തിരുവനന്തപുരം : പോപ്പുലര് ഫ്രണ്ട് ഓഫ് ഇന്ത്യയുടെ വെബ്സൈറ്റ് പ്രവര്ത്തനരഹിതമായി. കേന്ദ്ര സര്ക്കാര് നിരോധനം ഏര്പ്പെടുത്തിയതിന് പിന്നാലെയാണ് പോപ്പുലര് ഫ്രണ്ട് ഓഫ് ഇന്ത്യയുടെ വെബ്സൈറ്റ് പ്രവര്ത്തനരഹിതമായത്.
നിരോധന ഉത്തരവ് പുറത്ത് വന്നതോടെ സംഘടനയുടെ ഔദ്യോഗിക വാട്സ് ആപ്പ് ഗ്രൂപ്പിന്റെ പേരും മാറ്റി. മാധ്യമങ്ങൾക്ക് സംഘടനാ അറിയിപ്പുകൾ കൈമാറാനുള്ള 'പിഎഫ്ഐ പ്രസ് റിലീസ്' എന്ന ഗ്രൂപ്പിന്റെ പേരാണ് 'പ്രസ് റിലീസ്' എന്ന് ചുരുക്കിയത്.
രാജ്യവ്യാപക റെയ്ഡിനും അറസ്റ്റിനും പിന്നാലെയാണ് പോപ്പുലര് ഫ്രണ്ടിന് അഞ്ച് വര്ഷത്തെ നിരോധനം ഏര്പ്പെടുത്തിയിട്ടുള്ളത്. ഐഎസ് പോലുള്ള ആഗോള തീവ്രവാദ സംഘടനകളുമായി ബന്ധമുണ്ടെന്ന് വ്യക്തമാക്കിയാണ് പോപ്പുലര് ഫ്രണ്ടിന് കേന്ദ്രം നിരോധനം ഏര്പ്പെടുത്തിയത്.
ഒപ്പം ചില സംസ്ഥാനങ്ങള് നിരോധന ആവശ്യം ഉന്നയിച്ചതും നിര്ണായകമായി. നിരോധിക്കാനുള്ള കാരണങ്ങള് എണ്ണിയെണ്ണി പറഞ്ഞുകൊണ്ടാണ് ആഭ്യന്തര മന്ത്രാലയം ഉത്തരവ് പുറത്തിറക്കിയിട്ടുള്ളത്.
പോപ്പുലര് ഫ്രണ്ടിനൊപ്പം റിഹാബ് ഇന്ത്യ ഫൗണ്ടേഷന്, ക്യാമ്പസ് ഫ്രണ്ട് ഓഫ് ഇന്ത്യ, ഓള് ഇന്ത്യ ഇമാംസ് കൗണ്സില്, നാഷണല് കോണ്ഫഡറേഷന് ഓഫ് ഹ്യൂമന് റൈറ്റ്സ് ഓര്ഗനൈസേഷന്, നാഷണല് വിമന്സ് ഫ്രണ്ട്, ജൂനിയര് ഫ്രണ്ട്, എംപവര് ഇന്ത്യ ഫൗണ്ടേഷന്, റിഹാബ് ഫൗണ്ടേഷന് കേരള എന്നീ അനുബന്ധ സംഘടനകള്ക്കാണ് നിരോധനം ഏര്പ്പെടുത്തിയിട്ടുള്ളത്.
Popular Front of India website down; The name of the official WhatsApp group has been changed