---
title: "അവധി ആഘോഷം ദുരന്തമായി...! മലേഷ്യയിൽ ഉരുൾപൊട്ടലും മിന്നൽപ്രളയവും, കോഴിക്കോട് പേരാമ്പ്ര സ്വദേശി ഉൾപ്പെടെ രണ്ട് മലയാളികൾക്ക് ദാരുണാന്ത്യം"
english_title: "Landslide and Flash Flood in Malaysia Claim Lives of Two Malayalis"
publisher: "truevisionnews.com"
canonical_url: "https://truevisionnews.com/news/391099/malaysia-landslide-flash-flood-malayali-deaths"
published_at: "2026-11-11T08:11:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6af3d6db0805f_malaysia-landslide-flash-flood-malayali-deaths.jpg"
keywords: ["MalaysiaFlood", "Landslide", "MalayaliDeaths", "KeralaNews", "RescueOperation"]
---

# അവധി ആഘോഷം ദുരന്തമായി...! മലേഷ്യയിൽ ഉരുൾപൊട്ടലും മിന്നൽപ്രളയവും, കോഴിക്കോട് പേരാമ്പ്ര സ്വദേശി ഉൾപ്പെടെ രണ്ട് മലയാളികൾക്ക് ദാരുണാന്ത്യം

> **Lead Summary:** പിറവം/കോഴിക്കോട്: മലേഷ്യയിലെ റവാങ്ങിലുണ്ടായ ഉരുൾപൊട്ടലിനെത്തുടർന്നുള്ള മിന്നൽപ്രളയത്തിൽ രണ്ട് മലയാളികൾ മരിച്ചു. എറണാകുളം മണീട് ചീരക്കാട്ടുപാറ കുഞ്ഞൻമലയിൽ കെ.ബി. അനീഷ് , കോഴിക്കോട് പേരാമ്പ്ര കൽപത്തൂർ ചുണ്ടക്കാട്ടിൽ ലിനിൽ എന്നിവരാണ് മരിച്ചത്. തിങ്കളാഴ്ച വൈകിട്ടായിരുന്നു ദുരന്തം.

## Article Content

പിറവം/കോഴിക്കോട്: മലേഷ്യയിലെ റവാങ്ങിലുണ്ടായ ഉരുൾപൊട്ടലിനെത്തുടർന്നുള്ള മിന്നൽപ്രളയത്തിൽ രണ്ട് മലയാളികൾ മരിച്ചു. എറണാകുളം മണീട് ചീരക്കാട്ടുപാറ കുഞ്ഞൻമലയിൽ കെ.ബി. അനീഷ് , കോഴിക്കോട് പേരാമ്പ്ര കൽപത്തൂർ ചുണ്ടക്കാട്ടിൽ ലിനിൽ എന്നിവരാണ് മരിച്ചത്. തിങ്കളാഴ്ച വൈകിട്ടായിരുന്നു ദുരന്തം.

ദീപാവലി അവധി ആഘോഷിക്കുന്നതിനായി റവാങ്ങിലെ തടാകത്തിൽ എത്തിയപ്പോഴാണ് ഇരുവരും അപകടത്തിൽപ്പെട്ടത്. അപ്രതീക്ഷിതമായുണ്ടായ ഉരുൾപൊട്ടലും തുടർന്നുള്ള മിന്നൽപ്രളയവുമാണ് ദുരന്തത്തിന് കാരണമായത്.

അപകടത്തിൽ കാണാതായ എട്ടുപേരിൽ അഞ്ചുപേരുടെ മൃതദേഹങ്ങൾ കണ്ടെത്തിയതായാണ് വിവരം. മണ്ണിടിച്ചിലിൽ കുടുങ്ങിയ മറ്റ് 19 പേരെ രക്ഷപ്പെടുത്തി. കാണാതായവർക്കായുള്ള തിരച്ചിലും രക്ഷാപ്രവർത്തനങ്ങളും തുടരുകയാണ്.

എറണാകുളം മണീട് സ്വദേശിയായ അനീഷ് കഴിഞ്ഞ ഏഴുവർഷമായി മലേഷ്യയിൽ മെഷീൻ ഓപ്പറേറ്ററായി ജോലി ചെയ്തുവരികയായിരുന്നു. ഒരു മാസം മുമ്പാണ് സഹോദരന്റെ ഗൃഹപ്രവേശന ചടങ്ങിൽ പങ്കെടുക്കുന്നതിനായി നാട്ടിലെത്തി മടങ്ങിയത്. ഭാസ്കരന്റെയും സുജാതയുടെയും മകനാണ് അനീഷ്. ഭാര്യ: സി.എസ്. രേഷ്മ. മകൻ: ഭവദേവ്.

കോഴിക്കോട് കൽപത്തൂർ ചുണ്ടക്കാട്ടിൽ ലിനിൽ മലേഷ്യയിലെ സ്വകാര്യ കമ്പനിയിൽ ജോലി ചെയ്തുവരികയായിരുന്നു. നാരായണന്റെയും രുഗ്മിണിയുടെയും മകനാണ്.

ഭാര്യ: ജേഷ്മ. മക്കൾ: വിഷ്ണു വേദ്, വരുൺ വേദ്.

മരിച്ച ഇരുവരുടെയും മൃതദേഹങ്ങൾ റവാങ്ങിലെ ആശുപത്രിയിൽ സൂക്ഷിച്ചിരിക്കുകയാണ്. മൃതദേഹങ്ങൾ നാട്ടിലെത്തിക്കുന്നതിനുള്ള തുടർനടപടികൾ സംബന്ധിച്ച വിവരങ്ങൾ ലഭ്യമായിട്ടില്ല.

അവധി ആഘോഷത്തിനായി എത്തിയ രണ്ട് മലയാളികൾക്ക് അപ്രതീക്ഷിത ദുരന്തത്തിൽ ജീവൻ നഷ്ടമായത് കുടുംബങ്ങളെയും നാട്ടുകാരെയും ദുഃഖത്തിലാഴ്ത്തിയിരിക്കുകയാണ്.

Two Malayali men died in a landslide-triggered flash flood at a lake in Rawang, Malaysia, while on a Diwali holiday outing. The victims were identified as K.B. Aneesh from Ernakulam and Linil from Kozhikode, and search operations are continuing for the missing.

### Related Links & Sources
- [Original Story Source](https://truevisionnews.com/news/391099/malaysia-landslide-flash-flood-malayali-deaths)