കൊച്ചി: ഗുജറാത്തിൽ നടക്കുന്ന ഡിഫൻസ് എക്സ്പോയിൽ ആകർഷണ കേന്ദ്രമായിരിക്കുകയാണ് കിൻഫ്രയും കെൽട്രോണും എസ്.ഐ.എഫ്.എലും.
പ്രതിരോധ മന്ത്രാലയത്തിന് കീഴിലുള്ള പ്രൊഡക്ഷൻ വകുപ്പ് ഈ മാസം 18 മുതൽ 22 വരെ തീയതികളിൽ ഗുജറാത്തിലെ ഗാന്ധിനഗറിൽ സംഘടിപ്പിച്ച ബിനാലെ എക്സിബിഷൻ ഡിഫൻസ് എക്സ്പോയിൽ കേരളത്തെ പ്രതിനിധീകരിച്ച് കിൻഫ്ര, കെൽട്രോൺ, എസ്.ഐ.എഫ്.എൽ എന്നീ സ്ഥാപനങ്ങൾ പങ്കെടുക്കുന്നുണ്ട്.
കര, നാവിക, ആഭ്യന്തര സുരക്ഷ, പ്രതിരോധ സംവിധാനങ്ങൾ എന്നിവയിൽ ശ്രദ്ധ കേന്ദ്രീകരിക്കുന്ന കേന്ദ്ര ഡിഫൻസ് എക്സ്പോയിൽ കേരളത്തിൽ നിന്നുള്ള മൂന്ന് പൊതുമേഖലാ സ്ഥാപനങ്ങൾക്ക് പങ്കെടുക്കാൻ സാധിച്ചു എന്നത് അഭിമാനകരമാണെന്ന് വ്യവസായ മന്ത്രി പി. രാജീവ് ഫെയിസ് ബുക്കിൽ കുറിച്ചു.
എസ്.ഐ.എഫ്.എൽ സ്റ്റാൾ സന്ദർശിച്ച ഡി ആർ ഡി ഒ, ജി ആർ എസ് ഇ അധികൃതർ പുതിയ കരാറുകൾക്ക് താൽപര്യമുണ്ടെന്നറിയിച്ചതായും കിൻഫ്രയുടേയും കെൽട്രോണിൻ്റെയും സ്റ്റാളുകളിലും നിരവധി സ്ഥാപനങ്ങളുടെ അധികൃതർ സന്ദർശിക്കുകയും സഹകരിക്കാനുള്ള സന്നദ്ധത അറിയിക്കുകയും ചെയ്തതായി മന്ത്രി പറഞ്ഞു.
എക്സ്പോയുടെ ഭാഗമായി നടന്ന മൂന്ന് ദിവസത്തെ ബി2ബി മീറ്റിങ്ങുകളിൽ കേരളത്തിൽ നിന്നുള്ള സ്ഥാപനങ്ങളും പങ്കെടുത്തു. ഇതിനൊപ്പം പൊതുജനങ്ങളെ ആകർഷിക്കുന്ന സ്റ്റാളുകൾ സ്ഥാപിക്കാനും നമുക്ക് സാധിച്ചു.
Defense Expo; Kerala is proud of three public sector institutions
