കോഴിക്കോട് : കോഴിക്കോട് കുളത്തില്‍ വീണ് രണ്ടര വയസ്സുകാരന് ദാരുണന്ത്യം. നാദാപുരത്ത് കല്ലാച്ചിയിലാണ് വീട്ടിൽ നിന്ന് കാണാതായ കുട്ടിയെയാണ് സമീപത്തെ കുളത്തിൽ വീണു മരിച്ച നിലയിൽ കണ്ടെത്തിയത്.
കല്ലാച്ചി ഗവൺമെൻറ് ഹയർ സെക്കൻഡറി സ്കൂളിലേക്ക് കണ്ണൂർ ജില്ലയിൽ നിന്ന് സ്ഥലം മാറി വന്ന അധ്യാപികയുടെ മകൻ ജിയാൻ സുജിത്താണ് മരണപ്പെട്ടത്.കണ്ണൂർ ജില്ലയിലെ ആലക്കോട് സ്വദേശികളാണ് കുട്ടിയുടെ കുടുംബം. അമ്മയുടെ കണ്ണൊന്ന് തെറ്റിയപ്പോഴാണ് ഈ വലിയ ദുരന്തം സംഭവിച്ചത്.
ജിയാൻ കുളത്തിൽ മീനുകളെ കാണാൻ പോകാറുണ്ടെന്നാണ് അയൽവാസികൾ പറയുന്നത്.രണ്ട് വയസ് മാത്രം പ്രായമുള്ള പിഞ്ചോമനയുടെ ദാരുണാന്ത്യത്തിൽ വിറങ്ങലിച്ചു നിൽക്കുകയാണ് പയന്തോങ്ങുകാർ. രാവിലെ 11 മുതൽ കുട്ടിയെ കാണാതായതോടെയാണ് തിരച്ചിൽ ആരംഭിച്ചത്.
ഇവർ താമസിക്കുന്ന പയന്തോങ്ങ് ജുമാമസ്ജിദിന് മുൻവശത്തെ പുത്തൻവീട്ടിൽ കോട്ടേഴ്സിന് സമീപത്തെ കുളത്തിൽ മീനുകളെ കാണാൻ പോകാറുണ്ടായിരുന്നു ജിയാൻ. ബന്ധുക്കളും നാട്ടുകാരും നടത്തിയ തിരച്ചിലിനിടയിൽ കുളത്തിൽ കുട്ടിയെ കണ്ടെത്തുകയായിരുന്നു. ഈ സമയത്ത് കുട്ടിക്ക് ശ്വാസം ഉണ്ടായിരുന്നു.
ഉടൻ വടകരയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം വടകര ജില്ലാ ആശുപത്രി മോർച്ചറിയിലേക്ക് മാറ്റി. കുട്ടിയുടെ അച്ഛൻ സൈനികനാണ്.
Two-and-a-half-year-old falls into Kozhikode pond
