---
title: "'വളർമതി മുടിമുറിക്കുന്നത് കണ്ട്‌ കരഞ്ഞുപോയ മുഖ്യമന്ത്രിയല്ലേ ഈ അതിക്രമത്തിന് നേതൃത്വം നൽകുന്നത്; ഡൽഹിയിൽ മോദി ചെയ്യുന്നത് കേരളത്തിലും ആവർത്തിക്കാമെന്ന് കരുതേണ്ട' -പിണറായി വിജയൻ"
english_title: "Pinarayi Warns Against Importing Delhi-Style Crackdown to Kerala"
publisher: "truevisionnews.com"
canonical_url: "https://truevisionnews.com/news/391236/pinarayi-warns-against-delhi-style-crackdown-kerala"
published_at: "2026-11-12T06:21:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6af50e482803b_pinarayi-warns-against-delhi-style-crackdown-kerala.jpg"
keywords: ["PinarayiVijayan", "KeralaPolitics", "UDFGovernment", "ProtestRights", "DelhiModel"]
---

# 'വളർമതി മുടിമുറിക്കുന്നത് കണ്ട്‌ കരഞ്ഞുപോയ മുഖ്യമന്ത്രിയല്ലേ ഈ അതിക്രമത്തിന് നേതൃത്വം നൽകുന്നത്; ഡൽഹിയിൽ മോദി ചെയ്യുന്നത് കേരളത്തിലും ആവർത്തിക്കാമെന്ന് കരുതേണ്ട' -പിണറായി വിജയൻ

> **Lead Summary:** തിരുവനന്തപുരം: എൽപിഎസ്ടി ഉദ്യോഗാർത്ഥികളുടെ സമരപ്പന്തൽ പൊളിച്ചുനീക്കുകയും സമരത്തിന് നേതൃത്വം നൽകിയ വളർമതിയെ അറസ്റ്റ് ചെയ്യുകയും ചെയ്ത നടപടിയിൽ രൂക്ഷവിമർശനവുമായി പ്രതിപക്ഷ നേതാവ് പിണറായി വിജയൻ. ജനാധിപത്യപരമായ പ്രതിഷേധങ്ങളോടുള്ള യുഡിഎഫ് സർക്കാരിന്റെ അസഹിഷ്ണുതയാണ് ഈ നടപടിയിലൂടെ വ്യക്തമാകുന്നതെന്ന് അദ്ദേഹം പ്രസ്താവനയിൽ ആരോപിച്ചു.

## Article Content

തിരുവനന്തപുരം: എൽപിഎസ്ടി ഉദ്യോഗാർത്ഥികളുടെ സമരപ്പന്തൽ പൊളിച്ചുനീക്കുകയും സമരത്തിന് നേതൃത്വം നൽകിയ വളർമതിയെ അറസ്റ്റ് ചെയ്യുകയും ചെയ്ത നടപടിയിൽ രൂക്ഷവിമർശനവുമായി പ്രതിപക്ഷ നേതാവ് പിണറായി വിജയൻ. ജനാധിപത്യപരമായ പ്രതിഷേധങ്ങളോടുള്ള യുഡിഎഫ് സർക്കാരിന്റെ അസഹിഷ്ണുതയാണ് ഈ നടപടിയിലൂടെ വ്യക്തമാകുന്നതെന്ന് അദ്ദേഹം പ്രസ്താവനയിൽ ആരോപിച്ചു.

സമാധാനപരമായി സമരം ചെയ്യുന്നവരെ പോലീസിനെ ഉപയോഗിച്ച് ബലപ്രയോഗത്തിലൂടെ നേരിടുന്ന രീതിയാണ് സർക്കാർ തുടരുന്നതെന്ന് അദ്ദേഹം പറഞ്ഞു. 'വളർമതി മുടി മുറിക്കുന്നത് കണ്ടു കരഞ്ഞുപോയ മുഖ്യമന്ത്രി തന്നെയല്ലേ ഇപ്പോൾ ഈ അതിക്രമത്തിന് നേതൃത്വം നൽകുന്നത്?' എന്നും അദ്ദേഹം ചോദിച്ചു.

സമരം ചെയ്യാനും പ്രതിഷേധിക്കാനും അഭിപ്രായം പ്രകടിപ്പിക്കാനുമുള്ള അവകാശം ഓരോ പൗരന്റേയും മൗലികാവകാശമാണ്. സമരങ്ങളെയും പ്രതിഷേധങ്ങളെയും ഭയപ്പെടുന്ന ഭരണസംവിധാനമല്ല, മറിച്ച് ജനങ്ങളുടെ ശബ്ദം കേൾക്കാൻ തയ്യാറാകുന്ന സർക്കാരാണ് ജനാധിപത്യത്തിന് ആവശ്യമെന്നും അദ്ദേഹം കൂട്ടിച്ചേർത്തു.

'ഡൽഹിയിൽ നരേന്ദ്ര മോദിയും സംഘപരിവാറും ചെയ്യുന്നത് കേരളത്തിലും ആവർത്തിക്കാമെന്ന വി.ഡി. സതീശന്റെയും യുഡിഎഫിന്റെയും വ്യാമോഹം ഇവിടെ നടപ്പിലാകില്ല. ഇതിനെതിരെ ശക്തമായ ജനകീയ പ്രക്ഷോഭം ഉയർന്നു വരണം,' പിണറായി വിജയൻ വ്യക്തമാക്കി.

എൽഡിഎഫ് സർക്കാരിന്റെ കാലത്ത് മാസങ്ങളോളം സെക്രട്ടറിയേറ്റിന് മുന്നിൽ ആശാവർക്കർമാരുടെ പേരിൽ നടത്തിയ സമരത്തെ തകർക്കുന്നതിന് വേണ്ടി പന്തൽ പൊളിക്കാൻ ആരും പോയിട്ടില്ലെന്ന് അദ്ദേഹം ചൂണ്ടിക്കാട്ടി.

അന്ന് ആ സമരത്തെ ഓരോ മണിക്കൂറിലും പോയി അഭിവാദ്യം ചെയ്യുകയും സർക്കാരിനെതിരെ ഘോരഘോരം പ്രസംഗിക്കുകയും ചെയ്തവരാണ് ഇപ്പോൾ എൽപിഎസ്ടി സമരം തകർക്കാൻ പന്തൽ പൊളിക്കലും അറസ്റ്റുമായി മുന്നിട്ടിറങ്ങിയിരിക്കുന്നതെന്നും പിണറായി വിജയൻ കുറ്റപ്പെടുത്തി.

Pinarayi Vijayan strongly criticized the removal of the protest tent and the arrest of Valarmathi, calling it an attack on democratic rights. He said the UDF government’s actions show intolerance toward peaceful protests and warned that a Delhi-style approach would not work in Kerala.

### Related Links & Sources
- [Original Story Source](https://truevisionnews.com/news/391236/pinarayi-warns-against-delhi-style-crackdown-kerala)