---
title: "അക്ഷരയുടെ ജീവനെടുത്ത ബസ് ഡ്രൈവർക്ക് ഇനി ലൈസൻസ് വേണ്ടെന്ന് പോലീസ്; ആജീവനാന്ത വിലക്കിന് ശുപാർശ, സർക്കാർ വകുപ്പുകൾക്കെതിരെയും പരാതി"
english_title: "Bus Driver’s Licence to Be Revoked for Life in Akshara’s Death Case"
publisher: "truevisionnews.com"
canonical_url: "https://truevisionnews.com/news/391286/bus-driver-licence-revoke-akshara-death-case"
published_at: "2026-11-12T12:19:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6af56298e2cb3_bus-driver-licence-revoke-akshara-death-case.jpg"
keywords: ["KeralaNews", "BusAccident", "MVDAction", "HumanRightsCommission", "KochiNews"]
---

# അക്ഷരയുടെ ജീവനെടുത്ത ബസ് ഡ്രൈവർക്ക് ഇനി ലൈസൻസ് വേണ്ടെന്ന് പോലീസ്; ആജീവനാന്ത വിലക്കിന് ശുപാർശ, സർക്കാർ വകുപ്പുകൾക്കെതിരെയും പരാതി

> **Lead Summary:** കൊച്ചി: കാക്കനാട് സ്വകാര്യ ബസ് ഇടിച്ച് ഐടി ജീവനക്കാരിയായ അക്ഷര മരിച്ച സംഭവത്തിൽ സർക്കാർ വകുപ്പുകളുടെയും ഉദ്യോഗസ്ഥരുടെയും അനാസ്ഥയ്ക്കെതിരെ നടപടി ആവശ്യപ്പെട്ട് മനുഷ്യാവകാശ കമ്മീഷന് പരാതി. കോഴിക്കോട് സ്വദേശിയായ പൊതുപ്രവർത്തകനാണ് കമ്മീഷന് പരാതി നൽകിയത്.

## Article Content

കൊച്ചി: കാക്കനാട് സ്വകാര്യ ബസ് ഇടിച്ച് ഐടി ജീവനക്കാരിയായ അക്ഷര മരിച്ച സംഭവത്തിൽ സർക്കാർ വകുപ്പുകളുടെയും ഉദ്യോഗസ്ഥരുടെയും അനാസ്ഥയ്ക്കെതിരെ നടപടി ആവശ്യപ്പെട്ട് മനുഷ്യാവകാശ കമ്മീഷന് പരാതി. കോഴിക്കോട് സ്വദേശിയായ പൊതുപ്രവർത്തകനാണ് കമ്മീഷന് പരാതി നൽകിയത്.

നടപ്പാതകൾ നിർമ്മിക്കുന്നതിൽ പൊതുമരാമത്ത് വകുപ്പിനും, സ്വകാര്യ ബസുകളുടെ അമിത വേഗത നിയന്ത്രിക്കുന്നതിൽ മോട്ടോർ വാഹന വകുപ്പിനും ഗുരുതര വീഴ്ചയുണ്ടായെന്നാണ് പരാതിയിൽ ചൂണ്ടിക്കാട്ടുന്നത്.

അപകടത്തിന് കാരണക്കാരനായ ബസ് ഡ്രൈവർ സി.കെ. ബിനോയിയുടെ ലൈസൻസ് ആജീവനാന്തം റദ്ദ് ചെയ്യണമെന്നാവശ്യപ്പെട്ട് ഇൻഫോപാർക്ക് പോലീസ് മോട്ടോർ വാഹന വകുപ്പിന് കത്ത് നൽകി.

ബിനോയിയുടെ ഗുരുതരമായ പിഴവാണ് അപകടത്തിന് വഴിവെച്ചതെന്ന് പോലീസ് വ്യക്തമാക്കുന്നു. ഇതിനുപുറമെ അപകടമുണ്ടാക്കിയ ബസിന്റെ പെർമിറ്റ് റദ്ദ് ചെയ്യണമെന്ന് ആവശ്യപ്പെട്ടും പോലീസ് എം.വി.ഡിക്ക് കത്ത് നൽകിയിട്ടുണ്ട്.

കഴിഞ്ഞ ബുധനാഴ്ചയാണ് ഇൻഫോപാർക്കിലെ ഐടി കമ്പനി ജീവനക്കാരിയായ തൃശ്ശൂർ സ്വദേശിനി അക്ഷര അപകടത്തിൽ മരിച്ചത്. ജിമ്മിലെ വ്യായാമം കഴിഞ്ഞ് നടന്നുപോവുകയായിരുന്ന അക്ഷരയെ അമിതവേഗത്തിലെത്തിയ ഇൻഫോപാർക്ക്-മട്ടാഞ്ചേരി റൂട്ടിൽ ഓടുന്ന 'മലയിൽ' എന്ന സ്വകാര്യ ബസ് ഇടിച്ചുവീഴ്ത്തുകയായിരുന്നു.

ട്രിപ്പ് മുടക്കിയതുമായി ബന്ധപ്പെട്ട മറ്റൊരു കേസിൽ ഈ ബസിന്റെ പെർമിറ്റ് ശനിയാഴ്ച മുതൽ 10 ദിവസത്തേക്ക് സസ്പെൻഡ് ചെയ്തിട്ടുണ്ട്. ഈ അപകടത്തിലും ബസിന്റെ പേരിൽ നടപടികൾ ആരംഭിച്ചിട്ടുണ്ട്.

അതിനിടെ, പോലീസിന്റെ ക്ലിയറൻസ് സർട്ടിഫിക്കറ്റ് ഇല്ലാത്ത ഡ്രൈവറെയാണ് ബസിൽ നിയമിച്ചിരുന്നതെന്നും അന്വേഷണത്തിൽ കണ്ടെത്തിയിട്ടുണ്ട്. ബസ് ഡ്രൈവറായ സി.കെ. ബിനോയ് ലഹരി ഇടപാട് കേസിലും അടിപിടി കേസിലും ഉൾപ്പെടെ പ്രതിയാണെന്നും കണ്ടെത്തിയിട്ടുണ്ട്.

Police have recommended that the licence of bus driver C.K. Binoy be cancelled for life after the death of IT employee Akshara in a Kochi bus accident. They have also sought action against the bus permit and complained about alleged lapses by government departments and officials.

### Related Links & Sources
- [Original Story Source](https://truevisionnews.com/news/391286/bus-driver-licence-revoke-akshara-death-case)