ഥ പകരക്കാരന്‍. വിക്കറ്റ് കീപ്പറായും ബാറ്റ്‌സ്മാനായും തിളങ്ങാന്‍ കഴിയുമെന്ന് രാഹുല്‍ ഇപ്പോള്‍ തെളിയിച്ചുകഴിഞ്ഞു.
ചുരുങ്ങിയ ഒാവര്‍ മത്സരങ്ങളില്‍ രാഹുലിെന്‍റ കീപ്പിങ്ങും ബാറ്റിങ്ങും തുടക്കം മുതലേ ശ്രദ്ധിക്കാറുണ്ട്. വിക്കറ്റ് കീപ്പിങ്ങില്‍ ധോണിയുടെ മികവ് കാട്ടാന്‍ ചിലപ്പോള്‍ അവന് കഴിഞ്ഞെന്ന് വരില്ല.
എന്നാല്‍, ടി20 ലോകകപ്പില്‍ രാഹുലിനെ ടീമിലുള്‍പ്പെടുത്തുന്നതായിരിക്കും ഏറ്റവും ഉചിതം. മൂന്നാമനായോ നാലാമനായോ ബാറ്റ് ചെയ്യാനും വിക്കറ്റ് കീപ്പിങ് ഏല്‍പ്പിക്കാനും സാധിക്കുന്ന താരമാണ് രാഹുലെന്നും ഗംഭീര്‍ കൂട്ടിച്ചേര്‍ത്തു.
കഴിഞ്ഞ വര്‍ഷം ജൂലൈക്ക് ശേഷം ഇന്ത്യന്‍ ടീമിന് വേണ്ടി കളിക്കാത്ത ധോണിയുടെ മടങ്ങിവരവ് അസാധ്യമാണെന്ന് സെലക്ടര്‍ ശ്രീകാന്തും സൂചന നല്‍കിയിരുന്നു. 2019 ഐ.സി.സി ലോകകപ്പിലാണ് അവസാനമായി അദ്ദേഹം ഇന്ത്യന്‍ ജഴ്സി അണിഞ്ഞത്.
ധോണിക്ക് കീഴിലാണ് ഗംഭീര്‍ ഏറ്റവും കൂടുതല്‍ കളിച്ചിട്ടുള്ളത്. ഇന്ത്യയുടെ ലോകകപ്പ് വിജയത്തില്‍ ധോണിയുടെ സിക്സറിനെ പ്രശംസിച്ച്‌ ഒരു സ്പോര്‍ട്സ് സൈറ്റ് രംഗത്തുവന്നതിനെ വിമര്‍ശിച്ച്‌ ഗംഭീര്‍ ട്വിറ്ററില്‍ എത്തിയിരുന്നു. ലോകകപ്പ് വിജയം മുഴുവന്‍ ടീമിനും അവകാശപ്പെട്ടതാണെന്നായിരുന്നു അന്ന് ഗംഭീര്‍ പറഞ്ഞത്.
