ന്യൂഡല്ഹി : ഗര്ഭിണിയായിരുന്ന അധ്യാപിക കുത്തേറ്റ് മരിച്ച സംഭവത്തില് 17കാരന് അറസ്റ്റില്. 17കാരനായ വിദ്യാര്ഥിയെയാണ് കൊലപാതകത്തിന് പൊലീസ് അറസ്റ്റ് ചെയ്തത്. ജൂണ് ഒന്നിനാണ് കേസിനാസ്പദമായ സംഭവം നടന്നത്. 30കാരിയായ അധ്യാപികയെ വീടിനുള്ളില് മരിച്ച നിലയില് കണ്ടെത്തിയത്.
തുടര്ന്ന് നടത്തിയ അന്വേഷണത്തിലാണ് പ്രതി പിടിയിലായത്. അധ്യാപികയുമായി വിദ്യാര്ഥി അടുപ്പത്തിലായിരുന്നു. എന്നാല് ബന്ധം അവസാനിപ്പിക്കാന് വിദ്യാര്ഥി ആവശ്യപ്പെട്ടിരുന്നെങ്കിലും അധ്യാപിക സമ്മതിച്ചില്ലായിരുന്നു. ഇതാണ് കൊലപാതകത്തില് കലാശിച്ചത്.
സംഭവസമയത്ത് അവര് വീട്ടില് തനിച്ചായിരുന്നുവെന്ന് പോലീസ് പറഞ്ഞു. അധ്യാപികയും വിദ്യാര്ഥിയും ഒരേ പ്രദേശത്താണ് താമസിച്ചിരുന്നതെന്ന് പോലീസ് പറഞ്ഞു. 'അധ്യാപികയുമായുള്ള ബന്ധം അവസാനിപ്പിക്കാന് ആണ്കുട്ടി ആഗ്രഹിച്ചിരുന്നു.
എന്നാല്, യുവതി ഇതിന് എതിരായിരുന്നു. ബന്ധം തുടരാന് സമ്മര്ദം ചെലുത്തുകയും ചെയ്തു. തുടര്ന്ന് യുവതിയുടെ വീട്ടിലെത്തി പ്രതി കൊലപ്പെടുത്തുകയായിരുന്നു' അയോധ്യ സീനിയര് പൊലീസ് സൂപ്രണ്ട് ശൈലേഷ് പാണ്ഡെ പറഞ്ഞു.
കവര്ച്ച നടന്നതായി വരുത്തിത്തീര്ക്കാന് യുവതിയുടെ മുറിയിലെ അലമാരയുടെ പൂട്ട് തകര്ത്ത് 50,000 രൂപയും മറ്റ് വിലപിടിപ്പുള്ള വസ്തുക്കളും പ്രതി കൈക്കലാക്കി പൊലീസിനെ തെറ്റിദ്ധരിപ്പിച്ചുവെന്ന് എസ്എസ്പി പറഞ്ഞു. പ്രതിയെ പിടികൂടിയതായും ജുവനൈല് ജസ്റ്റിസ് ബോര്ഡിന് മുന്നില് ഹാജരാക്കുമെന്നും പൊലീസ് അറിയിച്ചു.
The incident where a pregnant teacher was stabbed to death; 17-year-old arrested