കോഴിക്കോട് : കോഴിക്കോട് ജില്ലയുടെ മലയോര മേഖലയിൽ ശക്തമായ കാറ്റും മഴയും. കൊടിയത്തൂരിൽ ഇടിമിന്നലേറ്റ് തെങ്ങിന്റെ മണ്ട കത്തി നശിച്ചു. കനത്ത മഴയെ തുടർന്ന് തിരുവമ്പാടി ടൗണിൽ വെള്ളം കയറി. ജില്ലയുടെ മലയോര മേഖലയിൽ ശക്തമായ മഴ മുന്നറിയിപ്പ് കാലാവസ്ഥാ നിരീക്ഷണ കേന്ദ്രം നൽകിയിരുന്നു.
ഇന്ന് ഉച്ചയോടെയാണ് മലയോരമേഖലയിൽ ശക്തമായ മഴ പെയ്തത്. കനത്ത കാറ്റും ഇടിയോടുകൂടിയ മഴയുമാണ് മേഖലയിൽ പെയ്തത്. കൊടിയത്തൂർ പഞ്ചായത്തിലെ എട്ടാം വാർഡിലാണ് ഇടിമിന്നലേറ്റ് തെങ്ങ് കത്തി നശിച്ചത്. കെ.എസ്.ഇ.ബി സബ് എഞ്ചിനീയറുടെ വീട്ടിലെ തെങ്ങാണ് തീ പിടിച്ചത്.
തിരുവമ്പാടി ടൗണിൽ മഴ തുടരുന്നതിനാൽ ജനങ്ങൾക്ക് ജാഗ്രത നിർദേശം നൽകിയിട്ടുണ്ട്. മുൻപ് ഉരുൾപ്പൊട്ടൽ മണ്ണിടിച്ചിൽ എന്നീ ദുരന്തങ്ങളുണ്ടായ സ്ഥലങ്ങളിലെ ജനങ്ങളോട് അപകട സാധ്യത കണക്കിലെടുത്ത് ആവശ്യമെങ്കിൽ മാറി താമസിക്കുന്നതിന് സജ്ജരായിരിക്കണമെന്നും നിർദേശം നൽകിയിട്ടുണ്ട്.
Heavy rains in hilly areas of Kozhikode district