ഒറ്റപ്പാലം : നഗരത്തിലെ സിപിഎം ഓഫിസിനു നേരെ കല്ലേറ്. ഇന്നലെ രാത്രിയാണ് ഏരിയാ കമ്മിറ്റി ഓഫിസ് ആക്രമിക്കപ്പെട്ടത്. ഓഫിസിന്റെ രണ്ടാം നിലയിലെ ജനൽ ചില്ലാണു കല്ലേറിൽ തകർന്നത്.
രണ്ടംഗ സംഘം ഗേറ്റിനു പുറത്തുനിന്ന് എറിയുകയായിരുന്നെന്നും അതിക്രമത്തിനു പിന്നിൽ കോൺഗ്രസ് ആണെന്നും സിപിഎം ഏരിയാ നേതൃത്വം ആരോപിച്ചു.
സംഘർഷാന്തരീക്ഷം നിലനിൽക്കുന്ന പ്രദേശത്ത് കഴിഞ്ഞ ദിവസങ്ങളിൽ സിപിഎം പോഷക സംഘടനകളുടെയും കോൺഗ്രസ് ഓഫിസിനു മുന്നിലെയും കൊടിമരങ്ങളും ബോർഡുകളും നശിപ്പിക്കപ്പെട്ടിരുന്നു.
ഇതിനിടെ കഴിഞ്ഞ ദിവസം കോൺഗ്രസ് നടത്തിയ പ്രകടനം പൊലീസുമായി കയ്യാങ്കളിയിൽ കലാശിച്ചിരുന്നു. ഇതിനു പിന്നാലെയാണ് സിപിഎം ഓഫിസ് ആക്രമിക്കപ്പെട്ട സംഭവം. അക്രമത്തിൽ പ്രതിഷേധിച്ച് ഇന്നു വൈകിട്ടു നഗരത്തിൽ പ്രകടനം നടത്തും. പൊലീസ് അന്വേഷണം ആരംഭിച്ചു.
Stones hurled at the CPM office in Ottapalam