ന്യൂഡല്ഹി : പെഗസിസ് ഫോണ് ചോര്ത്തല് ആരോപണങ്ങളില് സുപ്രിംകോടതിയുടെ മേല്നോട്ടത്തില് സ്വതന്ത്ര വിദഗ്ധ സമിതിയെ നിയോഗിച്ചു. പെഗസിസുമായി ബന്ധപ്പെട്ട പരാതികള് വിദഗ്ധ സമിതി പരിശോധിച്ച് ഉചിതമായ നടപടികള് സുപ്രിംകോടതിയെ അറിയിക്കും.
മേല്നോട്ട സമിതിയുടെ പ്രവര്ത്തനം സുപ്രിംകോടതിയുടെ നിരീക്ഷണത്തിലായിരിക്കും. വിദഗ്ധ സമിതി രൂപീകരിക്കാമെന്ന കേന്ദ്രസര്ക്കാരിന്റെ നിര്ദേശം തള്ളിക്കൊണ്ടാണ് കോടതിയുടെ തീരുമാനം. സ്വകാര്യത സംരക്ഷിക്കേണ്ടതിന്റെ ആവശ്യകത സുപ്രിംകോടതി ചൂണ്ടിക്കാട്ടി.
ഭരണഘടനാ ആവശ്യങ്ങള്ക്കനുസൃതമായിരിക്കണം സ്വകാര്യതയിലുള്ള ഇടപെടലുകള്. നിയമങ്ങള് വഴിയല്ലാതെ ഏതെങ്കിലും തരത്തിലുള്ള കൈകടത്തലുകള് അനുവദിക്കാന് കഴിയില്ലെന്നും സുപ്രിംകോടതി ചൂണ്ടിക്കാട്ടി. മുതിര്ന്ന മാധ്യമപ്രവര്ത്തകരായ എന് റാം, ശശികുമാര്, ജോണ് ബ്രിട്ടാസ് എംപി തുടങ്ങിയവരാണ് അന്വേഷണമാവശ്യപ്പെട്ട് സുപ്രിംകോടതിയെ സമീപിച്ചത്.
അന്വേഷണത്തിന് സ്വന്തം നിലയില് സാങ്കേതിക വിദഗ്ധ സമിതി രൂപീകരിക്കുമെന്ന് ചീഫ് ജസ്റ്റിസ് നേരത്തെ തന്നെ സൂചന നല്കിയിരുന്നു. ചാരസോഫ്റ്റ് വെയര് ഉപയോഗിച്ചോ എന്നതില് കേന്ദ്രസര്ക്കാര് സുപ്രിംകോടതിക്ക് മറുപടി നല്കിയിരുന്നില്ല. പൊതുതാത്പര്യവും രാജ്യസുരക്ഷയും മുന്നിര്ത്തി അധിക സത്യവാങ്മൂലം സമര്പ്പിക്കാന് കഴിയില്ല എന്ന നിലപാടാണ് കേന്ദ്രസര്ക്കാര് സ്വീകരിച്ചത്.
The panel of experts will investigate under the supervision of the Supreme Court