---
title: "അർഹർക്ക് ആനുകൂല്യം ഉറപ്പാക്കാൻ നടപടി; മഞ്ഞ, പിങ്ക് റേഷൻ കാർഡുകൾക്ക് അർഹത ഇവർക്ക് മാത്രം, പൊതുവിഭാഗത്തിലേക്ക് മാറാൻ ഡിസംബർ 8 വരെ അവസരം"
english_title: "Only Eligible Families Can Keep Yellow and Pink Ration Cards; Time Till Dec. 8 to Shift to General Category"
publisher: "truevisionnews.com"
canonical_url: "https://truevisionnews.com/news/391366/ration-card-eligibility-december-8"
published_at: "2026-11-12T21:44:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6af5e6974d222_ration-card-eligibility-december-8.jpg"
keywords: ["RationCard", "KeralaNews", "FoodSupply", "PriorityCards", "CivilSupplies"]
---

# അർഹർക്ക് ആനുകൂല്യം ഉറപ്പാക്കാൻ നടപടി; മഞ്ഞ, പിങ്ക് റേഷൻ കാർഡുകൾക്ക് അർഹത ഇവർക്ക് മാത്രം, പൊതുവിഭാഗത്തിലേക്ക് മാറാൻ ഡിസംബർ 8 വരെ അവസരം

> **Lead Summary:** തിരുവനന്തപുരം: അർഹതയില്ലാതെ മുൻഗണനാ റേഷൻ കാർഡുകൾ കൈവശം വച്ചിരിക്കുന്നവർക്ക് പൊതുവിഭാഗത്തിലേക്ക് മാറാൻ ഡിസംബർ എട്ടുവരെ അവസരം. മഞ്ഞ,​ പിങ്ക് കാർഡുകൾ കൈവശമുള്ളവരിൽ അർഹത നഷ്ടപ്പെട്ടവർക്ക് പിഴയോ മറ്റ് ശിക്ഷാനടപടികളോ ഇല്ലാതെ സ്വമേധയാ കാർഡുകൾ തിരികെ ഏൽപ്പിക്കാമെന്ന് ഭക്ഷ്യ പൊതുവിതരണ വകുപ്പ് അറിയിച്ചു.

## Article Content

തിരുവനന്തപുരം: അർഹതയില്ലാതെ മുൻഗണനാ റേഷൻ കാർഡുകൾ കൈവശം വച്ചിരിക്കുന്നവർക്ക് പൊതുവിഭാഗത്തിലേക്ക് മാറാൻ ഡിസംബർ എട്ടുവരെ അവസരം. മഞ്ഞ,​ പിങ്ക് കാർഡുകൾ കൈവശമുള്ളവരിൽ അർഹത നഷ്ടപ്പെട്ടവർക്ക് പിഴയോ മറ്റ് ശിക്ഷാനടപടികളോ ഇല്ലാതെ സ്വമേധയാ കാർഡുകൾ തിരികെ ഏൽപ്പിക്കാമെന്ന് ഭക്ഷ്യ പൊതുവിതരണ വകുപ്പ് അറിയിച്ചു.

അനുവദിച്ച സമയത്തിന് ശേഷം നടത്തുന്ന പരിശോധനയിൽ അനർഹരെന്ന് കണ്ടെത്തുന്നവരിൽ നിന്ന് ഇതുവരെ കൈപ്പറ്റിയ റേഷൻ ഭക്ഷ്യസാധനങ്ങളുടെ കമ്പോളവില പിഴയായി ഈടാക്കും. ജീവിതസാഹചര്യങ്ങളും സാമ്പത്തിക നിലയും മാറിയിട്ടും മുൻഗണനാ കാർഡുകൾ തുടർന്നും ഉപയോഗിക്കുന്നവരെയാണ് നടപടിയുടെ പരിധിയിൽ ഉൾപ്പെടുത്തുന്നത്.

സർക്കാർ,​ അർദ്ധസർക്കാർ ജീവനക്കാർ,​ അദ്ധ്യാപകർ,​ പൊതുമേഖലാ സഹകരണ സ്ഥാപനങ്ങളിലെ ജീവനക്കാർ,​ സർവീസ് പെൻഷൻകാർ,​ ആദായ നികുതി അടയ്ക്കുന്നവർ തുടങ്ങിയവർ കാർഡ് സറണ്ടർ ചെയ്യേണ്ടവരുടെ പട്ടികയിൽ പെടുന്നു.

പ്രതിമാസം 25,000 രൂപയിൽ കൂടുതൽ വരുമാനമുള്ള കുടുംബങ്ങൾ, ഒരേക്കറിലധികം ഭൂമിയുള്ളവർ, 1,000 ചതുരശ്ര അടിയിൽ കൂടുതൽ വിസ്തീർണമുള്ള വീടോ ഫ്ളാറ്റോ ഉള്ളവർ, നാല് ചക്ര വാഹനം സ്വന്തമായുള്ളവർ എന്നിവരും ഇതിൽപ്പെടും.

വിദേശത്തോ സ്വകാര്യ സ്ഥാപനങ്ങളിലോ ജോലി ചെയ്യുന്ന കുടുംബാംഗത്തിന് പ്രതിമാസം 25,000 രൂപയിൽ കൂടുതൽ വരുമാനമുണ്ടെങ്കിലും മുൻഗണനാ കാർഡിന് അർഹതയുണ്ടാകില്ല.അതേസമയം, നിശ്ചിത വിഭാഗങ്ങൾക്ക് മാനദണ്ഡങ്ങളിൽ ഇളവ് അനുവദിച്ചിട്ടുണ്ട്.

പാർട്ട് ടൈം, താൽക്കാലിക ജീവനക്കാർ, നാലാം ക്ലാസ് തസ്തികകളിൽനിന്ന് വിരമിച്ച പെൻഷൻകാർ, പ്രതിമാസം 5,000 രൂപയിൽ താഴെ പെൻഷൻ ലഭിക്കുന്നവർ, 10,000 രൂപയിൽ താഴെ സ്വാതന്ത്ര്യസമര പെൻഷൻ ലഭിക്കുന്നവർ എന്നിവരെ നടപടിയിൽനിന്ന് ഒഴിവാക്കിയിട്ടുണ്ട്.

ഒരേക്കറിലധികം ഭൂമിയുള്ള പട്ടികവർഗ കുടുംബങ്ങൾക്കും ഉപജീവനത്തിനുള്ള ഏക വരുമാനമാർഗമായി ടാക്സി ഉപയോഗിക്കുന്ന നാല് ചക്ര വാഹന ഉടമകൾക്കും ഇളവ് ലഭിക്കും.കാർഡിന്റെ വിഭാഗം മാറ്റുന്നതിനായി ബന്ധപ്പെട്ട താലൂക്ക് സപ്ലൈ ഓഫീസിലാണ് അപേക്ഷ നൽകേണ്ടത്.

ഇതിനായി ഒറിജിനൽ റേഷൻ കാർഡ്, കുടുംബനാഥന്റെ ആധാർ കാർഡ്, വിഭാഗം മാറ്റുന്നതിനുള്ള നിർദിഷ്ട അപേക്ഷാ ഫോറം എന്നിവ ഹാജരാക്കണം. ഡിസംബർ എട്ടിനകം സ്വമേധയാ നടപടികൾ പൂർത്തിയാക്കുന്നവർക്ക് പിഴയോ നിയമനടപടികളോ നേരിടേണ്ടിവരില്ല.

അനർഹരുടെ കാർഡുകൾ പൂർണമായി റദ്ദാക്കുന്നതിനു പകരം അർഹതയ്ക്കനുസരിച്ച് മുൻഗണനാ വിഭാഗത്തിൽനിന്ന് പൊതുവിഭാഗത്തിലേക്ക് മാറ്റുകയാണ് ചെയ്യുന്നത്. ഇതുവഴി നിലവിൽ മുൻഗണനാ പട്ടികയിൽ ഇടം ലഭിക്കാത്ത അർഹരായ സാമ്പത്തികമായി പിന്നാക്കം നിൽക്കുന്ന കുടുംബങ്ങൾക്ക് ആനുകൂല്യങ്ങൾ ലഭ്യമാക്കാനാകും.

Kerala’s Food and Civil Supplies Department has given ineligible holders of priority ration cards until December 8 to voluntarily shift to the general category without penalty. After the deadline, those found ineligible in verification will have to pay the market value of ration benefits already received. The move aims to ensure benefits reach genuinely eligible families.

### Related Links & Sources
- [Original Story Source](https://truevisionnews.com/news/391366/ration-card-eligibility-december-8)