---
title: "727 കോടിയുടെ അധിക ബാധ്യത വരുത്തുന്ന വൈദ്യുതിക്കരാർ, 'വൈദ്യുതി പ്രതിസന്ധിക്ക് മറവിൽ വൻ അഴിമതി'; കൂട്ടുനിൽക്കാത്ത ഉദ്യോഗസ്ഥരെ പുകച്ചുചാടിക്കുന്നുവെന്ന് പിണറായി വിജയൻ"
english_title: "Power Deal to Add Rs 727 Crore Burden, Says Pinarayi Vijayan"
publisher: "truevisionnews.com"
canonical_url: "https://truevisionnews.com/news/390076/power-deal-adds-727-crore-burden"
published_at: "2026-11-03T19:04:00+05:30"
category: "Kerala"
language: "ml"
image: "https://cf.zdn.im/img/truevisionnews.com/0/image-uploads/6ae9e3f35f61c_power-deal-adds-727-crore-burden.jpg"
keywords: ["PowerDeal", "KeralaPolitics", "KSEB", "CorruptionAllegation", "ElectricityCrisis", "Pinarayi Vijayan"]
---

# 727 കോടിയുടെ അധിക ബാധ്യത വരുത്തുന്ന വൈദ്യുതിക്കരാർ, 'വൈദ്യുതി പ്രതിസന്ധിക്ക് മറവിൽ വൻ അഴിമതി'; കൂട്ടുനിൽക്കാത്ത ഉദ്യോഗസ്ഥരെ പുകച്ചുചാടിക്കുന്നുവെന്ന് പിണറായി വിജയൻ

> **Lead Summary:** തിരുവനന്തപുരം: സർക്കാരിനെതിരെ പ്രതിപക്ഷ നേതാവ് പിണറായി വിജയൻ. വൈദ്യുതി പ്രതിസന്ധിയുടെ മറവിൽ വൻ അഴിമതി നടത്താനുള്ള സർക്കാരിന്റെ നീക്കം സംബന്ധിച്ച വാർത്തകൾ അതീവ ഗുരുതരമാണ്. ഖജനാവ് കൊള്ളയടിക്കാനുള്ള ശ്രമമാണിത്.

## Article Content

തിരുവനന്തപുരം: സർക്കാരിനെതിരെ പ്രതിപക്ഷ നേതാവ് പിണറായി വിജയൻ. വൈദ്യുതി പ്രതിസന്ധിയുടെ മറവിൽ വൻ അഴിമതി നടത്താനുള്ള സർക്കാരിന്റെ നീക്കം സംബന്ധിച്ച വാർത്തകൾ അതീവ ഗുരുതരമാണ്. ഖജനാവ് കൊള്ളയടിക്കാനുള്ള ശ്രമമാണിത്.

സ്വകാര്യമേഖലയിലുള്ള കച്ചവടത്തിന് സർക്കാർ വഴിയൊരുക്കി. കെ.എസ്.ഇ.ബിയിലെ വഴിവിട്ട നീക്കങ്ങളും ഉന്നത ഉദ്യോഗസ്ഥരുടെ മാറ്റവും വൻ സാമ്പത്തിക അഴിമതിക്ക് വഴിയൊരുക്കാനാണെന്ന ആക്ഷേപം ശക്തമാണ്.

അഴിമതിക്ക് കൂട്ടുനിൽക്കാത്ത ഉദ്യോഗസ്ഥരെ പുകച്ചുചാടിച്ചാണ് സർക്കാർ ഇത്തരം വിവാദ തീരുമാനങ്ങളുമായി മുന്നോട്ടുപോകുന്നത്. കുറഞ്ഞ ചെലവിൽ വൈദ്യുതി ലഭ്യമാകാൻ സാധ്യത നിലനിൽക്കെ, റെഗുലേറ്ററി കമ്മീഷന്റെ അനുമതിയില്ലാതെ സ്വകാര്യ കമ്പനിയിൽ നിന്ന് യൂണിറ്റിന് 8.63 രൂപ നിരക്കിൽ 500 മെഗാവാട്ട് വൈദ്യുതി വാങ്ങാനാണ് നീക്കം.

ആവശ്യമില്ലാത്ത പകൽസമയത്ത് വൈദ്യുതി വാങ്ങിക്കൂട്ടുന്ന ഈ നടപടി സംസ്ഥാനത്തിന് 727 കോടി രൂപയുടെ അധിക ബാധ്യത വരുത്തിവെക്കുമെന്നാണ് കണക്കാക്കപ്പെടുന്നത്.

ബോർഡും വകുപ്പ് മന്ത്രിയും വിയോജിപ്പ് അറിയിച്ചിട്ടും, മുഖ്യമന്ത്രിയുടെ ഓഫീസിന്റെ ഇടപെടലിലൂടെ ഉദ്യോഗസ്ഥരെ സമ്മർദ്ദത്തിലാക്കി കരാറുമായി മുന്നോട്ടുപോകുകയാണെന്ന് പ്രമുഖ മാധ്യമങ്ങൾ റിപ്പോർട്ട് ചെയ്തിട്ടുണ്ട്. ഇതിനെ ശക്തമായി എതിർത്തതിനാണ് ഉദ്യോഗസ്ഥരെ സ്ഥാനത്തുനിന്ന് മാറ്റിയതെന്നും വാർത്തകൾ വ്യക്തമാക്കുന്നു. ഈ പ്രതിസന്ധി പെട്ടെന്നുണ്ടായ ഒന്നല്ല. നേരത്തെ തന്നെ ഇതുസംബന്ധിച്ച് വൈദ്യുതി മന്ത്രി പ്രതികരിച്ചിരുന്നതാണ്.

പൊതുമേഖലാ കമ്പനികളിൽ നിന്ന് വൈദ്യുതി വാങ്ങുമെന്നായിരുന്നു അന്നത്തെ ഉറപ്പ്. എന്നാൽ, ആ ഉറപ്പ് കാറ്റിൽപ്പറത്തിയാണ് ഇപ്പോൾ സംസ്ഥാനത്തിന് വൻ നഷ്ടമുണ്ടാക്കുന്ന രീതിയിൽ സ്വകാര്യ കമ്പനികളുമായി വഴിവിട്ട ഇടപാടുകൾ ആസൂത്രണം ചെയ്യുന്നത്.

പൊതുപണം കൊള്ളയടിക്കാനുള്ള ഈ നീക്കങ്ങളുമായി ബന്ധപ്പെട്ട മുഴുവൻ ഫയലുകളും കെ.എസ്.ഇ.ബിയുടെ വിയോജനക്കുറിപ്പുകളും സർക്കാർ അടിയന്തരമായി പുറത്തുവിടണമെന്നും പിണറായി വിജയൻ ആവശ്യപ്പെട്ടു.

Pinarayi Vijayan has alleged that the government is pushing a controversial power purchase deal that could burden the state with an additional Rs 727 crore. He said the move, involving private companies and bypassing regulatory approval, amounts to corruption under the cover of a power crisis and demanded that all related files and dissent notes be made public.

### Related Links & Sources
- [Original Story Source](https://truevisionnews.com/news/390076/power-deal-adds-727-crore-burden)